الاثنين، يوليو 07، 2008

ليس هجاءا أو ثناءا ... فقط .. إحدى الحقائق

" Teach these boys & girls nothing but facts."

و أنا أقلب في كتب العام التالي ، راقتني جداا تلك الجمل في أول صفحة بالقصة ، تلك التي تمجد الحقائق .
اختلف الأمر كثيرا بعدما بدأنا الدراسة ، لتتحول كلمات مستر " جراد جرايند " لمعاول هدم تهدم المشاعر و البراءة و الخيال مستبدلة ً بهم عالم قاسي بارد ، البشر فيه مسوخ متشابهة كالأوعية ..
و أعود دوما بحيرتي لأول صفحة ، و لا يغريني تبدل موقفي الذي فرضه " ديكنز " على إتجاهي نحو قائلها ، بتغييره تجاه تلك الكلمات التي أعجبت بها
" Facts alone are wanted in life"
تخرق " إيمان" بنود الصمت و التركيز اللذين نلتزمهما في الحصص المهمة ، فتلكزني بإلحاح ٍ هامس :
" بصي... بصي ... بصي "
أُدهش : " ايه ؟ فيه ايه ؟ "
- " لون عين المستر "
" زي لون القميص اللي هوه لابسه بالظبط "
تتراجع " لويزا " و " هارثوث " و مستر " باوندرباي " و " توم " و مستر " جراد جرايند " لوهلة من أمامي ، و أنا ألحظ ملاحظتها الصائبة بين قميص المستر وعينيه اللتين امتلأتا سخرية ً و رفضا ً لموقف " لويزا " :
" مادام ما اعترضتش على إختيار أبوها في البداية ، تبقى وافقت ، يبقى ده إختيارها و لازم تتحمل مسؤليته ، و ما تعاقبشي الراجل اللي ارتبطت بيه على مشكلة مش بتاعته "

أهز رأسي مقتنعة بالملاحظات الصائبة ، تبتسم " إيمان " في رضا : " مش قلت لك !"
" كل الناس اللي عنيهم ملونة ، لون عنيهم بيتغير على حسب اللبس اللي بيلبسوه "

" Facts .... Facts ... Facts.
Plant nothing else, and root out everything else "
يسخر " محمد " و أصدقاؤه من الكتب و الكتابة المتلبسين هم أنفسهم بالإنغماس في عوالمها ...
من الشعر : ذاك الدخيل
يدهشني الأمر برُمته
أدهش أكثر من نفسي التي أغرمت بتلك الجمل الكثيرة عن الحقائق ، كما تغرم بالشعر و الكتابة و الكتب المُتهَمين بخلق عوالم من الوهم
*
" أنا ما بحترمش المثقفين دول .......... مجرد كلام في الأدب و السياسة و شوية أبيات شعر بيرددوها زي البغبغنات ، و تلاقيهم في أمور الحياة العملية ما يعرفوش حاجة .......... الثقافة دي زي الدروشة .. إنغلاق العقل على جانب واحد نظري ، و الباقي صفر "
تصادفني الحقيقة في كلمات " إيمان"
نعم ... الشعر و الفن حقيقة تبرز مع ما يستدعيهما من ألوان
" You don't walk upon flowers in fact, so you cannot be allowed to walk upon flowers in carpets"
و لكني أستطيع أن أمشي على محيط زهرة عندما يكون الفن حقيقيا ، فإني لن " أتخيل " هذا ... بل هذا سيُحدث واقعا في داخلي ، ستمتصني اللوحة / القصيدة / الرواية / الفيلم / المسرحية .... و أخرج منهم كائنا آخر ذي مقدرات أخرى مدهشة
" انتو عايشين الدور قوي "
أكتشف أن وجودي في هذه الحياة بذاته وجود شعري ، و أني أتعامل مع الحياة و مع وجود الآخرين بنفس الطريقة :
كلٌ منا سطر شعري يسهم في القصيدة ... أو عنصر من عناصر الحبكة الروائية للزمن ....
أو - كما يقول " بورخيس" - كلٌ منا يشكل رمزا ً في نظام الكون
** "
هنفضل نجري و إحنا مش عارفين بنجري ليه ......... لما أنا بأمسك الفرشة و أقبض على الحقيقة داخل اللوحة ، لما انتي بتمسكي قلبها بشِعرِك ، هي دي الحقيقة ، مش أي حاجة تانية ."
*************************************************
1
السطور الإنجليزية من رواية
Hard Times
للروائي الإنجليزي تشارلز ديكنز
2
* ، ** من رواية دارية ل سحر الموجي
* إحدى الجمل الحوارية للزوج
** إحدى الجمل الحوارية ل شخصية " نور الدين "

هناك 9 تعليقات:

غير معرف يقول...

ميستر جراد جرايند ده أكتر شخصية أدبية كرهتها في حياتي هدم الخيال أخطر من القتل
فيه كلمة قالها آينشتاين بيقول
الخيال أكتر أهمية من المعرفة
و أعتقد برنارد شو قال
عندما أرى شيئا أتسائل لماذا و عندما أحلم بشيء أتسائل لم لا

لما تقتل خيال واحد بتحوله لمكنة الناس كلها تبقى قالب واحد
وده لوحده هدم لإنسانيتهم

Mustafa Rizq يقول...

عند قراءتي للسطور سطرا بعد سطر، يعلو في رأسي صوت الملاك/ الانسان بجملته الرائعة ( إني أعرف طعم الكمثرى و لاكني لا أعرفها طعمها على لسانك )*

كم كثيرة متعددة هي تلك الحقائق، بتعدد و كثرة محقيها، فالناس في بلادي لديهم من الحقائق ماليس لناسك، و ما هو ضروري لك ليس سوى زائد عندي..... و هكذا

حقيقة لا أعتقد بوجود الحقائق، و لا اعني بها تلك ضد الخيال.. فلا تعارض أبدا

*city of angels

LAMIA MAHMOUD يقول...

هارد تايمز من اروع قصص ديكنز وهنا بقرا اجزاء منا بمنظور مختلف اللي هو منظورك انتي
...
اشعر كثيرا ان الادب لا يصلح كدراسة .. كل واحد فينا بياخد الجملة في كل لحظة بمنظور وعشان كده مينفعش اقعد اسمع من حد منظور واحد بس بيتفرض عليا
...
سخرنا من الكتابة .. وارتكبناها
بس على ما افتكر ان محمد سخر من الكتابة وناس كتير بدأت تناقشه في هجاءه لها

المشكلة يمكن ان ما جزء كبير من ما نكتب هو نحن ولذلك كان علينا ان نسخر من انفسنا في بعض الاوقات
...
مقرتش دي لسحر الموجي اول واخر تعارف بيني وبينها كان نون
ولذلك لا اعرف سياق جملتك في الحوار الدائر
بس حقولك حاجة حاسة بتعميم في الجملة وانا بكره التعميم

نسبية الحقايق دايما مشكلة


خالص مودتي

Unknown يقول...

أنا كرهت نفسي في هارد تايمز، بجد

الرواية الوحيدة إللي كان نفسي أخش جوا الرواية وأموت الأب كده في أول صفحة

bastokka طهقانة يقول...

جميلة يا شغف

يا رب دايما متالقة

اوروفوار

bluestone يقول...

قد اختلف مع ايمان قليلا في تعريف الثقافة
فهي ابدا ليست انغلاقا على العقل
انما هي ابحار طوييييييييل
فقط عليكي ان تتوقفي كل فترة لتقييم الرحلة وبعض السباحة والاعمال اليدوية
ولكن ابدا الابحار لا ينتهي

الحقائق .. ليست بالامر الهين ايضا
فجميع الحقائق نسبية تماما .. لا شيء ثابت

إلا ما اثبته ديكارت
وجود الله
وجود النفس
وجود العالم

شغف يقول...

يحيى :
مستر جراد جرايند ده أكتر حد صعب عليا في الرواية
صعب قوي حد يعيش حياته كلها تبع لمبدأ معين ، و يربي عياله و عيال غيره بكل فخر على المبدأ ده ، و في النهاية يكتشف زيفه و إن حياته كلها قامت على حاجة غلط

بس معاك حق في بقية كلامك



m.r:
:)

أحاول فقط أن أوضح طعم الأشياء على لساني أنا أيضا
و ليس هناك واقع أو حقيقة كحقيقة طعم الأشياء بالنسبة لمن يتذوقها

كتر خير الأستاذ أينشتاين اللي علمنا ان فيه حاجة اسمها نسبية


lamia mahmoud:
ما فيش حاجة اسمها منظور " يتفرض " عليكي
فيه حاجة اسمها منظور حد تاني بتطلي عليه و بتاخدي اللي يناسبك منه
مع كامل حقك و حريتك في انك تبني منظورك الخاص اللي ممكن جدا يبقى متعارض مع منظور الحد التاني ده
Ce la vie
عادي :)

ما قرتش نون
بس أعتقد إن الانطباع اللي واصلني منك عنها مش أوعدك انه ممكن يتغير لو قريتلها الرواية دي
الرواية مش عظيمة و الجمل الحوارية مش حلوة قوي ، بس لاقيتها مناشبة للتعبير عن وجهات نظر مختلفة حوالين نفس الموضوع مش أكتر

منوراني



Mohamed el ghamry :
الأب في هارد تايمز / زيه زي في أي حتة تانية غالبا / ما هو إلا جزء من مجتمع كامل بيفرض ثقافة معينة و وجهة نظر بعينها للحياة بيفرضها على الجيل التالي بإعتبارها الوجهة الوحيدة الصحيحة
بيحصل في أحسن العائلات :)


طهقانة :
شكرا



bluestone :
بالظببببببببط
بس سؤال : إيمان مين ؟

bluestone يقول...

ايمان !! من ذكرتيها في البوست .. (تخرق " إيمان" بنود الصمت و التركيز اللذين نلتزمهما في الحصص المهمة ، فتلكزني بإلحاح)ا

انتي نسيتيها ولا ايه؟

شغف يقول...

bluestone
مسا التهييس
كنت بأرد أصلا - بعديها بمدة - و أنا مش واخدة بالي أنا بأكتب على أي بوست أو ايه بالظبط اللي كان فيه

عادي بقى
أصلك قلتي تختلفي معاها في تعريف الثقافة ، و مش كان ليها تعريف أصلا أو مناقشة للثقافة ، فافتكرتك بتتكلمي عن حد تاني نعرفه اسمه ايمان يعني
يالا حصل خير