الأربعاء، مايو 17، 2006

تاج / السؤال اجباري الاجابة عليه


قرأتُ هذا التاج عند
فاستهواني ، وقررتُ الاجابة عليه ، وتمريره....

عشرين سبب يخلوك تحب الدنيا ؟

أنا شخصيا أعتقد ان فيه كتير قوي بالنسبه لي... وهاكتب اللي ييجي على بالي من غير تحديد أولوية :
* وجود ربنا
* انه نزلنا الدين
* صوت عبد الوهاب / حتى لو من غير غنا
* جدتي لما بتحكي عن زمان
* فنجان القهوة اللي باشربه كل كام شهر
* كوباية عصير القصب اللي لما باشربها و أنا حاسة بالوحدة والملل ، بتخليني أحس ان معايا البلد كلها
* التمشية لوحدي أو مع حد باحبه ، حتى لو من غير كلام
* سورة الضحى
* البحر
* ذكرياتي مع صديقتيا
* الاستثارة اللي بتحصل في عقلي لما باتحمس أو فكرة جديدة تجيلي ، أو لما باكتب ، أو لما باستمتع وبلتذ بعمل فني أو بفكرة جديدة

* ذكرياتي مع أغاني كاظم الأولى
* الورق والقلم --- حياتي من غيرهم ضلمة ، ومن غير لون ولا معنى
* الراديو
* البابور
* ريحة الفاكهة في الصيف
* ريحة رمضان ، ولون أيام العيد
* جون سانغا ويوجينا / خصوصا لو وجدت مثل هذه الشخصيات في الحياة
* الليل
* المطر والشتا
* الغنا تحت المطر مع أصحابي اللي باحبهم
* الاستفزاز الذكي مع ناس أذكيا
* الكتب
* معارض الفن التشكيلي اللي كل فين وفين باتصادف فيهم
* الموسيقى الحلوة / سواء اللي في الأغاني أو الموسيقى الخالصة
* شباك أوضتنا في الصيف ، والهوا اللي مالوش حل اللي بيدخل منه
* صوت الراديو عند جارنا بعد الساعة 2 بالليل ، وصوته وهو بيغني مع أم كلثوم وعبد الحليم
* كل ما أفتكر مدرسة اللغة الانجليزية أيام ثانوي ( مس مها
* صوت القرآن في المحلات اللي بتفتح الصبح بدري والشوارع فاضية
* القطار ، و التعدية من عند محطة القطار في الزقازيق ( أحلى محطة شفتها
* أغاني فيروز و الأغاني القديمة وكل غنوة حلوة خصوصا لما باسمعهم بمزاج / لوحدي .. بالليل .. مع كتاب حلو أو حاجة باكتبها
* العروض المسرحية الجيدة ( خصوصا مسارح الهواة
* جدارية محمود درويش
* تنويعات على وتر وحيد لأحمد كامل ، و أشعار محمد بدير
* المناقشات الذكية و الأفكار الذكية
* اللغة الخاصة اللي بتتكون بيني وبين بعض الأشخاص ، وتخلي كل طرف فينا يلقط التاني بسرعة
* الناس الشغوفة باللي بتعمله / وبيظهر شغفها في نظرة عنيها ( زي بعض المعارف القدامى ) أو في عملها ( زي ايهاب لمعي كده)
* سماح
* وجود ناس بتحاول تعمل حاجة ، وناس بتفهم
* قصص فوزية الدريع
* النت مؤخرا
* السمك / عمله ، و أكله ...( الأكلة الوحيدة التي أحس بمعنى كلمتي " اشتهاء " ، و " التذاذ " أمامها ) خصوصا لو كلته بالشوكة والسكينة
* الأشياء التي تدهشني ، ويدهشني أكثر أنها لا تدهش الآخرين
* كوباية اللبن الدافيه بالعسل + تفاح بلدي + موسيقى زمفير وكرسي مريح وهوا
* السفر
* التأثير الحلو على احساسي وعقلي لأكلة المسقعة أو الباذنجان المقلي عموما
* الناس اللي بارتحلهم م الباب للطاق ويبقى فيه نوع م الحب غير المسبب بيني وبينهم ، على الرغم من انعدام أي أنواع العلاقات أو المعرفة بينا
* علم النفس
* الأفلام المعمولة كويس
* الموت بكل تجلياته ، والبعث اللي بييجي بعده
* جوليا روبرتس ) بتديني احساس دايما ان الدنيا دي جميلة قوي و تستاهل ، مهما كان الدور اللي بتعمله)
* توم هانكس )بيحسسني ان الدنيا لسه بخير ، وان لسه فيها ناس على سجيتها)
* الساعتين تلاتة اللي بعد الفجر
* المراجيح
* الرقص ( لما باشوفه ) / معظم الأنواع ماعدا الرقص البلدي
* الأشياء التي تجعلني أشعر بالرقة داخلي ( زي الندى اللي بيبقى على ورق الكرونب الأبيض الصغير من جوة
* درية شرف الدين ) كل ما أشوفها أو أسمع عنها أحس ان البلد دي لسه فيها ناس محترمة بتفهم)
* أحلامي لما بتتميز بالخفه والنشاط والابداع
* التفكير
* الخضرة + هوا + صوت الميه + صوت العصافير
* احساسي بالحب والتقدير للحاجات اللي بيحبها الناس اللي باحبهم ، حتى لو انا نفسي مابحبهاش
* ممارسة الرياضة على موسيقى متحمسة
* لما بلاقي ناس تفهمني وتشاركني في عمل جماعي ، خصوصا لو فيه تحدي أو مصاعب
* متع مستقبلية أنتظرها ، حتى لو لم تحدث ، يكفي أن أعرف أن هناك من يستمتع بها
* الكلمة الحلوة المثيرة للتفكير / تجليات اللغة عامة وتفسيراتها / نحويا ودلاليا وصوتيا / ( زي اللي في كتاب دلائل الاعجاز للجرجاني مثلا )
* الحواديت
* ابتسامة العنين ، والحنية اللي بتظهر في طلة الواحد وسلوكياته الغير مباشرة


و كفاية كده قوي ، و أعتقد ان اللي كتبته طلع أكتر من عشرين
و بأمرر الدور ل
  • aries

    وكل منهم يمرره ل 5 آخرين


    هناك 11 تعليقًا:

    ayman_elgendy يقول...

    كل دي حاجات بتخلكي سعيدة؟؟

    انتي اكيد اسعد حد في الدنيا...بس برضه زي معندك حاجات كتير بتفرحك عندك ما يوازيها ليحزنك ...ولا انا غلطان؟

    sha3'af يقول...

    ههههههه

    بيتهيألي ان كل واحد لو عد الحاجات اللي بيستمتع بيها - مهما كانت بساطتها - أكيد ممكن يوصل لنتيجة انه أسعد واحد في الدنيا

    حاول تجرب كده؟

    بس أكيد برضة في حاجات تانية مش تحزن بس ، لا ، دي تغم ... بس الواحد بيحاول يتعلم اما يتجاهلها ، أو لو ينفع يصلحها يصلحها ، أو يبعد عنها خالص

    ...دنيتي يقول...

    انا شبهك فحاجات كتير جدا من اللي انتي كاتباها ومعرفش ازاي مع انها تفاصيل صغيرةجدا
    الا حاجة واحدة مبحبهاش خالص
    البتنجااااااااااان بكل اشكاله

    غير معرف يقول...

    يا بختك ....................

    فنجان قهوة يقول...

    الله
    ايه ده كله .. ايه ده كله
    ده تعريف للذات؟؟؟؟؟؟؟؟؟؟؟؟

    change destiny يقول...

    مدونة لذيذة

    حلو حبك للحياة

    sha3'af يقول...

    دنيتي : بالنسبة للبتنجان ، فلاحظي اني ما تكلمتش عن طعمه خالص ، انا اتكلمت عن تأثيره ... البتنجان له تأثير رائع بجد عليا ، لو عندي هبوط واحساس بالتعب او الارهاق ، بيشيله ... بيحسسني اني مركزة اكتر ، وان وعيي بقى اكثر حده ... وكمان بيخليني أحس بالقوة والثقة وبالنضج ... \و ممنوع الضحك من فضلكم / ايوة البتنجان بيديني المشاعر دي كلها

    على عكس أكلات تانية ممكن أكون بحب طعمها لكن تاثيرها سيء عليا / عشان كده بتجنب اني اكلها زي الملوخية ، البامية ، و البسكويت
    وأعتقد ان من الطبيعي ان الأكل يكونه له تأثير على الانسان

    انينيموس / عقبالك

    فنجان / منورانا ، وده مش تعريف للذات ولا حاجه ، ده تعريف لللذات

    change destiny
    الحياة حلوة ، بس مستنية عين تقدر تشوفها

    Moia يقول...

    حجاتك الصغننه دى جميله اوى اوى :))

    Bella يقول...

    جميلة جدا

    تعرفي انا كمان باحب الحاجات دل كلها وحاجات تانية كتيرة بس بقالي فترة مش قادرة استبعد الحاجات اللى بتزعلني
    نفسي فعلا اتعلم استبعد كل مايضايقني وإن لم يكن كله فعلى الاقل جزء منه

    وعلى فكرة انا زيك باحب المسقعة وباتفنن في عملها وماكنتش اعرف انا ليه باحبها لكن من وصفك لتاثير الباتنجان عليك اكتشفت انه نفس التاثير الذي يتركه على بعد أكله.

    انا باعمل مسقعة باللحمة المفرومة تجنن لو تحبي تطبخي عرفيني واقول لك الوصفة

    سعيدة جدا اني تعرفت على مدونتك بالصدفة .

    sha3'af يقول...

    مويا: انتي أجمل يا عسل


    اتفضليها

    والله ما تغلا عليكي



    بيلا:
    حاولي تدوري جوه الحاجات اللي مضايقاكي دي نفسها ، وانتي أكيد هتلاقي سبب ضيقك منها ، وممكن كمان تلاقي جواها حاجات تانية جميلة ما كنتيش واخدة بالك منها

    أنا أسعد بزيارتك

    ولينا أكلة مسقعة في يوم مع بعض إن شاء الله

    boyosof يقول...

    الله يا سلام على الرد الرائع ...
    ده مش تعريف للذات .. ده تعريف للذات ..
    انا ما قرأتش في حياتي من زمان كلام حلو زي ده .. معقول فيه حد بيقدر يعبر عن مشاعره وعن حبه للحياة بالشكل ده