الاثنين، فبراير 05، 2007

فرحة بجد

كنت محتارة انهاردة أبتدي بايه ؟
.
أرد على تاج كرانيش عن الخمس حاجات اللي ما حدش يعرفهم عني الأول ؟ و لا آخد بتاع تسنيم المتنوع ؟
و جاتلي فكرة تانية اني أنا كمان أعمل تاج عن خمس فوائد لعمل و تمرير التاج


المهم بقى
و بما اني بقالي كتييير مش متابعة قوي ما يدور في هذا الفضاء السيبري عشان انتكاسات الجهاز المتتالية

أخدت لي لفة معتبرة

و إذا بي أتكعبل في الفيديو
ده على مداونة مالك

يا نهـــــــــــــــــــااااااااااااااااااااااااااار

هوه فيه ناس كده بجد؟
يعني أنا أحلامي عن البساطة و الصدق و الفرحة الحقيقية مش وهم

بجد بجد ، و على الرغم اني ما أعرفه
مش ، و فين و فين لما بأدخل أعدي عندهم في مداوناتهم
بس بجد حسيت بطوفان فرحة كدة لدرجة ان عنيا دمعت

و بدأت طبعا أنخور في كل التدوينات المرتبطة بالموضوع
و بقى نفسي الوقت يرجع تاني عشان أروح أحضر الفرح لايف

و اتفزعت لما لاقيت رضوى كاتبة في تدوينة سابقة "
أن تكسر فرحة أحد " " ، و افتكرت كل حالات الاكتئاب اللي مريت بيها كلما أُجبرت على حضور ما يُسمى ب " فرح " حد من قرايبنا أو زمايلنا ، و دايما نفس الفكرة تسيطر على تفكيري : " ايه التمثلية السخيفة المُعادة المُكررة بنفس تفاصيلها المملة المفتعلة دي؟"

" ليه الناس بتمثل كده ؟"
" ياترى الناس دي حاسة بفرح بجد؟"
" أنا واحدة من الناس جاية مجاملة ، و لا حاسة بفرح و لا زفت "


و حالة من الضيق الخااالص كلما ظننتُ بأحد الأصحاب المقربين -أو الذين أظن بهم اختلافاً -خيرا--، و أقول أكيد الوضع هايختلف ، لأجد انسياقهم هم أيضا لنفس الدور الباهت اللي لازم يتمثل بنفس تفاصيله ، حتى بنفس الأغاني الهابطة اللي بتتشغل في كل فرح


أنا دلوقتي فرحانة بجد
عشان حد قدر يفرح بجد و يستمتع بجد بيوم مهم جداا في حياته
عشان ما سمحش لحد انه يكسرله فرحة حقيقية قدام الحفاظ على فرحة مصنوعة لو اتبص في أصلها هتلاقيه مجرد الحفاظ على صورة اجتماعية معينة أو صورة مادية معينة

هناك 9 تعليقات:

luck0037 يقول...

hello Please try the following updated web browser,Very handy,Immediately free download!

tz198289 يقول...

hello,I recommend to you the best browser in history,I really loved it,I hope you may want to download and try. thank you.

سلامـــــــــــــه يقول...

حمدلله علس سلامه جهازك
وعودتك الحميده
والف مبروك لرضوي وعمرو
وعقبالي يا رب
.............
عزيزتي
دمتي بود

حــلم يقول...

تعرفى انى بقالى كتير عايزة ازورك
:)
الحمد لله انى لقيتك فرحانة
صدقينى اجمل فرحة انك تفرحى لحد
وتحسى بفرحة حد
حتى لو ما تعرفيهوش

عقبالك .. لو كنت لسة
وساعتها هافرحلك اكيد

بس على فكرة
انت ما جاوبتيش على ولا تاج
:)

بياترتس يقول...

دايما فى حاجه فى اسلوبك بتعجبنى متهيقلى انه اليأس بس معاكى حق المفروض كل واحد فينا يحافظ على الانسان الطبيعى اللى جواه من غير رياء رغم انه صعب حتى ولو كان الانسان اللى جواه ده يائس

غادة الكاميليا يقول...

أنا هعمل زيهم كده هتيجي؟؟؟

عمرو عزت يقول...

sha3'af

فرحنا بجد فعلا
و اكثر ما فرحني الوجود الجميل للاصدقاء
و حتي اعتذار الذين غابوا بسبب عدم ملائمة الموعد

و فرحت جدا بفرحتك لفرحنا
ربنا يديم الفرح

يا ريت كل الناس تعمل فرحها كده و تغني بنفسها اللي بتعرف و تحب تغنيه
لاني بحب جدا اقعد علي الارض و اسقف و اغني مع الحبايب

بافكر اعمل فرح تاني اعادة علشان اللي فاته الفرح
:)

كائن العزلة الكئيب يقول...

انا معرفش الكلام على فرح مين بالظبط بس أشترك معك فى عدم الراحة فى الأفراح تصورى بلاقى نفسى أكتر فى المأتم
بجد والله مش عشان الحزن ده حتى الناس بتبقى قاعدة مش فى دماغها عزاء و لا يحزنون بس جو المأتم نفسه ( هنا عندنا فى العريش معرفش أيه النظام عندكم ) بيخلينى أحس بالحياة أكتر من الأفراح

sha3'af يقول...

luckoo37
tz198289
i havent ask 4 ur services


سلامة
آآآمين لدعوتك


حلم:
هأبقى أعزمك أكيييد :)
و أدينا بدأنا نجاوب واحدة واحدة



بياترتس:
يأس؟
بقولك فرحة تقوليلي يأس؟
سلامة الشوف يا حبيبتي


غادة الكاميليا :
أنا حاجزة أصلا الحكاية دي من قبل ما همه يعملوها ، بس همه سبقوا



عمرو عزت :
ربنا يتمملكم على خير
و ما تبقاش طماع ، فرح تاني ايه ده اللي انت عاوز تعمله؟
الإعادة دي بقى ان شاء الله تبقى في أفراح الناس اللي دماغها قريبة منكم
باقي المداونين و المداونات يعني

إن شاء الله لما أبقى أفكر أتجوز أكيد هابقى أعزمكم جميعا و تشوف الإعادة يا عم



كائن العزلة :
و الله الاتنين زي بعض
تمثلية محفوظة و بيعيدوها سواء فرح و لا ميتم
الكلام على فرح عمرو عزت - اللي لسه معلق قبليك - و رضوى ، و هتلاقي لينكاتهم في الموضوع