الأربعاء، فبراير 28، 2007

إجابة التاج التمهيدي


نرجع بقى يا جماعة للي كنا بنقوله

1- هل تسعد عندما يمرر لك أحدهم تاجا ؟
غالبا أه
بالذات يعني لو التاج حلو
بس ساعات بأحس انه حمل أكتر منه حاجة مفرحة و ده في حالة لما أكون مهتمة بحاجات تانية و عاوزة أكتب عنها ، و حاطه التاج في قافلة انتظار
فباحس بالخنقة و الحمولة و كده يعني
و الاحساس ده مش خاص بالتاجات بس ، لكن منسحب على كل مشاريع الكتابة المؤجلة عندي
هل مقدار سعادتك أو شعورك أيا كان - عند تمرير التاج لك يختلف حسب المدون الذي يمرر لك التاج؟2
أكييييييييييد
بصراحة يعني ، فرحتي بتزيد لما اللي بيمررلي التاج يكون حد ما أعرفوش بشكل شخصي
يعني لما فيلم مررلي تاج مرة كنت هأطير م الفرح
و فرحتي بتزيد ، لو اللي بيمررلي التاج ما أعرفوش لا بشكل شخصي و لا فيه تواصل بينا في الايميلات مثلا
3
- هل ترى للتاج أهمية حقيقية ؟.
و الله في البداية ، كان لأ -- لأن طبيعة الأسئلة من نوعية الساعة كام دلوقتي ، و ايه قدامك ع الحيطة و كده كنت حاسه إنها يعني مش ليها لزمة
لكن فيه تاجات بأحس ان أسئلتها جوهرية - زي أسئلة الخمس حاجات ده ، و زي تاجات برضه عن أهم الأشياء التي تخطط لفعلها ، ايه الأسباب اللي تخليك تحب الدنيا ، و كده
التاجات اللي تحس إنها بتساعد جداااا في إن الواحد يعرف نفسه أكتر من ناحية ، و توضح صورته بشكل أكبر في المجتمع التدويني
و حتى بالنسبة للناس اللي يعرفهم
يعني التاجات - و التدوين عامة برضة - بيلقي أضواء تانية خااااااااالص على شخصية الفرد
و ده حصل مع أكتر من شخص ، زي ما حصل مع كائن العزلة مثلا ، اللي بأحس ان التدوين إعادة اكتشاف له
و التاج اللي شغال فيه دلوقتي أكبر دليل على ده

4- هل فكرت في عمل تاج خاص لك من قبل؟
هذا التاج دليل على ان أي نعم

5- هل تفضل قراءة أجوبة التاج عند المدونين الآخرين ؟ أم لا تهتم سوى بالتدوينات الأخرى فقط؟
في الأول ، كنت لما بأشوف تاج غالبا بقرا الأسئلة و إجابة أحدهم عليها ، ثم لا أهتم بمتابعة هذا التاج لو وجدته عند آخرين
لكن دلوقتي الوضع اختلف لاحساسي بأهمية التاج في الكشف عن أجزاء من شخصية المدون ، و الأهم الكشف عن أسلوب تفكيره
و الأهم من هذا و ذاك الكشف عن طرق حياة الآخرين و تجاربهم و الاستفادة من بعضها
6- عندما ترد على التاج ما الذي تراعيه أكثر :
الصدق - الافاضة في الشرح - الاختصار الذي يهدف إلى مجرد ملو خانة دون توغل في العمق - الاجابة الظريفة التي تزيد من شعبيتك التدوينية - محاولة الاجابة بطريقة تختلف فحسب عن كل من رد على التاج من قبل - التقاط خيوط ما كنت تريد الحديث عنها من قبل و محاولة الاجابة عليها في التاج - التأكيد على صورة معينة تريد رسمها عن شخصيتك الافتراضية في ذهن قارئك - الهروب من أن يعرف أحدهم عنك معلومات حقيقية
هوه تلات حاجات أهم بالنسبة لي : الصدق- الافاضة في شرح ما أعنيه - و أحيانا التقاط خيوط ما تمس تركيز تفكيري على أشياء بعينها لمناقشتها
لأن زي ما قلت : التاج بأخده كمحاولة لتفسير نفسي أكتر و معرفتها

8-إلى من تحرص على تمرير التاج :
لا أحد - أصدقاءك - أصحاب المداونات التي تحرص على متابعتها - مداونين تشعر أن التاج يلائمهم و قد يستفز منهم اجابات مميزة - مداونين تبدأ في التعرف إليهم
يمكنك بالطبع وضع إجابتك الخاصة
غالبا ، مداونين أشعر ان التاج يلائمهم و هايطلع منهم شيء مختلف
أو لاني عاوزة أعرف رأي المداونين دول تحديدا في هذه الأسئلة تحديدا

9- هل تحرص على قرائة اجابات من تمرر لهم التاج ؟ و هل تغير إجابتهم للتاج شيئا في ادراكك لهم ؟
أه طبعا ، حتى لو ما علقتش
أكيييييييييد ده بيغير في توقعاتي بالنسبة لشخصياتهم في أجزاء معينة على حسب اجابتهم
10- هل تلتزم حرفيا بأسئلة التاج ؟
ههههههههههه
بأقعد أحلل فيها ، و أقول ايه اللي ممكن يكون مقصود منها ، و إيه اللي ممكن تعنيه ، و في الآخر غالبا بأجاوب على مزاجي ، مع الالتزام بالطبع بحدود السؤال العامة
11- ما هي نوعية التاجات التي تفضلها ؟
التاجات اللي بتسأل في حاجات جوهرية ، و في أسئلة فيها وجهات نظر
و غالبا الأسئلة المنظمة بتاعة قول ( ) حاجة كسبب ل ( كذا )
و طبعا الأسئلة اللي بتكشف عن المكنونات النفسية للفرد
- ايه الكلام ده ؟-
نهايته
12- اختر عدد من المداونين للاجابة على هذا التاج
انظر الإجابة السابقة عند صنع التاج

هناك 8 تعليقات:

تسـنيم يقول...

إجابة التاج التمهيدي ( وش متنح) ليه هو فيه تاااج أساسي جاي في السكة ربنا يستر ويبعدنا عن سكته.

بالنسبة للي قولتيلي عليه على اللإيميل عُلم وجاري التنفيذ إن شاء الله.

محبتي

syzef يقول...

يخرب بيت أغنيتك
روعة روعه روعه لابعد الحدود
دي احسسن حاجة دخلت عملتها النهارده لني دخلت سمعت الاغنيه دي

عين ضيقة يقول...

كالعادة

إجابات متزنة

كائن العزلة الكئيب يقول...

ايه ده هو انا بقيت مثل يضرب بيه
قصدى بقيت يضرب بيه المثل
عموما مبسوط انك متابعة ردى على التاج فى مدونتى و مشكلة اللى أنا بعمله أنى عايز أرد بطريقة ادبية أى أستغل التاج كمحفز على الكتابة

Sokomonoce يقول...

فعلا واضحة وصريحة وكمان محاورة جميلة(بينك وبين نفسك) لانك واضح قبل ما كنت بتكتبى الاجابة كنت بتسال نفسك الاول

dandana يقول...

يعنى ايه تاج تمهيدى ....

فيه اساسى بقى ولا ايه...

مفكرانى بالبث التجريبى بتاع القنوات...

بس لذيذ...انا استمتعت بيه ..خصوصا انى اول مرة ادخل هنا...محتاجة اتعرف يعنى

تحياتى

سجين فى قلب الوطن يقول...

أعتذر عن هذا التعليق مقدما

أقتراح لقاء شهرى لمدونى الأسكندرية
http://misryawey.blogspot.com/2007/03/blog-post.html

شغف يقول...

تسنيم :
أيوة يا بنتي ، التاج ده بيتهيألي تمهيدي لأي تاج تاني ، لأنه بيتعامل مع فكرة التاج في حد ذاتها ، و عشان كده عملته

تمام جدااا



سيزيف :
هههههه
أه لو تعرف الخناقة اللي عملتها مع عنتر بن غلبان على الأغنية دي !! ابقى اسمعها و شوف غنا عايدة الأيوبي ليها و تدخل في الخناقة انت كمان



عين ضيقة :
كالعادة
ما قل و دل
:)


كائن العزلة :
واخدة بالي جداااا
و هأقلدك كمان :)

سوكمونس :
على فكرة ده اسم الدلع لابن خالتي الصغير

المهم ، أه طبعا



دندنة :
اقري ردي على تسنيم
و ردي عليكي في البوست اللي فات

و أنا كمان على فكرة







سجين في قلب الوطن :
اسمك كارثة
لكن ما علينا
ولا يهمك أولا
ثانيا ، شيء كويس يعني ان الواحد يعرف التطورات اللي بتحصل في المجتمع التدويني
ثالثا : لما أجي اسكندرية إن شاء الله ، أكيد هأبقى أحضره
أنا م الزقازيق يا باشا
و نحن و لله الحمد اجتماعتنا موجودة و مستمرة من قبل ما يخترعوا التدوين أصلا