الثلاثاء، يوليو 10، 2007

سعيٌ حثيثٌ نحو الفرح

لسه راجعة حالا من فرح
أه فرح و النعمة
هو صحيح من أقوالي المأثورة " أنا أحضر ميتم ، و لا أحضرش فرح " ، و غالبا كل فرح باكون قاعدة فيه بأكون قاعدة و أنا متضايقة جدااا
لكن حصلت ، و حضرت فرح / ناس جيرانا أصلا ما أعرفهمش / و رجعت مبسوطة جداااا

أول فرح في حياتي أحضره بالرقي ده --- من غير العنب العنب ، و الحنطور ، و سيد يا سيد و من غير ابتذال الآنسات المحترما ت المعتاد و حلبة الفرح المعتادة ---- إنما خير اللهم اجعله خير : علي الحجار ، منير ، و فيروز ، و فرقة استعراضية لطيفة جدااا من الأطفال – ممكن نجادل شوية في مسألة عمل الأطفال دون السن القانوني ، و سهرهم لوقت متأخر و كده – بس ده ما يمنعش إن اليوم كان لطيف جدااا
و كنت بأفكر : لو كل واحد في الدنيا يعمل شغله بتميز و يحط عليه بصمته الخاصة - مهما كان الشغل ده - فاكيييد الدنيا هاتتغير كتيير
و فكرت كمان إن كل ما شغل الواحد يبقى عادي و متماس مع الحياة اليومية ، كل ما بصمته فيه تظهر أكتر

" شكرا
أول فرح أحضره و أستمتع بيه في حياتي كلها
شكرا على العروض الجيدة
و على الأغاني غير المبتذلة "

اترددت شوية في اني أدي الورقة دي للقائم ع الدي جي
بعدين حسمت أمري : كل حاجة حلوة أسعدتنا و لو للحظة محتاجين اننا نقولها " شكرا " و اننا ندعمها و نقول " هل من مزيد " ليها
ليه نسيب الناس اللي بتفرض ذوقها السيء و تدعمه من غير ما نعمل احنا حاجة للحاجات اللي بنحبها ؟ ليه بنساعد في نشر الحاجات السيئة سواء بموافقتنا الضمنية / لما نسكت عليها / أو بالتطبيع معاها ساعات / أو حتى بإعطاء اهتمام ليها و لو في صورة انتقاد و تريقة ؟

كنت لوحدي
و يمكن ده اداني دفعة ، و قبل ما أمشي بالظبط ، اديتله الورقة المقفولة – اللي استقبلها بدهشة – و مشيت

هناك 20 تعليقًا:

21arestoo يقول...

المفروض ان الفرح دا هنا في الزقازيق
علي الحجار بقى ومنير وفيروز
؟؟؟؟؟؟؟؟
على فكرة الحكاية غريبة جدا لدرجة اني مش قادر اتخيل اي حاجة يعني مش قادر اتخيل فرح والراجل بتاع الدي جي مشغل في قلب الليل او شجر اللمون او امس انتهينا مثلا والناس قاعدة طبيعية جدا وكدا


كل اللي اقدر اعملو اني احقد عليكي
دا بجد

على فكرة انا كمان كنت في فرح من يومين كدا رحت طبعا وياريتني سمعت اغاني العنب والبلح والكلام دا
الموضوع كان فظيع جدا لدرجة ان الراجل شغل اول اغنية الدنيا خربانة وبعد كدا -وركزي في الاسم اوي- اغنية اسمها مولد الزوجة الخاينة ودا والله كان فرح برضو

يلا يظهر انها ارزاق

تحياتي لجيرانك العقلاء

سلامـــــــــــــه يقول...

هو انا مسمعتش كلامك وجيت معاكي ليه؟
هو مش انتي طلبتي مني ده برضه ولا انا بيتهيالي؟
علي العموم
دمتي بود

lastknight يقول...

أذا .. حين توفر الوعى كما لجيرانك أصحاب الفرح .. تحركت الأراده لتصنع حدثا جميلا راقيا خالى من القبح .. أعتقد الفرح كان نموذج للتطور الممكن أذا ماتوافر الوعى .. الأراده الشعبيه موجوده .. لكن الغائب هو الوعى .. أظننا متفقين
بانتظار تشريفك لمدونتى .. أتمنى الحصول على تعليقك على آخر موضوعين

عدى النهار يقول...

إحنا خبراء فى التعبير عن مشاعرنا بصورة مبالغ فيها جداً سواء كانت فرح أو حزن

يبدو إن الفرح دا خالف القاعدة فعلاً

IRC President يقول...

بجد أنا مبسوط قوي من الفرح ده

خاصة إني كنت ليا حاضر فرح إمبارح من النوع الثاني :D

شغف يقول...

shأريسطو

تخيل بقى ؟
في الزقازيق
لأ و كمان أصلا مش في حتة فخمة و لا يحزنون ، و لا في نادي الشرطة و لا في القومية و لا في الحتت دي
كان في قاعة ناحية بيتنا

بس طبعا لأنه فرح فمش معقول الراجل يشغل الأغاني اللي انت بتقول عليها دي
يمكن دي المشكلة أصلا
إن الانطباع السايد عن فيروز و منير و العالم دي ان ليهم جو هادي أو سوداوي أو كلاس و بس

مع إن ليهم أغاني لايت كتير تنفع

يعني مثلا همه بدأوا بأغنية : " أدي الزين و أدي الزينة " --- أغنية فرح تماما أهيه لعلي الحجار

شغلوا سهر الليالي لفيروز

سو يا سو لمنير
و هكذا

مع فرقة الأطفال الاستعراضية اللي قلت عليها
إضافة طبعا لأغاني سلو العريس و العروسة رقصوا عليها مع بعض - لناس ما اعرفهاش - بس كانت حلوة برضة


لعلمك أنا عاملة لستة أغاني تمام لفرحي - ده لو حصل طبعا في يوم من الأيام - و كلها برضة لأم كلثوم و كاظم و فيروز و منير و كده يعني


هوه المهم ازاي تختار و ازاي تعمل السياق المناسب اللي تعرف تمرر من خلاله الجو اللي انت عاوزه



أما الأفراح من نمط اللي انت بتقول عليه ده ، فأنا اتفقعت مرارتي في أفراح زيها كتييييييييير ، و للأسف الشديد كانت أفراح ناس قرايبنا

صحيح كنت بأتسلل أروح أتمشى في أي حتة و أرجع تاني قرب النهاية كدة ، بس برضة كنت بأسمع من الغباء ده كتييير



و تحياتي لأصحاب قاعة الأفرا ح اللي بيفهموا

شغف يقول...

سلامة :
بيتهيألك :-P ( واحد بيطلع لسانه )

اللي مش رضي هوه سمر يا باشا




الفارس الأخير :

يا عزيزي
الوعي كان خاصا بأصحاب القاعة أنفسهم الذين أرادوا صنع بصمتهم الخاصة المتميزة عن الآخرين لا أكثر


جزء ٌ من الشعب ؟
نعم ، مثلما نحن جزءٌ منه
و السؤال الآن : كم من هذه الأجزاء ننتظر أن تتجمع لتكتمل الصورة ؟



التطور الممكن أعتقده ممكنا بقيادة واعية لمن في يده أي أمر من الأمور

ممكنا بمحاولة أن تزيد وعيا هنا أو هناك

ممكنا بمحاولة أن تجعل الآخرين أكثر ثقةً في أنفسهم و أكثر رغبةً في الحياة كبشر

الوعي هو المحرك الأول للارادة

خاصةً ذاك المتعلق بذاتك و وجودك ، وعيك بمتطلباتك ، أحلامك ، حقوقك ، واجباتك ، مستقبلك


و هل الوعي شيٌ هين ؟



عدى النهار :
احنا خبراء في ابتذال مشاعرنا سواء كانت حزن أو فرح ، و تنميطها بشكل مزري




irc president
ايه ده ؟ أيرك عندنا ، يا مرحبا يا مرحبا

منور البلوج بجد بجد يعني

نهى جمـال يقول...

فرح على فيروز ومنير

والحجار

وفرقة طفولية تستحق بسمة على الشفاه

يبقى فرح رائع جدا
رغم عدم قدرتي على ايستعابه إلا أني حلمت بفرح

قريب من هذا
على أنغام الشعر وفيروز لعشقي لها
وطبعا البقية اليستحقوا الاستماع وليس بعرور باشا والأخ الضغير

لكنه حلم

بصدق أسعدني البوست أن هناك تغير في بقعة ما في أراضينا

عقبال البقية

شكرا لبوست لا أعلم لم ؟
لكنه رسم بسمة رضا على شفاهي بصدق
كنت أحتاجها من فترة
شكرا لكِ

االجحيم هو الحقيقه يقول...

جميل اننا نشوف الاشيا ء الجميله ونميها ونشجعها
سلا م
السلا م عليكم الا ول

ابن فطومة يقول...

يا في فرح زي ده في مصر وفي حتة عادية كمان. ده أنا سيبت بيتنا يومين ورا بعض هروبا من التلوث السمعي.

ردا على سؤالك بتاع تدوينة "هل يملك النهر تغيير مجراه؟" أنا كنت أقصد بالضبط اللي انتي عملتي وانتي ماشية من الفرح . أقصد إنهم يستمروا في مقاومة اليأس والتشبث ببصيص الأمل. وبجد أحييك على الإيجابية دي.

كرانيش يقول...

اه ياختى انتى رحتى الفرح واتبسطى
وسبتينا احنا منكدين


بصراحه شديده


انا بحقد عليكى
هه بقه

شغف يقول...

نهى جمال :
:)

و شكرا لكِ أنتِ أيضا ، على
winter sonata
ع الأأقل


الجحيم هو الحقيقة :
و كيف يكون ذلك و اسمك جحيمٌ ، و ينسب ملامحه للحقيقة في ذات الوقت ؟


ابن فطومة :
شكرا يا فندم



كرانيش :
انتم اللي منكدين على نفسيكم يا قمرة من غير داعي
مش قلت لك تيجي معايا الفرح ؟ مش كان يبقى أحسن ؟

كائن العزلة الكئيب يقول...

ألف مبروك الأول
ثانيا لأنا أشاركك و الجميع اظن الخنقة من الأفراح بس أنا بتخنق من الفرح نفسه سواء مشغل العنب أو السيدة فيروز المهم أنك أنبسطتى

Dananeer يقول...

لا افراح و لا غزا

اللهم كتر افرحانا اللى من النوع ده
انا كمان باحس باستغراب من طقوس الافراح العجيبه
و ازاى بنتحول كلنا لقطيه بيجعر و يتطنطط

و الله عايزه ارد على تاجك
اكتئاب بقى على نت بايظ معلش
حاحاول

شغف يقول...

كائن العزلة :
ياااااااه
فينك من زمااان يا بني
الناس كلها سألت عليك


دنانير :

براحتك يا قمرة ع التاج خالص
و على فكرة من مميزات التاج ده انه بيطلع الواحد من الاكتئاب
حاولي تكتبيه حتى لو على الورق
و بالمناسبة يظهر إن فيه وباء عام منتشر مبوظ الأجهزة كلها و الوصلات و كده

syzef يقول...

اريسطو كلمني من وقت كبير ع البوست ده وكنت سعيد جدا جدا جدا

ومن سعادتي يومها قررت اني اعمل شئ من اللي انت بتقولي عليه ان احنا نقف ادام الموجه اللي غرقت الدنيا حتي بكلمه..وقررت بشجاعه اني افاتح اصحابي واحكيلهم ع البوست وع الفرح مع اني عارف رد فعلهم مسبقا..وطبعا اللي توقعته لقيته من اتهامات الجنون المعتاده علي لسانهم واللي اعتادتها وداني وانا اسف ياشغف اتهامات الجنون المرة دي ماكنتش ليا لوحدي

بس انا طبعا مش هضعف ادام اتهاماتهم الساذجة واتراجع عن سعادتي الغامرة واعتقد انك انت كمان هتستحملي اتهاماتهم معايا ..عشان نسعي سعيا حثيثا نحو الفرح

امرأة تقول الذي لا يقال يقول...

الله بجد اديتيني أمل
أول مرة أدخل عندك ولقيت موضوع شاغلني جدا
بس أنا عايزة أعرف منك بعد اذنك رد فعل الناس
يعنى هل اتتريأوا هل اتبسطوا هل زعلوا كده يعني
وهل المدعويين رقصوا على الاغاني دي؟؟؟

لك مني كل تحية

AZ يقول...

عامله ايه يابنتى؟؟ ليكى وحشة
ابقى اسالى :)

غير معرف يقول...

هيّ نوبة الكسل وصلت عندكم الشرقية ؟



leo مشاكل فى الإكسبلورر !!

شغف يقول...

سيزيف :

الجنون فنون
كانوا بيقولوا كده زمان في الشرق الأوسط
يعني مش تهمة أصلا عشان نتبرأ منها
شرف لا ندعيه

هوه على اي حال
ما ينفعش أصلا انك تتكلم عن أفكارك - ده اللي اكتشفته مؤخرا - و تشرحها لناس بينك و بينهم مسافات بعيدة

لكن لغة الفعل هي ما ينبغي لها أن تفرض نفسها

يعني لو اتكلمت نظري كده عن حاجة شايفها جميلة ، فغالبا ماحدش هايصدق خصوصا و انها مختلفة عن المألوف الذي يعد جميلا في العرف العام
لكن لو نفذت حاجة ، و خليت الناس تحس انها جميلة ، فساعتها بس الناس هاتقدر تسمعك من غير ما تتكلم و لا كلمة



المهم الاصرار على موقفك عند الفعل ، خاصة اذا كان يخصك حدك غالبا / بأفكر نفسي معاك




امرأة تقول الذي لا يُقال :

للأسف ما كنتش أعرف حد في الفرح عشان أبقى متماسة مع ردود الأفعال
بس هيه لاناس عامة كانت قاعدة عادي
فيه ناس كانت منسجمة

طبعا مش فيه حد رقص بمعنى الرقص المعتاد ، هزات خفيفة للراس من حين لآخر
كانت المنصة مشغولة بفرقة الأطفال أصلا



az
وحشة قوي يعني ؟
:)




غير معرف :
أو ليو - اذا كان هذا هو اسمك -
مش نوبة كسل
و لا مشاكل في الاكسبلولر
مشاكل في الجهاز كله و انت الصادق ، لم تحل الى الآن