الجمعة، يوليو 25، 2008

لا بأس

فقط هو غرورٌ أنثوي
يريدُ رؤية و لو بعضا من ذاك الشغف و الاندفاع و الرغبة المستعرة في الاقتراب الذين تبدوا في كلماته عنها
بعضٌ من غيرة أنثوية من أولئك اللاتي تمثل إشارتهن أو إيماءةٍ منهم سحرا لا يقاوم
غرورٌ أنثوي يبرز أحيانا ليتصارع مع ذاتي الوادعة الكارهة بطبيعتها للفت الانتباه و للتعالي البشري
غرورٌ أنثوي يتعارض مع كلماتٍ حميمة ك " البساطة " و " النبل "
غرورٌ أنثوي فريدٌ من نوعه ، يهرب بندالة عند أول جملة بها قدر من الحميمية ، ليتركني وحدي أصارع ما جلبه عليَ ، فأحاول سخرية ً أو تهربا
غرورٌ أنثوي يتبدى من نظرات البنات اللاتي تسكنهن الغواية ، فتتلبسني النظرة ، و تنتقل لي الابتسامة الغاوية
غرورٌ أنثوي أمرغ رأسه في التراب و أنا أكسر النظرات الموجهة لأنثاي بنظرةٍ جادة أو أخرى متجاهلة
غرورٌ أنثوي أمنحه لكلماتي المازحة :
* " الحياة ماشية إزاي من غيري طول المدة اللي فاتت ؟ "
* " طبعا ليك الشرف و السعادة إني بأتكلم معاك "
* " هوه أنا أي حد ؟ "
لأحار أمام آثاره الإيجابية ، و تلك الهالة الساحرة التي يلبسنيها
* " كل ده هزار على فكرة "
* " ما ينفعش أصلا أبقى مغرورة للأسف مش طبعي "
* " مافيش ولا كلمه جد أو صح من اللي فات "
غرورٌ أنثوي أمنحه تاجا من الزهر و الياسمين ، و أرسم عينيه و أصبغ شفتيه ، و أشير إليه أن يمضي فوق الكعب العالي بخطوة الأميرات
غرورٌ أنثوي أدوسه بإمعان تحت حذائي و أنا أضغط أرقام هاتفه ، فليس هناك من قرب حقيقي بيننا لأمنح نفسي حق الغضب منه

هناك 10 تعليقات:

غير معرف يقول...

الكلام ده كان نفسي حد يقولهولي أو يفهمهولي من 10 سنين مثلا
ويقف يقوللي بمنتهي الأمانة انتي صح ولا غلط
لأنك لو تجاهلتي غرورك في يوم واتنازلتي أمام بعض الكلمات ممكن تنجرحي
والجرح لما بيكون في المشاعر خاصة وهي بكر بيكون في منتهى الألم
ببساطه كلنا محتاجين دفعه من التشجيع علشان نعرف نكمل الطريق
والتميز للأذكياء ... بمعني لا تستفتي فقط قلبك ولكن مع إستفتي عقلك وعينيك ووواقعك

تحياتي

ست الحسن يقول...

طب انت عارفة اني كل يوم باجي عندك أدور على حاجة جديدة ولما ملاقيش أحس بالخذلان

طب انت عارفة
أنا والله بتونس بيكي جامد، معرفش ليه بحس ان صوتي مسموع أو اني متشافة كويس لما باجي هنا


............
عن الغرور الأنثوي

مش عارفة أقولك ايه
وانا حاسة أوي بموضوع الغرور اللي لما تحتاجيله متلاقيهوش وبحكاية الهزار اللي عمره ما بيبقي 100% هزار

وعلى فكرة مش دايماً الكلام ده بيعكس غرور وتعالي ساعات بيعكس احتياجنا الشديد لإننا نبقى مُهمين في حياة حد
أي حد



الغرور
أنا وبكل صراحة أقدر أعتبر نفسي واحدة من الناس المغرورين جداً
واللي حاسين انهم فوق الناس وهم بس اللي بيفهموا والناس على قدهم

واحدة من الناس اللي عمرها مبتسأل أي حد عن تفسير لتصرفاته معاها لأنها طبعاً عارفة ودايماً هتلاقى عندها حدوتة لكل الناس اللي تعرفهم

المشكلة اني بصدَّق أوهامي عن الناس أكتر ما بصدق كلام الناس عن نفسهم
والغريب إن عند النقطة اللي بحس فيها اني أحسن من الناس كلها بحس بردو إني أقل من الناس كلها

الموضوع كله أني لا أمتلك فضيلة التواضع اللي من خلالها بنقدر نشوف نفسنا واللي حوالينا في الحجم الطبيعي


معلش انا رغيت كتير
بس اعمل ايه ما اهو انتي السبب

syzef يقول...

واضح ان التعليقات ف البوست ده هتبقي وقف شوية ع الانثوات لكن كعادتي الفضولية الدائمة هعلق

النص واقعي لحد كبير وجاد لحد اكبر
انا بعد ما قريت النص لقيت نفسي ببص علي الصورة اللي ف الجنب اللي كان مكتوب جنبها كائن دائم البحث عن ذاته

وبعدين استغربت لما مش لقيتها..وف الآخر قلت لنفسي انك مش محتاجة لما تكتبي بوستات من النوع ده انك تكتبي الكلمة دي جنب صورتك..لو قارئ بصير اكيد هيكتشف ده لوحده


تحياتي الجادة جدا كنص الجاد جدا

شغف يقول...

الجميلة بسمة :

الكلام ده كلنا كنا محتاجين حد يفهملنا تصارعه جوانا من و احنا صغيريين قوي

مفهوم الثقة ، و الغرور و الشعرة اللي ما بينهم
أنا عاوزة أقولك إني ما اكتشفتش الأنثى اللي جوايا غير من كام سنة بس

قبل كده كنت أصلا بأبص لوجودها بشيء من الاحتقار

و بعدين حصل صراع جامد جدا بينها و بيني كإنسانة
احنا ما اتعلمناش نتقبل نفسنا بشكل سليم
و ازاي اننا نستفيد بمكوناتنا بدل ما نرفضها ، أو نكبتها ، بعدين ننجرح

بس أدينا بنتعلم :) و ده هوه المهم




ست الحسن و الجمال :
طيب انتي عارفة ان كلامك ده فرحني جدا ؟
و اني حاسة اننا قريبين برضك حتى لو ما نعرفش بعض بشكل واقعي ؟

-------

معاكي جدا في كل اللي بتقوليه ، و خصوصا الجزء ده :
( وعلى فكرة مش دايماً الكلام ده بيعكس غرور وتعالي ساعات بيعكس احتياجنا الشديد لإننا نبقى مُهمين في حياة حد
أي حد)

بس المشكلة بقى ان الغرور و التعالي اللي بيعكس الاحتياج ده ، ساعات كتير بيتحول لشعور بالعبء ع الحد ده ، و شعور بشيء من الضياع كده ، لأنك بتبقى عارفة من جواكي ان ده مش حقيقي ، و احتياجك ده ذاته بيجرحك

أنا يمكن عندي " نقيصة " التواضع دي بالهبل
مش بأعرف أشوف نفسي أعلى من حد غالبا ، و لما ده بيحصل بأحس بالذنب على فكرة

و إن كنت برضة نادرا ما بأحس اني أقل من حد

الحجم الطبيعي موجود عندي ، بس مش دايما بنكون في حاجة لأننا نكون في الحجم الطبيعي ، أو الليحوالينا يكونوا كده بالنسبة لنا

اييييييه
دنيا :)







سيزييييييف :


هوه البوست مش أنثوي حتى و لو كان بيتكلم عن شأن أنثوي

تعليقك عجبني جدا بشكل انساني بحت :) مبسوطة و مفتخرة إنك صديق عزيز

و أكيد فيه نوع من التماس بينه و بين العالم الرجولي في شيء ما ، مش بتحسوا بحاجة زي كده ساعات ؟

غير معرف يقول...

غرورٌ أنثوي أدوسه بإمعان تحت حذائي و أنا أضغط أرقام هاتفه ، فليس هناك من قرب حقيقي بيننا لأمنح نفسي حق الغضب منه


_____________
هــــــــــأووو

طلعت منك أوت يا ست شغف هانم

لأ مفيش أي قرب خالص حاشا لله


اجري يا بت انتي العبي بعيد ده أنا توتا ;) ولعلمك عايزة تفاصيل

Darweshe يقول...

hii shaghaf , u r true cuz U
really have selfesh femalist
that is the truth i geuss so

nice post

إبـراهيم ... يقول...

جميـــل أيضًا ذلك الغرور الأنثوي ، الذي يمنح الإلهام والإبداع ....

شغف هانم، كيفك؟؟؟ ... بقى لنـا كثييير ما عديناش هنـا، قلنــا نمر :) ....
تحياتي لكِ ولقلمك ، وغرورك الجمـيـل

شغف يقول...

تسنيم :

يا بنتي تفاصيل ايه بس و نيلة ايه ؟

هوه كام موقف متناثرين جدا ، و عاديين جداا ، و فعلا فعلا من غير ما يكون ليهم امتدادات
هيه لحظات بس تحسي فيها إن الأنثى هيه المتحكمة و هيه اللي موجودة و بتتكلم و ساعات كتير من غير لزمة
مش قلنا : لا بأس ؟ :)









درويش :
انت شايف كده يعني ؟
طب تمام




إبراهيم معايا :

شكرا جزيلا
و البلوج بلوجك ، عدي في أي وقت :)

Mustafa Rizq يقول...

طال الصمت... أهو البأس؟

شغف يقول...

:)
هو ذاك