الاثنين، مارس 26، 2007

وفاة السيد الرئيس


نبأ عاجل :
" نأسف لقطع البث المباشر من أمام احدى لجان التصويت على استفتاء تعديل الدستور لنعلن أن الشعب المصري قد مُني بمصيبة عظيمة في فقده قائده و ملهمه السيد الرئيس إثر أزمة قلبية مفاجئة ظهر هذا اليوم . تتوجه الإذاعة بخالص تعازيها لشعب مصر "
" و مصر اليوم ----- مصر اليوم ------ مصر اليوم في عييييد ------ مصر اليوم في عييييييد ---- مصر اليو م في -------"
وشششششششششششششششششششششششششششششش
" بسم الله الرحمن الرحييييييييييييييييم "

***************************
" معقولة ! أنا مش مصدق "

(يحتضن يافطة مكتوب عليها " مش عاوزين تعديل دستور ، عاوزينك ترحل و تغور " راقصا معها تانجو ، مقبلا إياها من حين لآخر ----- موسيقى هادئة في الخلفية )
- زي ما يكون للجملة سحر و جاب أثره
* إيه اللي انت بتهببه ده ؟ يا بني لا شماته في الموت
& آآآآآآه ، و يا عالم البلد دي رايحة على فين


*************************
" ماات ؟ يا عيييني "-

" عينك ايه انت كمان ؟؟؟ " *

" صعبان عليا قوي ، لما يقف قدام ربنا ده ممكن يقوله إيه ؟ ده رايح و محَمِّل " -
" ليه مِنك له ؟ ده كان راجل طيب و بيعمل لمصلحة البلد " $

" سلامات لمصلحة البلد " *

" آه و الله ، مش أدينا عايشين أهوه بناكل و نشرب و لينا بيوت ؟ و عملنا مدارس و مستشفيات ؟ انتو عاوزين إيه تاني أكتر من كده ؟ $
و ماحدش يجي يقولي الكلام الكبير الكلكع بتاع الديمقراطية و الفساد و إسرائيل و أمريكا و الكلام ده --- الراجل برضه كان أكيد فاهم أكتر منا و عمل اللي يقدر عليه ، و أدينا عايشين أهوه يا جماعة ، الفاتحة على روحه بقى
"

" الفااااااااااااااااااااتحة --- على روح الشعب " *

****************

$ " حاجة تقلق ---- كان لازم يعني يموت دلوقتي؟ "

* " ايه اللي انت بتقوله ده ؟ استغفر ربنا "

$ " أستغفر الله --- بس أقصد يعني إن هايحصل خلل في البلد ، و الاستقرار اللي كنا
بننعم بيه كده هايروح ، يعني --- الصفقات اللي المفروض تتم اليومين دول الواحد مش
هايعرف يتصرف فيها لحد لما نرسى على بر "
* " يا أخي بطل طمع ، يعني مش مكفيك الفراخ المجمدة اللي استوردتها من غير فلوس
تقريبا ، و اللي كان ناقص يدوك فلوس فوقيها عشان خلصتهم منها ، و بعتها هنا و كسبت ملاييين ؟؟ "

*************************

نفس اليوم ليلا :
" نبأ عاجل ----
أعلن السيد الرئيس ----- أقصد السيد ابن السيد الرئيس أنه يشكك في ميتة والده و يعتقد أن أحدهم قد دس السم لسيادته و طلب من السيد رئيس الوزراء و السيد وزير الداخلية إعلان حالة طواريء قصوى في البلاد لحين الكشف عن المتآمرين و عن تلك الآياد
الآثمة وراء مقتل حامل هموم الشعب "

***************************

- " طلع حد حطله سم في العصير "

* " لا يا سيدي ، ما رجعوا قالوا إن فيه مجموعة ضربت عليه نار هوه و الرجالة اللي حواليه "

& " هوه مش مات بأزمة قلبية ؟ "

-" يااااااااااااااه ----- ده انت قديم قوي "

****************************

الساعة 2,00 صباحا ً :

شرقا ----- غربا ------ شمالا ------- جنوبا -----
--------------------------------------------------
------------------
-------------------------------------------------
------------------
-------------------------------------------------
------------------
--------------------------------------------------
------------------
----------------------------------------------------
------------------
---------------------------------------------------
------------------
----------------------------------------------------
------------------
-----------------------------------------------------------
------------------
------------------------------------------------------------
------------------
---------------------------------------------------------
------------------

*******************************

و طبعا --- خلاااااص
تم التخلص من تلك الفئة المندسة جوه الشعب المصري الطيب المسالم ---- اللي كانوا قليلين جدااااااااااا بالنسبة للشعب العريق المستقر
و تولى ولي العهد الحكم من غير شوشرة كتيير
و ماحدش عرف بعد كده إن كان والده مات فعلا بالسم و لا زي ما قالوا في الأول : أزمة قلبية عادية
و ولي العهد ما احتاجش حتى لتعديلات و لا يحزنون ، لأنه ضرب بأيدٍ من حديد على آياد المخربين و المفسدين اللي عاوزين يبوظوا الشعب
و عاش كل الناس - اللي في القصر طبعا - في سعادة و هناء
لا يعكر صفوهم شيء من شوائب الحياة ، و لا مشاغبة من أحد منحرفي الشعب الأشقياء
و هيه دي حكاية البلد الأسطورية اللي اسمها مصر اللي اتبنت الدنيا كلها
و توتة توتة فرغت الحدوتة

هناك 4 تعليقات:

yara يقول...

انا خايفة عليك والله
بجد
ربنا يستر
بس بينى وبينك
انت هااااااااااااايل
وبصوت عالى كمان
ولا يهمك

Faheem يقول...

برده لازم مننساش كل انجازاته الحضارية العيسوية في البلد
و كما قال أحد الركاب في الميكروباص
"ده ملا البلد كباري" أهو الراجل ده جامد لأنه بص على الإيجابيات و أهمل السلبيات
كان نفسي حد يصورني لما سمعت الجملة دي كنت باموت من الضحك
عموماً انا متفائل جداً لما يموت
أصحاب المصالح هايختلفوا و ده في مصلحتنا
ان شاء الله الدنيا هاتتعدل

تحياتي الفهيمة

تــسنيـم يقول...

يخرب عقلك يا بت يا شغف...
تصدقي إني لما قرات العنوان كنت متأكدة إنك واخدة الموضوع بجدية وبعيد عن السخرية.. اللي انتي كتبتيه ده سيناريو أكيد الحدوث في أي وقت وليس على سبيل الفانتازيا.. وشر البلية ما يضحك

شغف يقول...

yara :
بابك المردود فتح هنا أخيرا :)

منوراني


faheem :

هههههههههه

يا عزيزي الفهيم ، لو المشكلة في هذا الرجل ( العظيم ) / الرمز لهذه الأمة العيسوية
كان ما كانش يبقى فيه مشكلة

لكن ده نظام كامل أصلا نشأ و ترعرع و امتد و تغلغل في البلد زي راجون

و في الأول و في الآخر
فتش عن الشعب


سلالم



تسنيم :

يا بنتي ادعيلنا دعوة حلوة

احنا فينا غير حبتين المخ اللي عندنا ، لو اتخربم نكمل مسير ة التنمية في حياتنا ازاي؟

نروح نجيب مخ من عند الراجل بتاع الكبدة ساعتها بقى و يبقى على ضمانتك؟؟