الأربعاء، مايو 14، 2008

شيء مفقود 9)





انا بجد الفترة الاخيره كنت بحاول احافظ على هدوئى اكتر وقت ممكن
بس المشكله ان اخواتى برضو بيستخفو بيه
اخر موقف باه حصل واللى تقريبا هد كل اللى عملته
مع انى من جوايا حاسه انى يعنى ممكن اكمل
نفسى اكسب اللى حواليه مكونش شخصيه منفره
اللى حصل ان اختى فى ورق ليها ضاع كان فى شنطه انا اخدتها معايا ا
وشلت الورق حطيته على مكتبى ونزلت لانى كنت مستعجله فماما شالت الورق حطته فى درجى
اختى باه مش لاقيه الورق فضلت تزعق وتشتمنى
وكمان ماما عايزانى ادورلها على الورق
قلت لها لما تتكلم معايا كويس هقوم
لقيت ماما بتزعقلى هى كمان وعايزانى اقوم ادور على الورق
اتنزرفزت منهم وعليت صوتى عليهم فجه بابا وطبعا سامع الزعيق من بره وهو مبيحبش الصوت العالى
فى الوقت ده
اختى لقت الورق وبرضو لسه بتزعق
بابا سالنى فى ايه قلتله
كعاده بابا انه بيرمى اى غلط على ماما واى مسئوليه وهو طبعا لا فضل يزعق لماما ويتخانق معاها
وكمان عايز يمد ايده عليها طبعا مش قادرة انسى نظرة ماما ليه انى انا السبب
مع ان ماما بجد كانت مع اختى عليا باسلوب مبالغ فيه نزفزنى وطبعا انا رحت لبابا
وقلت له انت كده محلتش المشكله وطبعا زعل منى ومبيكلمنيش دلوقتى
بجد انا مش عارفه اعمل ايه عندى اراده بجد انى ابقى احسن
انا الفتره اللى فاتت كنت كويسه جدا وكمان كالعاده بعمل مصالح اخواتى واجيبلهم اللى عايزينه من مصروفى
بس فوجئت باختى اول طلب اطلبه منها تقوللى لا
عايزة تاخد ومتديش وكان ده الطبيعى او انا اقل من انهم يحترمونى
وسلااااااااااااااااااااااااااااااااااااااااااااام
إمضاء

(ن)


******************************

العزيزة (ن) :

أولا : مافيش حاجة بتتصلح بين يوم و ليلة
و طبيعي يبقى فيه انتكاسات و صعوبات من فترة للتانية

ثانيا :
احنا كده هاندخل على محور والدك و والدتك عشان نبدأ نحل فيه هوه كمان
لازم تحطي في إعتبارك نقطة مهمة جدا :
من أهم الخطوات / بعد تحديد المشكلة / إنك تبطلي تلومي اللي حواليكي و ظروفك اللي فاتت
/ مهما كانت و مهما كانوا /
و إنك تعتمدي على نفسك في الحل ، و ما تنتظريش مساعدة من حد
يبقى لازم : نفهم --نتفهم ، و يمكن نتعاطف --- نقرر واقع --- بعدين نتعامل معاه زي ما هو
يعني
فيه نظرية بتقول بإن القهر نوع من التسلسل اللي بيمارسه من هو أقوى مع اللي تحته مباشرة
يعني مثلا
رئيس العمل يقهر الموظف اللي تحتيه ، فالموظف ده يقهر زوجته ، فالزوجة تمارس القهر و الضغط ده على ابنها الكبير مثلا ،
فالابن يمارس ده مع أخوه الأصغر اللي بدوره ممكن يطلع ده في صورة عدوانية تجاه حد من زمايله مثلا ، أو تجاه كلب أو قطة حتى
و هكذا -----
و بما إن والدك بيحمل والدتك عادة مسؤلية أي حاجة - مهما كانت - بتحصل في البيت ، و يعمل مشاكل معاها عليها
فطبيعي إنها تمارس ده اتجاهك و تيجي مع أي حاجة و أي حد عليكي

والدك م النوع اللي شايف إن الست هيه اللي بتبقى مسؤلة عن اللي جوه ، في حين إن مسؤليته هوه بتتركز ع اللي برة
و شايف إن دورها إنها تحافظ على بيت جوه هادي ، و أولاد متربيين كويس ، و إنها تعرف تحل مشاكلهم بهدوء
والدك شايف إن والدتك سلبية و بيعمل مشكلة معاها على ده / و عنده حق جزئيا / و طبعا ما حاولش يحل المشكلة اللي بينكم
لأنه شايف إن مش دي مسؤليته إنه يحلها
و كل اللي بيعمله إنه بيعنف اللي شايف إنه مسؤل عن الإشراف عليها / مش أكتر / اللي هيه والدتك
والدتك سلبية ، و بترمي عليكي الأخطاء أكتر م اللازم
و بتعقد المشكلة ما بتحلهاش
ده صحيح
و والدك هوه كمان بيعقد المشكلة أكتر و بيعمل مشكلة تانية عليها كمان
ده صحيح برضة
ماحدش فيهم قادر يحتوي أو يفهم أو يقرب
ده كمان صحيح
عذرهم الوحيد يمكن هوه سلسلة من المشاكل اللي بينهم الموجودة من قبل ما تتولدي انتي نفسك
و عدم تفاهم و قرب ما بينهم
و أكيد أكيد ، ماحدش منهم حاسس إنه مرتاح أو مبسوط في حياته ، و عشان كده ده كله بينعكس عليكم في الآخر
----------------------------------------------
أعتقد يعني إن تكوين أسرة ، و إن الواحد يبقى عنده زوجة كويسة مرتاح معاها ،
و أولاد كويسين مريحينه و مقدرينه حلم أي واحد
و برضة أي واحدة بيبقى حلمها إنها تلاقي الزوج الطيب الحنين اللي يساندها و يبقى ضهرها وقت المشاكل أو الأزمات
تخيلي بقى لما أهم حلم عند أي واحد و أي واحدة بيتهد يوم ورا التاني قدام عينيهم
/ بالتأكيد همه سبب رئيسي في ده /
بس برضة ما يمنعش إنك تخرجي من دايرة مشكلتك الشخصية و تبصي على أزمتهم همه اللي أكبر بكتييير من مشكلتك
إنتي لسه صغيرة ، و لسه قدامك حياتك اللي تكونيها ، و عندك إدراك نوعا بمشاكلك و بتسعي إنك تحليها ،
و إن شاء الله هاتتحل و هاتبقي أحسن
لكن همه ؟
اللي جاي من عمرهم مش قد اللي راح
و اللي راح راح في مشاكل و عدم راحة و تكسير للحلم / أو أحلام عدت و ما قدروش يوصلولها /

-----------------------------------------------------
عاوزين نتفق تاني إن دي حياتك انتي اللي عاوزة تغيريها بصرف النظر عن أي سلوكيات أو محبطات حواليكي
ده تحديكي إنتي
و دي مسؤليتك انتي الشخصية

و بالتجربة عرفتي إن لا والدك و لا والدتك ممكن إنهم يحلوا مشكلة أو إنهم يتعاملوا بشكل ايجابي
يبقى خلاص نتعامل مع الواقع ده زي ما هو
يبقى ما تدخليش حد منهم في مشكلة بينك و بين اخواتك
و ما تنتظريش منهم حل أو مساندة
انتظري من نفسك بس إنها تبقى أقوى و أحسن و أكثر صبر و حكمة
و يمكن بالعكس كمان ، انتي اللي تحاولي تساعديهم بعد كده
قومي صالحي والدك ، و قوليله انك مقدرة انه كان جاي في صفك لما عمل مشكلة مع مامتك
و إنك كنتي متضايقة م الموقف اللي انتي كنتي فيه و عشان كده قولتيله كلام مالوش لازمة
و لما يهدى و يصفى ناحيتك
خديه في صفك ، و قوليله إنك مش عاوزة تشتكي حد منهم دلوقتي في المشكلة اللي عدت
لكنك عاوزاه يساعدك إزاي تتعاملي مع أختك كويس ،
و إزاي كان ممكن ليكي إنك تعدي الموقف ده من غير ما يتحول لمشكلة زي ما حصل
على فكرة هايقدر منك جدااا إنك جيتي تسأليه و تستشريه
/ و حطي في إعتبارك كويس إنك مش بتسأليه عشان تحلي المشكلة اللي بينك و بين أختك في المقام الأول ،
لكن بتسأليه بغرض واحد محدد : هوه انك تقربي منه ،
و تحسسيه إنك مقدراه و محتجاله ،
و في نفس الوقت إنك عندك رغبة حقيقية في القرب و الحل ، مش في عمل مشكلات /
و لو لاقيتيه بقى كويس معاكي
قوليله إن مامتك طيبة و حرام يفضلوا عاملين مشاكل مع بعض
و افضلي كلميه بذوق و اتحايلي عليه عشان يقوم يصالحها ، و يخليها تصالحك هيه كمان
-------------------------------------------------

بالنسبة لأخوكي ، أنا بعت لك الرد المرة اللي فاتت
جربي اللي قولتهولك ، و بعد كده ابقى قوليلي ايه النتيجة
-----------------------------------------------------
أما بالنسبة لأختك بقى
فاللي حصل يا ن هوه إنك بعد ما بدأتي تكوني فعل بذاتك ، رجعتي تاني عشان تكوني رد فعل للي حواليكي
لاقيتيها بتشتم و تزعق
رحتي عاملة زيها
و زعقتي ، و رفضتي تساعديها في التدوير ع الورق
و بقت هيه أقوى منك
لأنها قدرت تأثر عليكي و تخليكي مجرد رد فعل ليها
مساوي في ( السوء ) ، و مضاد في الاتجاه
طب كان ممكن تعملي ايه ؟
بصي هوه فيه حلين :
واحد منهم مثالي شوية ،
و هوه انك كنتي تقومي تدوريلها ع الورق و انتي ساكتة من غير ما تردي بو لا كلمة ،
و تقوليلها انك مش غلطانة في حاجة و مع ذلك دورتي ع الورق و استحملتي شتيميتها عشان إنتو اخوات
و التاني بقى كان ممكن يرد لك حقك في الشتيمة اللي اتشتمتيها دي ، و يحسسها بغلطها ، و يشتمها بالذوق ،
كان ممكن تدوري معاها ع الورق و تديهولها
و تقوليلها أنا مش هارد عليكي عشان مش من مستوايا إني أتكلم بالأسلوب ده و لا أستخدم الألفاظ دي
و بس
الجملة دي على فكرة هأترد لك اعتبارك جدااا و هاتوقفها عند حدها
و في نفس الوقت مش هأتخليكي جواب شرط لسلوكياتها
: لو اتكلمت عدل ، هاساعدها / لو فضلت كده ، مش هأساعدها
لأ ---- حاولي تفصلي بين ده و ده
-----------------------------------------------------

بالنسبة بقى لكونك بتلبي طلبات اخواتك من مصروفك ، و أختك رفضت انها تعمل طلب طلبتيه
فعاوزين في البداية نفرق بين حاجتين مهمتين جدااا :
فيه فرق بين هدية تجيبيها لحد عشان تقوليله من خلالها إنك راغبة في إنكم تبدأوا علاقتكم بصورة طيبة فيها ود
و إن الهدية دي محبة منك للشخص ده
و فرق بين إنك تشتري طاعة أو رضا حد بالهدايا ، و تتقي شره و تخضعيله بيها
في الحالة الأولانية إنتي قوية و بتمارسي إرادتك الحرة في سلوك إيجابي
في الحالة التانية بتبقى ضعيفة ، و معتمدة على هداياكي إنها تشتريلك ود اللي حواليكي

أنا لما قلت لك هاتي هدايا لاخواتك ، قلت لك كده على أساس إنها بداية كويسة تبدأوا بيها من تاني مع بعض
لكن مش معنى كده إن أي حاجة يطلبوها منك تنفذيها
من حقك تقولي لأ ع الحاجة اللي شايفة إنك مش هاتقدري أو مش عاوزة تعمليها
دي نقطة

النقطة التانية بقى ، إن مش عشان أختك قالت لك في أول طلب طلبتيه لأ ، يبقى خلاص الدنيا خربت
لاحظي إنها ما اتعودتش على ده قبل كده
و فيه حاجات ممكن تيجي ع المدى البعيد
لو طلبتي منها حاجة و مش رضيت تعملها ، التمسيلها العذر إنها مش فاضية أو مش قادرة تعملها
لكن برضة واصلي
و من حين للتاني اطلبي منها بذوق تعمل لك حاجة أو تجيبلك حاجة
و لو مش رضيت اصبري عليها
و لو هيه طلبت منك حاجة كان في مقدرتك تعمليها اعمليها
و مش دايما تنفذي اللي بتطلبه هيه ، و لا ترفضي باستمرار برضة
و وقت ما ترفضي حاولي تحطي سبب
آسفة مش هاقدر أعملك كذا عشان كذا :
و لما هيه تيجي ترفض تعمل لك حاجة طلبتيها منها ، اسأليها
ليه ؟ انتي مشغولة ؟
- كمثال -
و لو قالت لك آه
اقبلي برحابة صدر و قوليلها خلاص مش مشكلة دلوقتي
شوية عن شوية ، هاتلاقيها ابتدت تقدرك ، و تتعامل معاكي أحسن
شوفي كده و قوليلي ايه اللي حصل
-----------------------------------------------
فاكرة يا ن حكاية السلحفة اللي كسبت الأرنب في السبق ؟
كسبته عشان عارفة إن المشوار طويل ، و إن مش نطتين تلاتة هاتبقى عند النهاية
لأ --- لازم تتبع الخطوة بالخطوة و تصر على خطوتها البطيئة الصغيرة
لحد ما تلاقي نفسها في الآخر عند النهاية هيه اللي كسبانة
و المشكلة بقى إن بإيدك تبقى الأرنب الخسران ، و بإيدك تبقى السلحفة الكسبانة
لأن الأزمة إن القفزات العالية ممكنة بس في حالات الضيق و الغضب و الهدم
لكن البنا محتاج صبر السلحفة
و انتي عاوزة تبني مش تهدمي
--------------------------------------------
و بما انك بتحبي كاظم بقى
ففاكرة أغنية اختاري ؟
بيقول فيها
و طوييييييييييييييييل جدااااااااااااا مشواري
:)
خليكي كاظمية و حطي ده في إعتبارك كويس جدا
و ما تستعجليش النتايج
و روقي كده
****************************
لو عندك مشكلة أرسلها إلى
أو اتركها بالتعليقات

ليست هناك تعليقات: