الاثنين، يناير 15، 2007

نهاية


شعورٌ بالاختناق منعني من الرد
إذا فكلُ هذا ما هو إلا كذبة كبيرة
كذبة تُدعى التدوين ، و كذبة تُدعى التواصل
و كذبة تُدعى الاهتمام
----------------------------------------------------
قرارات :
- غلق التعليقات من اليوم فصاعدا ، فليس هناك من شيء حقيقي لأتيح له التواجد.... و لربما يكون هذا الجمع لا أحد
- حسنا ، فليكونن الابتعاد بديل لكل شيء ، و لأسحبن قرار التدوين اليومي ، فقط سأدون عندما أرغب بتقيؤ تلك الأشياء اللحظية التي لن يسمعها أحد ، و عندما تنهي لحظتها لربما أقوم بحذفها
- أصلا --- هذا العالم كله وهمي
فلا تتضايقون يا أصدقائي إذا ما تم حذفكم من قوائم اتصالي و تجاهل وجودكم تماما --- فهذا كله كذبة
و بالتاكيد لن يتضايق أحد من الأساس إذا لم تعد هناك شغف تلك - التي بالتأكيد تعترض لمجرد الاعتراض - و لا حتى تلك في الظل التي تُدعى ياسمين
-----------------------------------------------------------------------------------



تم إغلاق هذه المداونة ------------------- شكرا لعدم مرور أي أحد من هنا بعد الآن

و تم حذف البشر من الايميلات و عمل اجنور لهم
فياريت لو حد عنده ايميلي يحذفه هوه كمان ، منعا للأحمال الزائدة

هناك 23 تعليقًا:

Leonardo يقول...

هوّه الكلام بجد , وللا إنتى بس بتوضّحى وجهة نظرك اللى فى البوست اللى فات ؟

Leonardo يقول...

لو الكلام بجد فأتمنى ماتكونيش لقطتى الاكتئاب والأفكار السودا دى منّى !
مش هاسامح نفسى أبدا لو أنا السبب بشكل أو بآخر
بالذات وأنا كنت مبسوط من الشغل اللى عاملاه فى المدونة بعد التزامك بالتدوين اليومى

بجد كان ده بالظبط اللى كان نفسى أوصل له ساعة ماأخدت قرارى, الظاهر إنى حسدتك بقى ^_^

الظاهر والله أعلم إن كان فيه حوارات تانيه بخصوص إن ده كلّه كذبه كبيرة
التدوين والتواصل والاهتمام
هامنع نفسى من تهنئتك بعنف لأنك أدركتى الحقيقة دى أخيرا !! لأن كده مفهومك مصاب بخلل ومحتاج شوية إضافات وشروحات ..

المدونة زى علاقات العمل والعلاقات الاجتماعية المختلفة
شكل من أشكال التواصل
بس المدونة بتمتاز بإنك مش مضطرة فيها لأى حاجه ضد إرادتك أو طبيعتك
مافيش رقابة
مافيش حساب
أساسا مافيش حد يعرفك !
ومافيش مكسب كمان - إلا لو نزلتى إعلانات فى المدونة -

إممممم

شكل الكلام بدأ مايعجبنيش !
للأسف ماعدتش باقدر أحافظ على أفكارى منظمة لأكتر من سطرين , علشان كده هاقولك خلاصة الكلام اللى عايز أقوله

- ماتدّيش المسائل أكتر من حجمها
التدوين والنت كلّه أصلا عباره عن ناس بتدردش مع بعض !

- اعملى دايما الحاجه اللى إنتى عايزاها مش اللى حواليكى
إنتى اللى هترتاحى أو تتعبى فى النهاية
راحتك إنتى وقراراتك إنتى ومنطقك إنتى هو المهم بالنسبة لك

- الصداقة موجوده والتواصل موجود والحب فى الله والاهتمام بدون مصلحة والمشاركة و ... و...
كل ده موجود
بس ماتعتمديش عليه أكتر من اللازم أو تدّيه أكتر من حقّه !


أعتقد إنى مش واضح أو إن كلامى مشوّش بس أتمنى تكونى لقطتى أى حاجه منّه ..

خلاصة الخلاصة :
اعملى الحاجه اللى هتريّحك فعلا ومش مهم أى حدّ تانى
......

وأنا واثق إن راحتك مش فى البوست ده :)

تــسنيـم يقول...

منين يا هانم بتعترضي على الموقف اللي خده سلامة ومنين بكل سهولة بتقلديه وبتعملي زيه لمجرد شعورك بالاختناق او كنوع من أنواع الاعتراض!!!!!!!
مش هقولك يمكن يكون عنده سبب لكن هقولك اللي عايز يمشي يتفضل الباب يفوت مدونة ومدون معاها.. الدنيا مش بتقف على حد واحنا بنكتب ونقرأ لنشارك الأخرين تجاربنا وإن كنا بخيبتنا لا نتعلم.

غير معرف يقول...

ليه كده ؟ مش انتي كنتي بتدافعي عن وجهة النظر العكسية البوست اللي فات ايه اللي حصل فجاة
شغف بلاش كومينتس لو مش عاوزاها بس حاولي متبطليش حاجة حبتيها وواظبتي عليها كلنا بنتعب اوقات نزعل اوقات بس بنرجع ندور علي حاجة نفرغ فيها زعلنا دة وفي الحالة دي"البتاعة دي"علي راي ليوناردو صالحة تماما

يلا احنا مستنيينك

saso يقول...

احم
الكومينت اللي فات دة كان بتاعي بس هوا الصبح الواحد بيبقي كده
:$

ماشى الطريق يقول...

فيه أيه يا شغف؟؟؟؟
أيه اللى حصل فجأة كده؟؟

محمد عبد الغفار يقول...

ما لا يدرك كله لا يترك كله

Ayat يقول...

هو ايه بس اللى حصل؟ يارب تكون شوية زعل و نرفزة و يعدوا ... ليه كده؟!! حتى لو كل الحكاية كذب .. وايه المشكلة .. ماكله عادى ... و كله كذب .. بس الفرق ان الكذب ده الناس بتقول فيه حاجات لطيفة لبعضها من غير ما يبقى وراها حاجة اكبر مخبياها .. ممكن نقول شوية مجاملات .. بس احيانا بيكون الكلام صحيح .. وبجد و من القلب ... فليه الزعل ده كله ؟ رغم إحترامى لكل قراراتك .. لكن اتمنى انك ماتبطليش كتابة أبداً أبداً ... بصدق

Ahmed Rashwan يقول...

لم تكن شغف يوما مجرد وهم
ولم تكن ياسمين مجرد ظل
كانتا واقع جميل مغلف بالمرارة
وستظلان

كرانيش يقول...

مالك يا شغف ؟؟؟؟؟
فى قصادى احتمالين
الاول: بضدها تتميز الاشياء
وده اللى انتى عاوزه تعمليه كما اظن
والتانى:انك عاوزه تنسحبى بس مش بهدوء
والاحتمال التالت:انك اتغيرتى كليا حتى مش جزئيا وده اللى محبوش فى شغف حبيبتى

basma saghir يقول...

مع اني معرفكيش كويس بس حبيت اقلك كلمتين
على قد ما كنت موافقاكي في البوست الي فات..على قد ما انا متعارضة معاكي في القرار ده
موضوع انك تقفلي التعليقات انا متأكدة انها حاجة مش منصفة لناس كتير حبيتك وادمنت البوستات بتاعتك

بعدين التدوين والمدونة حاجة بتاعتك انتي بتعمليها علشانك مش علشان حد على الاقل دي وجهة نظري
ياريتك تعيدي التفكير مرة تانية

غادة الكاميليا يقول...

طيب ابقي اعمليها كده وهوريكي كاميليا ممكن تتحول وتبقى ايه ومقولكيش ببقى حاجه كده هتقومى الصبح تنزلي بوست حلو وتقولي آل أقفل البلوج آل

عنتر بن غلبان يقول...

الحمد لله ماحدش جاب سيرتي
بالرغم من موقفك الشخصي مني اللي انا مش عارف سببه بس ما علينا
القرار الي زي ده قرار حر قبل ما يكون جرئ ومش من المنصف محاسبة الناس على حريتهم أو جراتهم واللي يتبني موقف ياتزم به قبل ما يطالب الناس واللي ياخد قرار يلتزم بيه
صح الكلام؟

سلامـــــــــــــه يقول...

مش عارف ليه حاسس اني انا السبب
بس بجدانا مقصدتش كده
مجرد قفلي للمدونه وقفلي الموبايل ومحاوله اعتزال الناس ده كله كان محاوله للخروج من الحاله النفسيه اللي انا فيها
فلو فعلا ده كان هو الحل للخروج من الازمه اللي انا قيها فبها ونعمت
وان منفعتش يبقي فتره نقاهه
فياريت متزوديش تعبي تعب عليه وتحسسيني اني سبب ده
وبعدين معتقدش اني هطول في العزله دي
بدليل اني هنا بعد يومين
قياريت متزعليش مني يا شغف
لاني فعلا محتاج اني اكون لوحدي نوعا ما
..........
عزيزتي
اعذريني
...........
عزيزتي
دمتي بود

21arestoo يقول...

اولا انا فاكر كويس جدا اعتراضي عليكي في فكرة التدوين اليومي لاني شايف ببساطة ان التدوين من الاساس له علاقة بالابداع مش يس كدا انا شايف كمان ان التدوين اليومي بيغذي الاتجاه المضاد للابداع وبيحول المدونة لحاجة تانية خالص

عايز اقول بجد ان مع كل بوست باقراه لشغف رأيي او وجهة نظري دي كانت بتندثر حتى في بوست العيد اللي كان مكانه الطبيعي دفتر مذكراتكمافصلش حالة التواصل معاكي واحساسي بفنية ما تكتبيه مانقطعش لحظة

كمان فكرة التعليق بشوف انها لا تعمل بمعزل عن المدونة دا لان التعليقات بتوفر ميزة حدوث الاتصال في الاتجاهين من المدون للقراء والعكس من القراء للمدون

انا طولت اوي بس استحمليني انا حاسس اني اول مرة في حياتي باتكلم بجد انا اصلا بقالي 3 ايام باخد في قرار التعليق


اخر حاجة عايز اقولهالك ان لو ليا راي في قرارك
انا مش موافق يا شغف

كائن العزلة الكئيب يقول...

ana mesh fahem 7aga ...eh ellakgbata de ?
ente mwkefek eh belzabt ?
ya reet tefhamy ele ana katbo laney 3andy moshkel fe elketaba bel3araby...(my pc is not supported to type arabic words )
belnesba lemoshkelet elta3leek faelaykom altaly :
lama tezharlek epop up edghaty 3aliha we hayezharlek some choices press on dont block popups..

Faheem يقول...

واضح يا شغف إن المجتمع و المحيطين لسه بيأثروا عليكي
احنا مش قلنا قبل كده ان الواحد يعيش دماغه و بس طالما اللي حواليه ممكن يأثروا عليه بالسلب؟
عموماً انتي بس محتاجة فترة نقاهه لأن اللي زيك لو قعدوا يومين من غير كتابة ممكن يتعبوا بجد و عزلتك دي ممكن تخلي الحالة أسوأ.
عموماً ربنا معاكي
على فكرة انتي يوم ما قفلتي المدونة بتاعتك كان هو يوم ما انا عملت المدونة بتاعتي مش عارف ده ليه بيفكرني بمسلسل حديث الصباح و المساء بس شتان بين مدونتك الفهيمة و المدونة المخربطة بتاعتي
:D
ما تنسيش تكملي دعاكي
سلاحف

كائن العزلة الكئيب يقول...

اه العربى بتاع الجهاز اشتغل اخيرا
المهم بص يا ستى المقموصة مفيش حاجة اسمها حقفل و مش عارف ايه ( مع انى حاسس انها اشتغالة ) و بالنسبة لحكاية التعليق عندى انا حاولت اشرحلك فوق اللى جاد عليه بيه ذكائى المحدود فى التكنولجيا بس على العموم الناس بتعلق عادى معرفش ايه المشكلة عندك بالظبط
بلاش حجج و أعذار وبلوجات عايزة تتقفل

Leonardo يقول...

مساء الخيييييييييييير :)

Leonardo يقول...

قوليلى ع اللى زعّلك ياشغف وأنا أروح أخرشمهولك !!

كرانيش يقول...

هى اللعبه قلبت بجد ولا ايه؟
شغف لازم تصحى بقه

شغف يقول...

ليوناردو :
شكرا بجددددد

بالنسبة للاكتئاب و ما شابه ، فاطمن أنا عندي مناعة ضد العدوى ، و ممكن أعديك بالتفاؤل لو تحب كمان ، بس هيه كانت نوبة غضب و راحت لحالها
و متهنأنيش قوي كده ، هوه المسألة إن احنا بنفترض على الأقل بعض من التواصل / الاهتمام / و الجدية بشكل ما بالنسبة للتدوين
بالظبط زي ما احنا متوقعين برضة قدر من التواصل و الاهتمام و الجدية في العلاقات الاجتماعية ، و بعض علاقات العمل ...... بس فعلا كل ده بلا استثناء ، ما هو غلا كذبة كبيرة إعتدنا على تقبلها ، و على التواطؤ معها

على فكرة ، كتير من الناس - اللي بيدخلوا عندي تحديدا - يعرفوني بشكل شخصي يمكن قبل المداونات كمان :(

كلامك واضح ، و لقطته كله تقريبا - و اللي وراه كمان -

خلاصة الخلاصة : معاك في معظم اللي قلته






تسنيم :
يفوت يا تسنيم العالم كله :( و لا تزعلى يا قمرة



ساسو :
البتاعة دي طلعت صالحة لحاجات كتيرة جدااااااااااااااااااا و الواحدما كانش واخد باله

ماشي الطريق :
ما حصلشي لسه ، صبرك شوية


محمد عبد الغفار :

بشكل عام ، مالا يدرك كله يستحق أن يترك كله ، لأن كليته جزء من أهمية وجوده
أحيانا مالا يدرك كله ، يُفقد كله

بس انت تقصد ايه بالظبط بالجملة ؟





me:
الحياة ..... أو شيء يشبهها
علينا أن نختار

و مين قاال اني هأبطل كتابة ؟




فيلم :
ايه يا عمو الكلام االكبير اللي انت بتقوله ده ؟






كرانيش:
احتمالك التاني غريب شوية ، لو حد بينسحب بس مش بهدوء ده بيبقى بيفرض وجوده مش بينسحب
فكرتني باللي بيطلق عليه " أعراض انسحاب " بالنسبة للمدمنين


احتمالك التالت بقى أغرب
انتى مش تعرفيني بجد عشان تعرفي اتغيرت و لا لأ و اتغيرت كتير و لا شوية

حتى لو كنا بنشوف بعض و بنتكلم مع بعض


الأولاني معقول


و حظ سعيد في تخمينات المرة القادمة :(







بيسوو:
بصراحة عاجبني جدااا وجهة النظر البرجماتية اللي بتتكلمي منها
أقصد يعنى تركيزك على نقطة قفل التعليقات - الجزء اللي يخصك و اللي تحسي أكنه حق ليكي و حد بيسحبه منك ، حتى لو كنتى مش بتستخدميه فعليا - باحب الناس اللي بيفكروا بالطريقة دي جدااا
بعيدا عن " حبتك و أدمنت " دي --- انتي عاوزة تودينا في داهية و لا ايه ؟





غادة الكاميليا :
look who s talking !



عنتر بن غلبان :
انت بتسمع أنغام كتير اليومين دول و لا ايه ؟
موقف ايه اللي أنا واخداه منك إن شاء الله ؟ هوه أنا باشوفك أصلا يا بني عشان آخد منك موقف ؟ ده انت حتى المداونة بتاعتك وقفتها لمدة ثم حذفت و عملتها من أول و جديد

شغف يقول...

سلامة :
يا سيدي انت حر
المشكلة كلها ان أنا كان دمي محروق أصلا من الناس اللي بيقفلوا مداونتهم ، و إذا بيك بكل براءة تكمل ع الموضوع و تقول ايه يعني ما انا كمان قفلت مداونتي

طب قفلتها اسكت ، أو ناقش الموضوع بشكل عام ، مش تحذو حذو الجانب اللي الواحد متضايق منه

على فكرة أكتر حاجة غاظتنى من قفل مداونتك ، انى كنت محتاجة لينكات المداونات الجديدة اللي كانت عندك ، و للأسف ما لقتهاش عند حد تاني غير سيادتك
الناس دي ها تبقى تدعي عليك بقى على فكرة


أريسطو :
أولا : بالنسبة لحكاية التدوين اليومي دي فرصة للتطور
من باب ان الابداع - على رأي اللي قالوا - تدريب يومي


ثانيا : بالنسبة لحكاية التعليق دي ، فمعظم التعليقات بتكون مش أكتر من مجاملة ، أو حلو ، و وحش المعتادة
قليل لما بتكون فيه تعليقات جادة



حلو قوي حكاية أول مرة في حياتك تتكلم جد دي


بالمناسبة ، طول براحتك ، الرغي هنا مباح


كائن العزلة :

من فضــــــــــــــــلـــــــــــــــــك

ابقى اكتب بالانجليزي لما العربي مش يتوافر عندك ، و مش تستخدم الفرانكو آراب الا للضرورة القصوى



فهيم :

ياااااه أخيرا بقى ليك بلوج
مبروك

بادعيلك و الله ، ع الله بس تكون انت بتعمل اللي عليك في الامتحانات

بالمناسبة، مداونتك فاضية --- هوه انت لسه مش نزلت فيها حاجة و لا ايه ؟


سلالم :(








كائن العزلة :
ههههههههههه
النت ده دماااار ، الحمد لله اني شفتك بتتكلم كده في حياتي
مش لهجة عزلة خاااالص
لهجة اللي بيخرج من عزلته - بس مش بطريقة البطل بتاعك - بجد



ليوناردو :
أنا بامسّى التماسى أجدع تماسى أحسن تقولوا إن أنا ناسى

:(




كرانيش :
صباح الخيييييييييييير بالليل