الأربعاء، فبراير 07، 2007

تااج


و نبدأ بتاج ست تسنيم
أنا كنت ناوية أعمل زي موني و أجاوب ع التاجين مرة واحدة و أخلص ، لكن لاقيت إن البوست هايبقى طويل قوي ، خصوصا و أنا في إعتقادي إن أهم من الإجابة السبب اللي وراها غالبا
سين سؤال :

*ايه اللي هيحصل لإيميلك لما تموت؟
هوه السؤال ده كنت جاوبت عليه قبل كده ضمنيا في تاج قبل كده بس كان عن البلوج هايحصله ايه لما أموت
من الآخر يعني
التلاتة البلوجر اللي ع الياهو و الاتنين اللي ع الهوت هايعرفوا الخبر أكييد من حد م الناس اللي يعرفوني أو يقدروا يوصلولي و من ثَم يقدروا يحذفوا ايميلي من عندهم
التلاتة التانيين اللي ع الياهو غالبا واحد منهم هايفضل يبعت اوف لاين كل ما يدخل / بيدخل كل سنة مرة أصلا / و ممكن يبقى يفكر يحذفه بعد كام سنة كده ، أو يمكن أصلا هايكون عمل ايميل جديد و ينسى ده
الاتنين الفاضلين غالبا هاينسوا بالتدريج وجود ايميلي على ايميلاتهم بعد ما تطول الفترة اللي هاغيب فيها ، و بالتالي هايوصلوا في لحظة ما من الزمن انهم يبصوا للميل و يقولوا : هوه ميل مين ده ؟ ثم يحذفوه
و طبعا عمو اللي موفرلنا الياهو ماسينجر و الهوت ميل هايلاقي ان ما بدخلش على ايميلاتي فهايلغيها
و بس خلاص

اديت باس ورد ايميلك لحد قبل كده؟
لأ
*لو أه كانت طبيعة علاقتك بيه ايه؟
قلنا ما حصلش
*اسمك ايييه ؟
عبوووووود
أقصد
ياسمين
*اسم الدلع المشهور وسط اصحابك؟
بقى شغف مؤخرا :)
بس عامة نادرا ما حد كان بيناديني باسم دلع / القريبين بس
يعني سمسمة ، سوسو ، ياسمينا
*عمرك؟
24 سنة إلا شهرين تقريبا
*برجك؟
حملٌ وديع / بس ماحدش يصدق الكلمة الأخيرة دي
*مجال دراستك؟
آداب انجليزي و بأعمل تمهيدي ماجستير حاليا
*شخصيتك نوعها إيه؟
كل اللي هاقوله ان اللي العلماء قدره يكتشفوه من عقلنا 5% بس
و ال 95% منه ، و من شخصياتنا لسه مجهول
و أنا عندي ثقة كبيرة جدااا في ال 95% اللي لسه ما أعرفش عنهم أي حاجة مني دول
إضافة إلى 4% كمان ما أعرفهمش م اللي قدروا يكتشفوه عن العقل البشري
يعني عندي 99% مستنية منهم الدهشة كلها
*السفر بالنسبة لك؟
وقت لفهم الذات و فهم الحياة / و حرية و سعادة أكيد خصوصا لو لوحدي أو مع حد بيفهمني
*المود بتاعك؟
ممكن أخلقه بالشكل اللي أنا عاوزاه في الوقت اللي أنا عاوزاه
*وقت فراغك بتعمل فيه ايه؟
و ما الدنيا إلا وقت فراغ كبييييير
.
*الاكلة المفضلة؟
المسقعة
الرز بالفول الأخضر بالبيض
السمك
*الصفات اللي خدتها من بابا؟
بلاش السؤال ده
*الصفات اللي خدتها من ماما؟
بلاش ده كمان
  • *اكتر 6 حاجات بتكرهها؟
    -الكلام السلبي ( الشتيمة ، و السب بكل أنواعهم / اللوم / كلام التحقير و التصغير / كلام التحبيط و التشاؤم /
  • الدعوات بالشر و المصايب ----- إلخ ، إلخ )
    -الكذب ( بدرجاته كلها و ألوانه كلها )
    المجاملة-
    ( و النفاق تبعهم طبعا و الافتعال و أي صله متصلة بيهم )
    who tells me true , though
    in his tale lie death
    I hear him as he flatter'd
  • -السلطة المزاجية
    التي قد لا تسمح بشيء في وقت و تسمح به في وقت تاني و بنفس ظروفه المحيطة دون التزام بقواعد واضحة /( أو بالأحرى هي تخضع لحدوث ذلك الشيء دون مساءلة ) ، ( و هي نفس السلطة التي تسمح بغلبة العنصر الهمجي في المجتمع )
    و السلطة دي موجودة في كل مكان بدءا من الحارس اللي على باب الجامعة اللي بيمنع دخول اللي مش معاهم الكارنية في أوقات ، و تلاقيه بيدخل كل من هب و دب في أوقات تانية / لدكتور الجامعة / للمدرس / لرئيس العمل / لنظم التربية في البيوت و سلطة الأم و الأب / للقوانين شديدة اللهجة التي لا تطبق إلا على الضعفاء فقط
    الغباء ( اللي هوه عدم محاولة الفهم )-
    العجز-
  • الغربة مع بشر أو في عوالم بعيييدة عني كل البعد خصوصا لما يبقوا مفروضين بشكل ما على حياتي-
  • - ان الواحد يضطر انه يعمل حاجة غصب عنه ، زي ما اضطريت دلوقتي أحول لبيتا عشان أدخل البلوج بتاعي---- عاااااااااااااااا
    طلعم أكتر من ستة ؟ عادي ما حرية بقى

  • *اكتر 6 حاجات بتحبها؟
    -عمل فني يكون معمول حلوو جداا ، بابداع حقيقي و بمعايشة حقيقية ، سواء فيلم ، رواية ، قصيدة ، لوحة --- الخ
    -مناقشة ذكية مع حد ذكي
    - الكتابة و التفكير
    -البحر
  • - التمشية سواء لوحدي أو مع حد
  • - اللحظات العجيبة دي اللي ممكن الواحد يتبادل فيها ابتسامة أو نظرة مع حد ما يعرفوش و لا عمره هايشوفه تاني و مع ذلك يحس بالتواصل الانساني معاه و القرب الشديد في الابتسامة أو النظرة دي
    الحكاية دي أول مرة كانت تحصلي و أنا طالعة رحلة في أولى ثانوي ، كان بنت ماليزية تقريبا يعني م الدول دي --- ابتسمنا لبعض و حركت راسها بتحية خفيفة كده --- رجعت يوميها و أنا مبسوطة جدااا و مندهشة م الاحساس ده
    لسه الموضوع ده متكرر قريب برضة ---- يوم الأربعا اللي فات
  • *الشغل بالنسة لك؟
    بشكل عام ؟ و لا شغلى حاليا ؟
    بالنسبة لشغلي حاليا = ضيق لامتناهي ، عجز ، بطالة مقنعة ، عالم مش بتاعي و لا يهمني في شيء
    بشكل عام ، الشغل = حياة ( أفتقدها )
  • *ايه الكمبيوتر والانترنت بالنسبة لك؟
    ادماااااان
  • ألفف التاج يتهد حيله تاني مع مين ؟؟؟؟

هناك 12 تعليقًا:

Ush يقول...

لم أشعر ان اسئلة التاج " حلوة " بس كان هنالك تعليق بسيط: هلى يحق لك بعد الموت ان تفكر حتى التفكير فيما سيؤل اليه اي شيء كان يسمى " متعلقات شخصية"؟
ملحوظة:
البرج يسمى " الكبش " و لا يمت للوداعة بصلة لانه برج ناري

*تعازي القلبية للخمسة البلوجر اللى عندك على الميلز

غير معرف يقول...

تصدقي انك وحشتيني

ودمك زي العسل

وحمل وديع حضرتك
:)

ماشى الطريق يقول...

أنا متشكر جداً والله يا شغف
تقريباً دى أول مرة فعلاً حد يمررلى فيها تاج
:$
من الواضح إن الواحد لا يتمتع بعلاقات حميمية مع مجتمع التدوين
:D
بس يا ريت تعزرينى والله لأنى مليش فى موضوع التاجات ده
جديد فى الصنف الصراحة يعنى
و مش حقدر أرد عليه لأنى مبحبش موضوع التاجز ده
يمكن علشان بجربوه على كبر
:)
متشكر تانى جداً جداً
و أسف يعنى و محرج جداً منك والله

توهة يقول...

اخيراااااا شغف فى عااالم النت

welcam back

بصراحه اجاباتك مختلفه عن بقية الناس بطريقه ايجابيه مذهلة


عجبيتنى قوى السلطه المزاجيه دى وكمان اللحظه العجيبه


بس ممكن تسمحيلى اقول انتى شخصيتك ايه ؟؟

واثقه من نفسك .. تعشقين الحياة بتعمق .. بتحبى الحريه .. وهذا من خلال معرفتى القصيره بك وده مش مجامله والله لأ انا مبعرفش اجامل


وبس


تحياتى

تــسنيـم يقول...

كعادتك دائما وأبدا..
مميزة يا فندم..
حتة التواصل مع حد متعرفيهوش كانت معايا أنا كمان لو تفتكري قبل ما نحضر الأراوح ونكتشف إننا كنا إخوات في حياتنا الأخرى.

محبتي

شغف يقول...

volcano:
الأسئلة أم الاجابات ؟ أم الاثنين معا ؟ حدد من فضلك

آه طبعا يحق جداااا كمان ،
مش كل شخص هايتحاسب على كل ما كان يمتلكه هنا و ماذا فعل فيه ؟ فبالتأكيد سيحاسب على ماذا أوصى بفعله فيه عند الموت


أما بالنسبة للبرج ، ف
look who 's talking!
حمل و وديع عندا في أي حد
( واحد بيطلع لسانه )

خلي تعازيك القلبية دي لما أبقى أموت يا عمو



epithaph
:)




ماشي الطريق :
يارااااااااجل
هوه أكيد حد مررهولك قبل كده ، و رديت عليه نفس الرد ، فامتنع الجميع عن تتويجك
بس مسيرك في يوم ترد عليه
لما الأسئلة بتاعته تستفزك و تحس انها أكثر خصوصية بيك
إلى حينها إذن

شغف يقول...

توهه:
مسألة الثقة في النفس دي حاجة نسبية جداااااااا

يعني أنا عارفة كويس قوي ان الهالة المحيطة بيا بتدي حتة الثقة في النفس دي
يعني ممكن جداااا أكون بأترعش من جوايا أو متوترة أو قلقانة ، بس الانطباع اللي بديه للحواليا في نفس اللحظة اني مش هاممني حاجة ، و رابطة الجأش و واثقة جداااا من نفسي و عارفة أنا عاوزة ايه

و حتى النقطتين اللي بعد كده نسبيين برضة
يعني أه بأعشق الحياة ، بس مستعدة أسيبها أو هيه تسبني في أي لحظة و مش هايهمني - بما يخالف صفة العشق

بأحب الحرية ، جداااااا
لكن مع ذلك لازم أحس ان فيه قوانين معينة أو حدود معينة ما ينفعش تجاوزها - بما يعني حب وجود بعض القيود التي أستشعرها ضرورية لوجود الانسان و ضرورية في حياتي

كده يعني


تسنيم:
أه يابنتي طبعا ما انا عارفة
بافتكر أصلا كل اللحظات المنمنمة اللي أحيانا ما بتكملش ثانية - زي يوم الاربعا كده ثانية بالظبط
ايش حال بقى سيادتك اللي بقينا على كونتاكت معقول مع بعض؟

Ush يقول...

كلامي كان واضح..اسئلة التاج و الردود قريتها قبل كدا..بس فى زمن تانى

شغف يقول...

aha
i c

عين ضيقة يقول...

أنا ما كنتش متأكدة انك انت انت
بس بجد كنت شاكّة, والتاج أكدلى
برغم انك جايز تستغربى الا انى إجاباتك لم تفاجئنى بالمرة

تحياتى. وإلى لقاء

غادة الكاميليا يقول...

يوم الأربع اللي فات؟؟؟؟
إحم إحم مش كنا سوا برده
كويس بس تقريبا كل واحد مننا كان في وادى
وعلى فكرة جامد الحمل الوديع ده يخرب عقلك ياسمسمه دانتى طلعتى بتكرهي شغلك استنى تعالي نعمل مشروع مشترك وأحنا نحب الشغل مهو أكيد لما تشتغلي مع واحده زيي والله هشغلك مزيكا تحفه وهندى نفسنا مرتب كبير برده مهو احنا بنتعب طبعا

شغف يقول...

عين ضيقة :
طبعا يا بنتي ما الروح بتبان برضه


غادة الكاميليا :
احم احم
أيوة كنا مع بعض و كنا عمالين نتكلم كمان
مش قلت لك الحكاية ما خدتش غير ثانية خاطفة بس؟
بالنسبة لنقطة الشغل ، فأنا بأحاول أفكر في الموضوع كله من منظور تاني خاااالص دلوقتي