الأربعاء، نوفمبر 29، 2006

رسمة

أرسم وردة
في حجمِ الفرحِ الجامحِ ، تزهو
تتحدى سكيناً تشحذها الريحُ الدامية ُ المسعورة
و جبالاً - أرسمُ - و براكين
و عينينِ كطفلينِ وديعين
و أماً تحملُ طفلاً حافية مذعورة
أرسم شمساً ملقاةً نصفين
على الأسفلت
و فاتنة ً تستقبلُ عاشقَها
و دماءاً في الغابات
و خُوَذ َة َ جندي
و قميصاً ثقبتهُ الطلقات
أرسمُ قلبي

عنتر مصطفى

هناك 16 تعليقًا:

كرانيش يقول...

أرسم قلبى
جميل قوى يا شغف
طب ماتدينا فكره عن عنتر مصطفى ده؟
مااااااااشى
بالنسبه للنص فهو عبر عن حاجات كتير مختزله فى كلمتين وده كويس جدا
من غير مايجيب سيره الحرب والدمار والبهدله دى
لا بجد جميل والفكره سلسه والكلمات بسيطه
بحبك ياشغوفه

sha3'af يقول...

بصي يا عزيزتي
النص ده كان منشور في عدد قديم من أعداد مجلة الثقافة الجديدة كان عن شعراء السبعينات ، اللي كان منهم عنتر مصطفى ده

عجبني النص جدا ، و حسيت انه لامسني و بيعبر عني بشكل ما

فنزلته هنا

أما عنتر مصطفى ، فماكانش مكتوب عنه حاجة تقريبا غير تحليل لنمط شغله في سياق شعراء السبعينات
حاولت أشوف معلومات عنه في النت دلوقتي
مش لاقيت غير واحد اسمه " أحمد عنتر مصطفى " ، ما أعرفش ان كان هوه و لا لأ ، و إن كنت ما أعتقدش يعني

21arestoo يقول...

حلو جدا موضوع ان الواحد ينزل بوست لحد تاني خصوصا لو كان البوست لامسه اوي زي مابتقولي وخصوصا برضو لو كان البوست عالي اوي كده

تاني حاجة
هوه فعلا احمد عنتر مصطفى

الاهم من ده كله
اني عندي ثقة غريبة في الشعراء المغمورين
وان نصوصه اللي قريتهامن خلال طرحك لقصيدته تحتّم عليّ اني اشكرك بشده لان الراجل ده شاعر بجد

وبما انك عارفة قراية النت
فياريت تكملي جميلك وتشتري دواوينه المطبوعة وتسلفيهالي

تحياتي

tamer يقول...

كلام مش منطقى

وغير مفهوم بالمرة

sha3'af يقول...

أريسطو :


و الله يا عزيزي أنا قلت أهي فرصة الواحد يستعيد جو القراية من ناحية ، و ينزل حاجات قيمة فعلا من ناحية تانية ، و يعمل نوع من التفاعل الأدبي من ناحية تالتة

النص عبقري بجد
و مسألة انه لامسني دي ، يمكن كنت أقصد بيها انه قدر يأثر عليا كنص أدبي معمول كويس --- قدر يجذبني لمنطقته و قدر يثير دهشتي و اعجابي و تفاعلي معاه
يمكن حتة انه يلمسني بقى بشكل شخصي ، فده حصل يمكن بعد ما نزلته فعلا ، و بعد تعليق كرانيش عليه
لأن كرانيش يمكن جابت سيرة الحرب و الدمار و الكلام ده ، فاندهشت --- لأن قرايتي للنص يمكن مختلفة عنها
---- قريته من ناحية تانية ، ان المسألة هنا في القصيدة - و هي قصيدة تفعيلة -و زي أغلب قصايد التفعيلة ، فالنص غنائي --- بمعنى ان الشاعر بيتغنى بذاته فيه --- بيقول " أنا أهوه --- بهذا الشكل " ، و اللعبة اللي اتلعبت في القصيدة ، انه عمل هرم مقلوب : النقطة الأساسية فيه ، أو قمته بمعنى أصح هيه " قلبه " ( أرسم قلبي ) و ده اللي بنلاقيه في النهاية بعد سرده لتفاصيل ما يعنيه هذا القلب كتعبير عن شخصية الشاعر نفسها : الوردة
في حجم الفرح الجامح

و على الجانب المقابل نلاقي السكين اللي الريح الدامية المسعورة شحذتها

الاتنين في موقف تحدي : الوردة ، و السكين
و كلٌ منهما يعضده مايجاوره : يعضد الوردة رمزيا الفرح الجامح التي اتخذت حجمه
و يعضد السكين
الريح الدامية المسعورة التي شحذتها

قلبه وردة ، و جبال ، و براكين ---- عينان كطفلين وديعين --- أم حافية مذعورة تحمل طفلا--- قلبه شمس ملقاة نصفين على الأسفلت -- فاتنة تستقبل عاشقها ---- قلبه دماء في الغابات ، خوذة جندي --- قلبه قميص ثقبته الطلقات


---
انها تلك الشخصية التي تجمع المتناقضات : الاقدام و الثقة فيما هو قادم ، التحدي ، الأمل ، التقلب ، الطموح ، الخوف ، الألم ، التجربة ، الشغف ، الرغبة في الحياة ، و ما أخذته تلك الحياة نفسها منه

إنه المبدع


-----------------

و معاك جدااااااا يا أريسطو ان الراجل ده شاعر بجد
------------
و انا بالنسبة لي برضك اتعلمت أحكم على النص من خلاله هوه نفسه ، مش من خلال شهرة صاحبه و لا شهرة العمل لأن الحكاية دي سببت لي العديد من الاحباطات
--------------------

بس انت كده داخل على طمع يا باشا ، كفاية اني عرفتك بيه
النقطة اللي بتتكلم فيها دي بقى عليك انت

يعني أستنى تشوفلي دواوينه المطبوعة و تسلفهالي قريب ، فاااااهم؟؟؟

عوليس يقول...

يخرب عقلك ياشغف
ضحكتينى موت
بس النص كويس فعلا

sha3'af يقول...

عوليس

خير اللهم اجعله خير

هوه النص يضحك و لا ايه ؟

هوميروس يقول...

انا كنت هسأل مين عنتر مصطفي بس لنتي سبقتي
عموما الصورة الجديدة اتحلي كتير من القديمه

syzef يقول...

كويس اوي ان احنا ندون نصوص ناس تانيه ودي فكرة انا مش رافضها من الاساس واستغربت جدا لما لقيتك انت شخصيا اعترضتي مرة علي الموضوع ده عند عوليس لما تقريبا نزّل حاجة لدرويش وكانت مع صوته وانتي قبلتيها بس عشان انها مقرونه بصوته كده
انا كنت مستغرب جدا من رايك ده وفرحان انك غيرتيه ونزلتي نص بالقيمه اللي انا بحطها شرط لتدوينا لناس تانيه
ان يكون اولا النص له قيمته ..او زي ما قال ارسطونيوس انه يمس اللي مدونه
النص بقي
بصراحه عاجبني بس مش بقدر اعجابك انتي وارسطو بيه واعتقد ان ده اللي ضحّك عوليس
انا شخصيا عاجباني الرسمة كعنوان وكنص عاجباني اوي بداية النص والشمس الملقاة نصفين علي الاسفلت
عاجبني جدا تركيز النص وهدوء الكاتب قوي في اسلوبه رغم ثورة صوره (من اول جموح الفرحة..لحد ثقب الطلقات للقميص)

ده كله جايبه الكاتب بكل هدوء وتركيز وسلاسة
الغريب بقي اني ماحستش ان الراجل من السبعينات والله ..ودي حاجه انا حاسس بخطورتها لاني بشوف نصوص شبه دي كتير دلوقتي يعني في ناس لحد دلوقتي لسه مصرة علي تقليد السبعينات..المشكله ممكن ماتكونش كده ان حد يقلد لكن المشكله ان الناس الاصليين ممكن يتظلمو مع الهيصة دي..بس فعلا المخرج ان يكون حكمنا علي النص بس

شوفو بقي انتي وارسطو موضوع كتبه وبلغونا

sha3'af يقول...

هوميروس
شكرا على تعليقك ع الصورة

سيزيف:
أنا ما غيرتش رأيي يا بني
المسألة و مافيها ، اني معترضة على تنزيل النص كده لوحده - خصوصا النصوص الممكن ايجادها بسهولة ع النت ، و خصوصا لو صاحبها مشهور - ، لكن في حالة ان النص يبقى منتظر ان فيه كلام فيه و مناقشة ، الوضع يختلف
و لما يبقى النص صاحبه مجهول تقريبا ، و صعب الواحد يلاقيه --- فده اللي بيعمل الاختلاف

الاعتراض كان أساسا على نقل حاجة متوفرة و متاحة و الناس عارفينها - مهما كانت جميلة -بدون إضافة


أنا فيه حاجات كتير عاجباني و عاوزة أنزلها - منها أغاني في لينكات - بس يوم ما هاعمل ده ، هاعمله مسنود بوجهة نظري فيها



معاك جدااا في النقطة اللي انت قلتها بالنسبة لزمن النص، و الحكاية دي على فكرة لاحظتها بدهشة جدااا في بعض أفلام السبعينيات و أوائل التمانينيات ، اللي يادوبك لسه بيفكروا يطلعوها من العلب و يعرضوها ع الفضائيات ---- لأن فيها نسبة تجريب و نضج فني في نفس الوقت عالييين جدااااا ، يخلوا الواحد يندهش جدا لأن صناع الفيلم مش م الناس اللي خدوا حقهم كما ينبغي مع انهم عملوا حاجات أهم ساعات من أفلام واحد زي يوسف شاهين مثلا في الناحية الفنية

film69 يقول...

العزيزة شغف

موضوع أن النص سبعيناتي لم يؤثر في عند قراءته سلبا أو إيجابا بل تعامت معه كنص ، واحببته
والحديث أيضا عن سينما الثمانينات قد يكون لهذا التصنيف الزمنى جدوى نقدية لتحديد ملامح الفن التشكيلي أو الشعر أو السينما في حقبة ما
لكن على مستوى التلاقي اعتقد أن الفن والأدب الحقيقيين لا يمكن ربطهما بحقبة أو زمن بل هما يمتعان في التلقي على مدى العصور

sha3'af يقول...

فيلم العزيز :

انت كده بتطرح نقطة مهمة جدااا ،كانت طرحتها أميرة مطر في كتاب فلسفة الجمال --- : إن الفن -عند نظرنا ليه كفن و عند تعاملنا معه - يجب ألا نربطة بتاريخ إلا عند دراسة تاريخ الادب أو الفن فحسب

و عجبني تشبيه ليها حلو جدا : افتراض ان كل الادباء - أو الفنانين بالطبع - قاعدين في غرفة دائرية بيكتبوا في نفس الوقت

و زي ما انت قلت ، المهم في الفن انه يثبت نفسه كفن و انه يثبت قابليته للامتاع في اي وقت و مع اي حد

لكن هيه المسألة مسألة ان فيه نصوص سابقة أثبتت نفسها - و ادي معظمنا متفق على انه مستمتع بيها و أنا أولهم لكن كلام سيزيف كان على النصوص الحالية ، أو النصوص التالية بمعنى أدق ، و اللي ما عرفتش تضيف كتير على الساحة الابداعية و جت كتقليد غالبا ، و غالبا ما حدش بيلاحظ انها نصوص غير أصيلة لعدم شهرة بعض اصحاب الاعمال المميزة من الاجيال الللي قبل كده


و بالتاكيد ، لا خلاف بين وجهات نظرنا -

maged stephen يقول...

مين ده؟

sha3'af يقول...

ده واحد صاحبنا ما تعرفوش

Mony The Angel يقول...

3antar mostafa da albo eswed awee :D

sha3'af يقول...

angel
قلبه اسود؟؟؟؟
يا شيخة قولي كلام غير ده