الأربعاء، فبراير 20، 2008

شيء مفقود (2)



هاى شغف


الأول أحب بجد أشكرك على الرد


بالنسبه للأسئلة اللى سألتيها أحب أجاوبك :

أنا أكبر إخواتى


عندى أخ أصغر منى بسنة وأخت أصغر منى


أنا والدى أستاذ بالجامعة ووالدتى مدرسه ثانوى


على طول فى مشاكل فى البيت

لأن بابا بيحب المثالية فى كل حاجة ومش بيقبل الأخطاء ، علشان كده صعب انك ترضيه على طول

غير انه عصبى جدا


ماما بأه طيبة جدا وسلبية جدا

فى الكلية انا صاحبت ناس كتير

هما طبعا اللى بدأو معايا عشان طبعا بنت الدكتور

كانوا ولاد وبنات ، وكانوا مصاحبنى مصلحة ، ولما ماستفادوش منى فى حاجه حصلت مشاكل وسبتهم

وصاحبت ناس تانيه

بجد البنات محترمين وكويسين وبيحبونى

بس المشكله مع الولاد


على الرغم إنى حلوة شوية يعنى وستايل ، عمرى ما حسيت إن حد معجب بيا او مهتم بيا

فى ناس بيقولوا انى تنكة ومغرورة ، وفى بنات بتقول إنى مبعرفش أتعامل مع الأولاد كويس

لانى بفهم فى الكورة وبتكلم عليها كتير

كمان بيقولوا إنى مش رقيقة

مبعرفش كمان آخد على حد بسهولة حتى البنات


السنة اللى فاتت كان فى واحد برضو من زمايلنا شوية عاجبنى ، ولانى طيبة وهبلة زى ما بيقولوا عليا حكيت لواحدة كانت صاحبتى ، وبعدين اتصاحبت عليه اوى فقالت له (ن ) معجبه بيك قال لها لا أنا متاكد انها مش معجبة بيا ولا حاجة


حتى لما بكون بعز حد عادى مش بعرف أعبر عن ده

وكتير بكون عدوانية أو سلبية قوى ، ومش عارفة ليه

الأيام ديه أصبحت عديمة الشخصية ومش عندى ثقة فى حد ولا فى نفسى

وفى الاخر أحب أشكرك طبعا

( ن )


******************

أهلا ( ن )

عاوزة أسألك

/ و معلش استحمليني ، لأن أسلوبي بيعتمد على إني أسأل أكتر و أجاوب في الآخر

ده لو ما اكتشفتيش الجواب بنفسك من خلال رحلتنا مع بعض
/


انتي في شخصيتك تفتكري تشبهي والدك أكتر ؟ و لا والدتك ؟

و علاقتك ايه بوالدك ؟
هل بتتعرضي للانتقاد منه دايما مثلا ؟

و لا انتي شبهه ، و عشان كده أقل من اخواتك عرضة لده ؟

********************

بالنسبة لإحساسك إن عمر ما حد أعجب بيكي

هل الإحساس ده موجود بعد ما دخلتي الكلية بس ؟ و لا من قبل كده ؟ من امتى بالظبط ؟

بالنسبة للناس اللي بيقولوا عليكي مغرورة و مش بتعرفي تتعاملي

ناس زي مين مثلا ؟

صحباتك ، و لا مجرد زملا ، و لا قرايبك ، و لا حد من والديكي ؟

و ليه ؟

يعني موضوع الكورة ده مش سبب ، أنا أعرف بنات مهتمة بالكورة و بتتكلم عنها بحماس ، و مع ذلك كان ده من ضمن الأسباب اللي مخلية الولاد يعجبوا بيهم مش العكس

*****************************

فيه حاجة لفتت انتباهي في كلامك و عاوزة أنبهك ليها

احنا عمرنا ما نكسب ود الناس بمحاولة اننا نكون رقيقين معاهم أو دمنا خفيف
لأننا لما بنحاول نعمل ده عن قصد بيطلع مفتعل

و حتى الناس اللي بنحاول ناخد عليهم بسرعة ، بكده نفسه بندمر علاقتنا بيهم قبل ما تبتدي

فيه مثل بيقول

easy come , easy go

يعني اللي يجي بالساهل يروح بالساهل

و انتي مش محتاجة حد يعجب بيكي عشان حاجة بتفتعليها

انتي محتاجة حد يعجب بيكي زي ما انتي

و يعجب بصفاتك انتي و شخصيتك

فالخطوة الأولى لحد لما نحل بقيت المشكلة

انك تكوني على طبيعتك تماما

ما تحاوليش تعملي حاجة عشان تعجبي حد

و لو حتى لاقيتي نفسك في مكان و مش ليكي نفس تتكلمي ، ما تتكلميش

حد قال حاجة بايخة ، مش مطلوب منك انك تضحكي عليها

و وقت ما يكون ليكي رغبة حقيقية في الضحك أو الكلام ، هتلاقي ده طالع بشكل تلقائي مدهش

حاولي تركني كل انطباعات الناس / أو الانطباعات اللي انتي معتقدة انهم واخدينها عنك / على جنب تماما ، ركزي دايما على انتي حاسة بنفسك ازاي ، و شايفاها ازاي ، مش الناس شايفينك ازاي

و لاحظي حاجة مهمة جدااا

ان الناس بيتعاملوا معاكي على أساس اللي بتعتقديه في نفسك

يعني لو انتي شايفه انك بتتعاملي ببساطة مع الناس و بطبيعتك
همه هايبدأوا يشوفوكي كده ، حتى لو كانت انطباعاتهم السابقة مختلفة

لو انتي مركزة على ان الناس بيقولوا عليكي تنكة و مغرورة

و حاطة ده في اعتبارك كويس

هتلاقي تصرفاتك اللي بتطلع منك بتتفسر دايما على الأساس ده

لأنك بتحاولي تنفي انك زي ما بيقولوا

و النفي معناه إثبات عكسي

يعني لو قلتي لحد :
أنا مش مغرورة

هتلاقي عقله الباطن بيتخيل صفات الغرور فيكي ، و مش هايهتم قوي بأداة النفي
إلا على المستوى الظاهر

و هتلاقيه بيحاول يدور على تعاملاتك المغرورة بدون وعي عشان يثبت الحاجة اللي انتي نفتيها

********************************

أحب أفكرك تاني

إن خطوتنا اليومين دول

هوه انك تبقي متناسقة مع نفسك

انك تستعيدي ثقتك بنفسك

و مش يهمك تعليقات الناس عليكي

و يكون كل اللي هامك انك تحسي بالطبيعية و التلقائية في تصرفاتك

و انك تتعاملي ببساطة

و اللي عاوزاه تعمليه

و اللي مش مرتحاله ، ما تلتفتيش ليه من الأساس


***********************

فيه سؤال مهم جداااا في الآخر :

انتي نفسك أي حد يعجب بيكي ؟

و هل الموضوع عندك متوقف على مجرد إن حد يعجب بيكي؟
و لا حاسة إنك محتاجة ترتبطي ، و الإعجاب ما هو إلا بداية ؟

منتظرة كلامك


----------------------------------------------------------

لو عندك مشكلة أرسلها إلى

shaghafon@yahoo.com

أو اكتبها في التعليقات

هناك 7 تعليقات:

Unknown يقول...

Tagged

Leonardo يقول...

مابلاش حكاية بوست واحد فى الصفحه ياشغف الله يخليكى !
خليهم اتنين .. خليهم تلاته
ده أنا لما باوزن وقة سمك بازوّد عليها 3 بساريات تقومى إنتى مش عارفه تعملى 3 بوستات فى الصفحه !!

شغف يقول...

محمد :

و هو ك ، هأنشوف


ليوناردو :

ههههههههه
جوعتنا يا أخي ، حرام عليك

ثم أصلا البساريا غالبا بتتوزن لوحدها ، مالهاش علاقة بالسمك يعني


المهم
هوه بص ، أنا أعتقد إن ده أفضل يعني ، عشان يبقى التركيز ع البوست المحطوط
و في نفس الوقت ، لو حد عاوز يقرا أكتر من حاجة ففي خيارتين
:
الخيارة الأولى :)
انك تدوس ع المسمى اللي ممكن يعجبك م الجنب ، و تقرا الحاجة اللي مصنفه تحته

و بكده تقرا بعض الحاجات اللي ليها امتدادات تحت بعض
و ده ينطبق أكتر على بوستات حل المشكلات مثلا

و ده ينفع كمان أي حد مثلا لسه بيدخل المداونة للمرة الأولى

الخيارة التانية :
ممكن تنزل ع الأرشيف ، و تدوس ع الشهر اللي يعجبك ، برضة هايجيبلك البوستات مرتبة تحت بعض على حسب التاريخ


شفت ، يعني مش مخليين نفسك في حاجة أهوه
:-D

لكن غير كده بقى ، فشكل البوست حلو و هوه وحدي في المنزل كده :)



ثالثا بقى ، و لا رابعا
و هو الأهم :
فين تعليقك على البوست نفسه ؟ مادام دخلت و كتبت تعليق ؟

الكلام ده ما ينفعش يا عم ليوناردو

احنا مش الحكومة عشان داخل تعترض و بس

syzef يقول...

بصي هو الاول انا اول مرة اعلق علي بوست من نوعية المشاكل دي

فمش عارف اذا كان المطلوب مني اني اعلق علي طرح المشكلة وتناولك ليها ومداخلك لحلها

والا اعلق علي فنية البوست كبوست مشوق والا مش

والا اعلق واقول رايي كحل موجه لصاحب المشكلة

وبما اني ادامي تلات خيارات زي مانت رديتي علي ليوناردو فانا ممكن اختار اللي كنت مشغول اني اقولهولك اكتر

اولا ..بغض النظر عن انك بتطرحي مشكلة من عدمه..انا استمتعت بالبوست وده علي عكس بريد القراء بتاع الجرايد اللي مبيجيليش طول بال اقرا المشكلة مش اني اتابع حلها كمان

اما رايي ف طح الازمة ..فشايف ان اجابات صاحبة المشكلة بتنم عن اسئلة مركزة قوي كشفت صاحب المشكلة ادام نفسه قبل ما تكشفه ادامك انتي
وردك بعد كده ودي اكتر نقطة لفتت انتباهي حتي اني اول مرة قريت فيها البوست-مانا دي تاني مرة اقراه- طرئت علي بالي وانا مروح في المواصلات

يه مثل بيقول

easy come , easy go

يعني اللي يجي بالساهل يروح بالساهل

لفت انتباهي جدا عرضك التفصيلي للمثل باللغتين واصرارك علي التركيز عليه
فسالت نفسي ايه لزمته مع ان شهرة المثل نفسها تكاد تكون كافية لعدم ذكره اصلا ..صاحب المشكلة اكيد عارفه؟

وفي الاخر حسيت ان تفصيلاتك دي الي اتبعتيها بعد كده مثلا ف عرض فكرة الناس عننا نابعة في الاساس من فكرتنا احنا عن نفسنا اللي قعدتي فترة تسردي فيها

لقيت ان فعلا صاحب المشكلة محتاج بشكل كبير للتاكيدات دي وللتفصيلات دي وممكن كلمة واحدة بس من دول تبقي هي مفاحه السحري لانه يحط ايده ع الفكرة اللي هو مش مش عارفها لا ده هو بس محتاج حد يشيل الغيامة اللي عليها ف عقله


اما بقي الخيارة التالته وهي رايي في المشكلة نفسها فمش عارف اذا كان ده مسموح والا لا..انا قلت رايي في البوست كبوست عادي بقراه ف مدونه

لكن لوكان ده مسموح فرايي هيكون ف تعليق آخر

تحياتي

شغف يقول...

سيزيف :

بص
هوه المفروض انك تقول اللي يجي في بالك و عاوز تقوله

سواء على ده أو ده أو ده

هنا بلوج ديموقراطي حر ، مسموح فيه تقول كل اللي انت عاوزه

و ياريت لو فيه حاجة معينة عاوز ترد بيها على صاحبة المشكلة ، فمافيش أي
مشكلة

بس في حاجة عاوزة أفهمها :

انت بتقول إن البوست ممتع / غير اللي بيجي في الجرايد / ممكن أعرف إيه الفرق ؟ أو ايه الامتاع اللي فيه من وجهة نظرك ؟

syzef يقول...

استمتاعي بالبوست انا قلت سببه ف تعليقي اللي فات..انا كنت مستمتع باجابات صاحبة المشكلة اللي حسيت ان وراها أسئلة مركزة قوي ومنتقاة بعناية

الفرق بين ده والجرايد..يمكن مصداقيته ..انا بحس في الجرايد بعدم المصداقية والافتعال..يمكن عدم مصداقية الاخبار اتسلل لاي حاجة تانية في الجرايد سواء تحليلات سياسية او اجتماعية سواء اراء نقدية فنية ده حتي اعلانات الوظايف ..يمكن ده اللي بيخليني احس بالافتعال ده انا ساعات بحس انها مشاكل متالفة مخصوص عشان الباب يتقدم بدون مايكون ليها اي بعد واقعي ..ونقطة تانية وهي اكتر نقطة عاجباني هنا..ساعات بحس في الجرايد بان صاحب المشكلة بينكسف في مناطق من مشكلته وعرضها بتفاصيلها

syzef يقول...

صاحبة المشكلة بقي عايز اقولها حاجة..ان عاجبني جدا جراتها وشجاعتها في اعترافها بمشاكلها ..الاعتراف ده اول خطوة حقيقية للحل..وطلب مساعدة الناس مش عيب..ده بيديني احساس في صدقها فعلا في البحث عن حلول لمشاكلها

وأكتر حاجة عاجباني جرأتها اللي كانت بتوصل أحيانا لحد الصدمة في تحليل علاقاتها حتي مع أقرب الناس ليها..ده بيفكرني بكلمة عاجباني جدا كنت قريت ان نيتشه اللي بيقولها ف كتاب اسمه هكذا تكلم زرادشت بيقول
(إن أي تقدم حقيقي (في المعرفة) يتطلب نظافة ازاء النفس)

النظافة دي والصراحة دي هي أول خطوات المعرفة وأظن أن أهم حاجة الانسان يبدا يعرفها هي نفسه واللي حواليه اللي مرتبط بشكل او بآخر بيهم

أد ايه اتصدمت لما لقيتها بتقول أصبحت عديمة الشخصية وتقول ان محدش عرفها عشانها هي

بقولــّها ابدأي بقي بداية جديدة تكوني فيها نفسك اللي بقيتي نضيفة معاها دي..تكوني فيها (ن) وبس مش (ن) بنت فلان أو فلانة..ركزي علي شخصيتك انت بعيد عن تسلط والدك وسلبية أمك ..لأن كلا الموقفين تطرفيين

بس أكتر حاجة عاجباني بقي ..حتة استايل دي ههههههههههههههه

ربنا يوفقك

ويوفقك انتي كمان ياشغف في الباب ده..انت عارفة اعظم حاجة في الدنيا ايه..ان حد يقف جنب حد محتاجه ..بدون انتظار رد..انا بحسدك علي الباب ده