السبت، أكتوبر 31، 2015

إلى صديقتي ...وإلى كل من مروا في حياتي أو سيمرون

ينفع أتصل بيكي ونسكت شوية قبل ما نبدأ أي كلام؟ ينفع ما نتكلمش غير لما نعوز نسأل سؤال بجد ونسمع إجابة بجد؟ 

ازيك؟ ايه الأخبار؟ عاملة ايه؟ دي مش أسئلة!

 تمام . ماشي الحال . كله كويس ، دي مش إجابات!

 الحمد لله. صدقيني ده مش حمد! 

بلاش نقول اللي كل الناس بتقوله عشان تملا بيه فراغ وبس ...

 خلينا نكتشف بعض كل مرة بنتكلم وكل مرة بنتقابل .. 

خلينا نسكت عشان نحس في طعم السكات بنفسنا وببعضنا وبمشاعرنا ... 

خلينا مرة مثلا نتقابل ونبص لبعض من غير ولا كلمة ونلاقي نفسنا بنعيط ...

 أو نلاقينا بنضحك قوي ... أو نلاقينا قمنا حضنا بعض فجأة ... 

أو نلاقينا بدأنا رسمة ع التراب وبنكملها لبعض... 

خلينا مرة نكلم بعض .. ونبدأ ب "ألو" يتيمة عشان نتأكد من وجودنا ع الناحية التانية من المكان ... 

ونسكت نسكت بعدين حد فينا يغني ... أو بس يقولها "آآآه" من جوه... 

أو يفضل يسرد تفاصيل السما والجو أو تفاصيل البيت من حواليه أو الكلام اللي وشوش الناس اللي سايرة بتقوله...
 أو الأحلام اللي جت على باله فجأة، مع إنه ماكانش فاكرها أبدا ولا فاكر هيه كانت عن ايه ...

خلينا نقولها ببهجة وحماس :"الحمد لله" ... واحنا حاسينها في قلبنا وروحنا مش بس على طرف شفايفنا... بالظبط ف وقتها .. مش مجرد افتتاحية في أول الكلام ... ايه معنى كلمة "بحبك" لما تتقال من غير إحساس؟ من غير لمعة العين وارتعاشة القلب؟ 

 خلينا مرة ... لأ مش مرة .. خلينا على طووول نبقى "حقيقيين"...

ليست هناك تعليقات: