السبت، أغسطس 11، 2007

ماذا و لماذا و متى -- أسئلة تستحق التفكير

هوه مش عارفة هل من المفروض اني أكتب قراراتي للفعل و لا أقوم بيه و السلام ؟
يعني مش عارفة ان كان الكلام أصلا اللي هاكتبه هنا له أهمية و لا لأ
بالنسبة للي بيقراه طبعا ، بالنسبة لي فله أكيد
هيه المسألة متعلقة باللي الواحد بيعمله هنا
تحديدا --- لما لفت نظري حوار دار بين بعض الأصحاب المداونين عن الناس اللي ليها أكتر من مداونة
قال واحد منهم بهزار : فيه ناس بيبقى عندها خمس ست بلوجات ، واحد في العاشر و التاني في القاهرة و اتالت ---- و يبقوا يفتحوهم على بعض بقى
و ضحكنا كلنا
بس النقطة اني لاقيت الوضع مزري جدااا ان الواحد يعمل اكتر من بلوج ، و طبعا مش مدي ولائه ليهم بنفس القدر من ناحية ، و بيتعب اي حد عاوز يقتفي أثر كتاباته من ناحية تانية
لاقيت نفسي بازهق بسرعة لما أدخل على بروفايل حد و ألاقي له أكتر من بلوج
و لاقيتني طبعا واقعة في نفس الورطة : مخططات لأكتر من مداونة ، و عدم متابعة جادة ليهم كلهم في الكتابة ، ده غير إني حسيت أصلا اني ما باقدمش حاجة ليها قيمة مع ده كله --- مجرد بلوجات كتيره على قلة فايدة
و كان قراري كالآتي : غالبا إن شاء الله هألغي البلوجات كلها فيما عدا البلوج ده ، و لأني من أنصار ان ماحدش يحذف شيء كتبه مهما كان ، فبالتالي هأضطر إني أنقل بعض الأشياء اللي اتكتبت ع البلوجات دي بتعليقاتها لهنا من فترة للتانية ، خصوصا مع وجود خاصية التصنيف في بلوج بيتا -اللي كنا بنتأمر عليه قبل كده-
فهاقدر أصنف كل كتابة تبع الغرض منها بدل كترة البلوجات و وجع الدماغ و كذلك الحال سيكون إن شاء الله بالنسبة للبلوج المنحوس الخاص بحل المشاكل / أعلم تماما أني السبب الرئيسي في عدم إعطائه المصداقية الكافية /
و أصلا أصلا --- مسألة الكتابة هنا محتاجة شيء من إعادة نظر
بيتهيألي كتير من الناس ملاحظة التشابهات العجيبة اللي بقت بين المداونات و بعضها ، في الشكل و الأسلوب و نوعية الأغاني حتى اللي بتتحط عليها
أفتكر كويس قوي النشوة اللي كنت بأحسها أول ما عرفت موضوع البلوجز ده و أنا عماله أتنقل من لينك للتاني و كأني مع كل صفحة أفتحها بأفتح عالم تاني مختلف عن سابقيه ، و أفتكر كويس جدااا لدلوقتي أول بوستات قريتها في البلوجات اللي وقعت عليها أياميها كانت ايه ، و انطباعاتي عنها كانت ايه
دلوقتي كل ما كان متميزا صار معتادا أو أقل ، صار مكررا
ما كان ابداعا في لحظة صار تشابها و نسجا على أنوال الاخرين
حتى طريقة التعبير عن الحزن ، الشجن ، الجنون ، الغضب و السخط
أنا مش بألوم على حد في حاجة على فكرة ، كل اللي بأعمله إني بأوصف واقع مش أكتر
و تساؤل مش لاقياله إجابه لحد دلوقتي : هل واقع التدوين هو ما اختلف حقا ؟ أم رؤيتي له هي ما اختلفت ؟
هوه في كل حال ، كل واحد بيبص لهذا الفضاء المتاح نظرة مختلفة جدااا عن التاني
و يمكن أصلا كتابتنا هنا تبقى نوع من توكيد الذات و إعطاء معنى ما ليها / مش أكتر /
ملحوظة تانية : اسمي شغف - في البطاقة التدوينية - و هو ما صرتُ أفتقده حقا
الشغف - في نظري - أحسن شعور في الدنيا ، و الحاجة اللي بتخلي الواحد يحس فعلا انه عايش
انه يحس بذاك الشعور المتوهج تجاه الأشياء ، الأشخاص ، الحياة
و يمكن لو حد عاوز يعمل فيا جميل فهوه انه يرجعني للحظة شغف عشتها تجاه شيء ما ، أو يهديني شغفا جديدا
حاجات قليلة هيه اللي بتوصلني للاحساس ده على اية حال
و اكتشفت بقى إن غالبا كتابتي هنا لا تحمل من الشغف إلا القليل
حسيت اني بأكدب بشكل ما
شغف لا تحمل شغفا ، لا تبدي شغفا ، لا تمثل تلك الحيوية و التدفق و التوهج لما قد يعنيه الشغف
على فكرة مش في الكتابة بس ، أكيد في الحياة كمان
الحاجات الكتيير اللي بأقول اني بأحبها و بأشغف بيها ، مش بأحاول أوصلها أو أبقى على اتصال بيها /إلا لو جت هيه في طريقى بالصدفة ، ساعتها أفتكر ان الحاجة دي بأحبها جدااا و إنها بتعني ليا الكتير جدااا
مش عارفة فعلا المشكلة فين بالظبط ؟
المهم بقى ، بأفكر إني أغير اسمي عشان ما أحسش اني بأكدب
و للأسف مش هأقدر برضة أمضي ببساطة كده : ياسمين -- حاسة برضة ان الاسم مش بيمثلني قوي على الرغم انه اسمي المفروض
بست بقى
فعموما ربنا ييسر كده و نحاول نعيد حسابتنا في موال الكتابة ده كله كده ، و إن كنت توصلت بشكل ما لشبه قرار مبدئي فيما يتعلق بنوعية الكتاية اللي المفروض تتكتب هنا
و حتى ذلك الحين ، هأبقى انزل بقى من البلوجات المأسوف على شبابها اللي هاحذفها دي

هناك 6 تعليقات:

كرانيش يقول...

قرار جيد بحييكى عليه
تصدقى انا عمرى مافكرت اعمل بلوج تانى ليه وكمان فردى
مش عشان دى حاجه عيب لاسمح الله بس عشان انا مش ملاحقه عالبلوج بتاعى فازاى هتابع بلوجين او اكتر
واقدر اغزيهم بنفس المستوى

انا معاكى جدا فى قرارك

عين ضيقة يقول...

فكرة البلوج اساسا عشان يبقى عندك مساحة حرة تقدمى فيها اللى انت عايزاه وانا مش شايفة ان البلوج الواحد مش كفايه بالعكس
هو بيديكى فرصة اكبر للتواجد من منطلق واحد اللى هو انتى وفكرك ايا كان الفكر ده

أما ف نوع الكتابة وايه تقدميه وايه لأ فده شىء يرجعلك

فكرة التشابه بقى
انا مش شايفة انها لحد كبير ومزعج كده

فيه ناس كتير بتقدم حاجات جديدة ومختلفة

وعموما القرار يرجعلك

شغف يقول...

تمام كده

غير معرف يقول...

رغم أنى لا أمر كثيرا ، و لاأميل للتعليق ، ورغم أننا منذ أيام قليلة، تحدثنا بهذا الشأن، ورغم بعدى عن عالم التدوين. لكنى أردت أن أقول لك ثانية، أن كل هذه الأسئلة صحية جدا.. وأنه لا بد من التوقف قليلا، لننظر تحت أقدامنا، وراءنا ، و أمامنا أيضا.. لابد من إيجاد بداية جديدة فى نفس الطريق. أما عن الشغف ، فلا شئ ثابت يا عزيزتى "شغف" فلا بأس من بعض التساؤل، التردد،و الاحباط أحيانا..ولا بأس بالتراجع عن أشياء فى نهايتها متغيرات ،لكن لا يمكن أن نترك أنفسنا تدور فى نفس الأسئلة المفرغة، ونستسلم لانفصالنا عنها..وكل هذا يمر وينتهى ببداية جديدة وشغف جديد. حاولى معرفة نفسك أكثر. بشئ من التسامح، لن تجدى الأمر كارثة كما تتوقعين..
شيماء عزت

شغف يقول...

لم أتوقع كارثة على أي حال
على العكس تماما
أتوقع ، و أعرف جيدا
أن " أهم مما قد مضى ما سوف يأتي " ، و اجد هذه التساؤلات و هذه الوقفة صحية جدااا - أنا أيضا - و في مكانها ، و أجدني في حاجة لها

و رغم كل " رغم " اتك ، إلا أن الفضاء العنكبوتي سعيد بوجودك عليه

AZ يقول...

"مداونه" !!!!!!!!!!!!!!!!!!
هههههههههههههههههههههههههههههههه
اول مره قريتها فى مكان تانى كان فى خناقه واسترعت انتباهى وعلقت عليها
ودلوقتى لقيتها هنا واسترعت انتباهى وبعلق عليها برده