الجمعة، يناير 05، 2007

نفسي أدخل سينيما


المشكلة بقى يا سادة يا كرام إن إعلانات الأفلام كلها تمنع أي حد يحترم ذوقه و يحترم نقوده كذلك من دخول تلك الأفلام
الاعلانات كلها بتقول ان معظم الأفلام دي متاخده كوبي من الأفلام الأجنبي
معظمها معتمد على طاخ و بوم ، و بالتأكيد لو الواحد عاوز يتفرج على طاخ و بوم صنعة نضيفة و محكمة و مش مفتعلة هايشوفها أجنبي
و زي بالظبط ان الواحد مش هايبوظ فيلم زي
shall we dance
في دماغه عشان خاطر الست إيناس الدغيدي

----------------------------------------------------------------------
حسيت بان الناس دي بتستعبطنا ، لما لاقيت ذلك الفيلم العربي السمج المطبوع من فيلم
pretty woman
و خير اللهم اجعله خير ، عملت جالا فهمي فيه دور جوليا روبرتس ، و الأخ فاروق الفيشاوي دور ريتشارد جير
الفيلم ده قديم ، و شفته قبل كده
بس لما لاقيته ع الشاشة انهارده اتخضيت
صحيح حكاية النقل ( اللي بذمة كبيرة ) عن الأصول الأجنبية موجود من زمااان / و معظم السينيما العربية قايمة عليه - و غالبا دون ذكر الأصول نفسها - يعني نصاباية كده م الآخر
لكن ع الأقل كان الواحد دايما بيحس بإن فيه روح مصرية فيها
لكن نقل الجمل بالحرف - لدرجة انك ما تحسش ان تركيب الجملة عربي اصلا على الرغم من عربية الكلمات - ، و شكل الناس بايظ خااالص ، لا إلى هؤلاء و لا إلى هؤلاء / و المواضيع أصلا تحس انها ما ينفعش تكون كده و ما ينفعش تقبلها بنفس شكلها اللي كانت في في الوسط الطبيعي بتاعها اللي هوه الفيلم الأجنبي في وسط تاااني خاااالص ----------- يبقى أكييد فيه حاجة غلط
-----------------------------------------------------------------------
قريب ---- من بضع سنوات - زي ما بيقولوا - لما شفت فيلم " أمير الظلام " بتاع عادل إمام و شرين سيف النصر حسيت بان السينيما بخير يا جماعة فيه أمل
صحيح برضة الفيلم متاخد عن
scent of a woman
بتاع عم الحاج آل باتشينو
بس فيه التفاصيل نفسها مختلفة كتير --- ممكن نقول عن معظمها تفاصيل مرتبطة بظاهرة عادل إمام نفسه ----- بس فيه اختلاف حتى في اللغة المستخدمة
و يمكن اللي خلاني أقول الجملة الافتتاحية دي إن الإخراج بتاعة كان عاجبني قوي ، و كات صورة الفيلم حلوة ، و كانت عجباني لقطات معينة فيه حسيت ان أسلوبها جديد ع الفيلم العربي
-----------------------------------------لكن ----------
المسألة فعلا زي ما كتييييييير من الناس اللي بتفهم قالت - و على رأسهم سامي السلاموني رحمة الله عليه - هيه لعبة ورق في الأول و في الآخر
-----------------------------------------------------------------------
شفت أو أعدت مشاهدة بعض الأفلام في التلفزيون في الفترة اللي فاتت
من نوعية :
" غاوي حب "
" الباشا تلميذ"
" شبر و نص"
" ظرف طارق "
" زكي شان "
" أبو علي"
" كلم ماما "
" اللي بالي بالك "
النتيجة ؟
لما شفت الأفلام دي أول مرة ، كنت بأفكر في عقل بالي إن الأفلام اللي زي دي مش سيئة يعني ، بالعكس يعني ، الواحد بيشعر بشيء من السعادة كده لما يتفرج على الفيلم من دول و يخلصه
لما كنت بأفكر انهاردة ، استغربت جدااا لما لاقيت ان الوصف اللي جه في بالي كتشبيه للفلام دي هيه " المخدرات "
المخدر اللي ؟أسمع انه يحسس الواحد من دول بنوع من السعادة الوقتية الزائفة ، و لما يخلص تأثيره بيتلاشى الاحساس ده
و طبعا الأفلام دي غالبا بتعتمد وصفة سحرية من أزمات بسيطة مفتعلة ، و للأسف اللي بيخلي الأفلام دي ليها تأثيرها ان فيها بناء درامي - صحيح في صورته الأوليه غالبا و صحيح بيبقى مفتعل غالبا - لكنه موجود و هوه اللي قادر يشيل الفيلم من دول و يخلي له جمهوره
و الصراع بيبقى موجود بشكله الأولي الساذج / بين الخير و الشر ممثلين في الشخصيات الأساسية للفيلم و السنيدة بتاعوتهم - / ده غير طبعا كوكتيل من الأغاني ( على اعتبار ان احنا شعب أذنه موسيقية ) ، على حبة طاخ بوم ، على خط قصة عاتفية ( على اعتبار اننا شعب عاتفي - بالتاء - برضة ) ، على حبة نكت بتضحك فعلا غالبا مع بعض المقالب الظريفة
يبقى ازاي الفيلم يبقى وحش؟
و مين ده اللي تواتيه الجراءة عشان ما يحسش بذاك النوع التخديري من السعادة بعد انتهاء الفيلم ؟
أمال الناس بتدخل سينيما ليه يعني؟
انتى هاتعوزي ايه أكتر من كده ؟
هاتنهبي؟
----------------------------------------------------------------
باختصار شديد :
عاوزة حاجة تدخلني
أعيش معاها و تغير في رؤيتي للحياة و تعاملي معاها
و تديني فن بجد قبل كل شيء

هناك 10 تعليقات:

21arestoo يقول...

با ختصار شديد برضو

بلاش السينما اللي هاتخليكي تعملي في نفسك كدا
لا بجد معاكي جدا ان الموضوع كبر اوي عن حده لكن هانقول ايه بقى

دا سعد باشا ذات نفسه قال
مفيش فايدة

sword يقول...
أزال أحد مشرفي المدونة هذا التعليق.
sword يقول...
أزال أحد مشرفي المدونة هذا التعليق.
sword يقول...

ادخلي فيلم " خيانة مشروعة " حلو فعلا

zordeak يقول...

انتى لخصتى ماساة السينما المصرية


انتى عارفة انا لما بدخل سينما .., ببقى مع صحابى ., وبنبقى داخلين علشان نهيس بس مع بعض .., وبتوصل اننا بنعمل فيلم موازاى واحنا قاعدين .., ونتريق عالفيلم من اوله لاخره .., والناس تفضل تضحك على كلامنا احنا



انصحك نصيحة يا بنتى .., متدخليش سينما غير فى الافلام الاجنبى

لو هتدخلى عربى .., يبقى ادخلى مع اصحابك .., واتريقو عالهلس اللى هتشوفوه

zordeak يقول...

على فكرة نسيت اقوك انى زقازيقى انا كمان .., من بتوع اللى عزمو القطر

غير معرف يقول...

well I really appreciate your taste and your love for the fine art ...but you can watch some hidious movies (ELLY BALLY BALLAK) for example until REAL movies for SHAHEEN and KHALED YOUSSEF..(among others) are shown .....
el masry affendi

كائن العزلة الكئيب يقول...

تقريبا فيلم الباتشينو اسمه scent of woman
بعدين موضوع الهبش من افلام بره ده بقه هو العرف دلوقت
وأنا متفق معاك فى حكاية أن الأفلام الحفيفة بتاعة حلمى و سعد وغيرهم مش وحشة قوى لكنها مش مخدرات متوسعهاش يا شيخة قولى مثلا زى الجامز والبلاى ستشن حاجات ملهاش فايدة بس بنحبها وبتسلى وتخلى الوقت يعدى
وهى جت عالسينما يعنى

sha3'af يقول...

أريسطو :
القوالة كتييير يا أريسطو

و ماليش دعوة بسعد باشا




sword:
مع اني ما بحبش أحكم على حاجة قبل ما أشوفها --- بس اعلاناته هوه كمان مش مشجعة
بيقول كده اني هاشوف حاجة زي ويجا أو زي ملاكي اسكندرية
و انا مالاقيتش حتى في الأفلام دي اللي أنا عاوزاه
بالإضافة لكوني مش بأحب هاني سلامة أصلا - يمشي ، بس مش مغرمة بيه يعني





zordeak:
ده احنا حياتنا كلها بقت تريقة
الأفلام معظمها أصلا بقى عامل زي التريقة المُحولَة لأفلام


على فكرة يا ريت تبقى تبعت الايميل بتاعك و لا حاجة ، لو كنت زقازيقي فعلا ، لعل و عسى تنضم للي عزموا القطر و ندخلك الجروب

sha3'af يقول...

المصري أفندي اللي عامل نفسه أنينيموس:


و زي ما الأفلام دي مش من ذوقي ، فبرضة أفلام يوسف شاهين مش المنقذ يعني - خالد يوسف عجبني فيلم حب البنات بس ليه - لأن يوسف شاهين معروف جدااا انه بيعمل أفلامه أساسا للمهرجانات و للذائقة الغربية بشكل ما ، ده غير إن إدارته للممثلين سيئة جدااا ، لأنه بيطمس معالمهم و يحولهم لنسخة منه ---- و كأن ممثلي الفيلم كله / إلا ما رحم ربي / بيتحولوا لنسخ شاهينية





كائن العزلة :
أيوة صح
اسم فيلم آل باتشينو
scent of a woman
هوه أنا عاملاه ايه ؟
معلش غلطة ذاكرة في الكتابة السريعة ، خصوصا و إني ما باراجعش اللي باكتبه
هأصلحها
شكرا على لفت النظر


معاك حق
ممكن نخليها زي اللب و السوداني و الجايمز و البلاي ستايشن
بلاش نوسعها قوي كده
:)