شيء مفقود (7)

هاى شغف
انا عملت التلات ورقات وكتبت المميزات زى ما قلتيلى
وجبت الهدايا

جبت لاختى فرشاه روجاجو كانت شافتها عند واحده صاحبتى وقالت لى انها عايزة تجيب واحده زيها فجبت لها واحده
وقولتلها الفرشاه اللى انت كنت عايزاها لاقيتها فرحت فعلا وبقت تتعامل معايا
برقة وذوق غير زمان خالص
يعنى تقريبا من يومها انا وهيه ما اتخانقناش
كمان انا بقيت اصبر عليها
واتعامل معاها كويس
وهى طول الوقت تقوللى هاتى لى ده وده مع انى كنت زمان اقولها قومى هاتى لنفسك

دلوقتى ، بقيت اقوم اجيبلها اللى عايزاه
أخويا باه عيد ميلاده الاسبوع ده وانا كنت حلفا ما اجيب لوش حاجه السنه دى بسبب
المشاكل وانه مبيجيبليش حاجه ، المهم اشترتله ميداليه عشان عيد ميلاده
كمان وانا راجعه من الكليه كان معايا باكو بسكوت قلتله خد انا جايباهولك قاللى بجد
وبعدين عيب شويه عليه واكله
بس انا اتبسطت انه فرح انى جايباهوله
انا بقيت اصبر عليه وعلى استفزازه مش كل كلمه اتخانق عليها
بس طبعا المشاكل مبتخلصش بينى وبينه
بالذات لما يتخانق على لبسى ومكياجى مع ان شكلى عادى
يفضل يقوللى شكل الرقاصه

وكمان يتخانق معايا لو شافنى فى الكليه بكلم حد من زمايلى
ويفضل يقول كلام ملوش لزمه ، الحاجات دى اللى بجد بتعصبنى وارد عليه
انما المشاكل
العاديه الريموت وكده مباقيناش نتخانق عليها
وكمان الى حد ما بقيت احاول اخلى فى لغه حوار بينى وبين أخويا على الكليه وامتحاناته وكمان بساعده فى المذاكرة عشان امتحانات التخلفات بس انا بساعده من زمان
كمان فى الكليه بدات ابعد عن صحاب زمان شويه بروح على المحاضرات والسكاشن واروح على طول
مبقاش فيه حاجه اعملها
اكيد طبعا انا مبسوطه وحاسه انى اهدى من الاول كتير
والسلام عليكم ورحمه الله

*********************************
أهلا يا( ن) :
كويس جدااا ، أنا مبسوطة بيكي قوي
و لازم تعرفي إن الفضل الحقيقي لأي حد في تغيير حياته هوه لنفسه
لأنه عاوز يتغير بجد ، و سعى لده ، و حاول جديا
و انتي عملتي كده :)
و بتعمليه
و كويس جداا انك بدأتي تبعدي شوية عن الشلة القديمة و تركزي في دروسك
يمكن صحيح ساعات تحسي بالوحدة
بس صدقيني هاتبقى وحدة مؤقتة - إن شاء الله
لأنك هاتبدأي تجذبي - مع الوقت ، و مع تغير حاجات فيكي و مع تميزك إن شاء الله في الدراسة - ناس تانية قادرة إنها
تبقى عامل مساعد ليكي ، مش عامل هدم

نيجي نكمل بقى اللي هانعمله
كل مرة هانأكد على حاجة فاتت أو نصلح منها شوية ، و نشوف معاها نقطة جديدة

1- حلو جدااا علاقتك مع أختك دلوقتي
ياريت تستمر كده
و حاولي برضة من فترة للتانية تطلبي منها حاجة معينة
و لو انها تناولك حاجة أو تجيبلك حاجة من جوه
لأن العلاقات المتزنة بتبقى أخذ و عطاء
مش عطاء بس ، و لا آخد بس

2- بالنسبة لخناقاتك مع أخوكي
هوه طبيعي بالنسبة لحد في سنه عنده أخت بنت انه " يعمل عليها راجل " زي ما بيقولوا ، و يبدي اعتراضاته على لبسها و ميكياجها و كده
و خصوصا ، و إن النقطة دي نقطة اعتراض لوالدك عليكي
فده برضة بيدفعه انه يكرر نفس الكلام ، بس طبعا بصورة مستفزة أكتر
ده غير إن كونه ولد مثلا ، يخليه عارف لما بيقف هوه و صحابه م الولاد و تعدي بنت مثلا قدامهم بيقولوا عليها ايه أو بيتريقوا عليها ازاي
فهانحط في اعتبارنا انه مش عاوز يتقال عليكي حاجة م اللي بيتريقوا همه بيها على غيرك
----------------
طيب نعمل ايه ؟
أولا : أول و أهم حاجة ، إنك مش تُستفَزي ، و تبصلي لكلامه على اعتباره إهانة / حتى لو هوه كده فعلا
و تبدأي تتكلمي معاه بهدوء و منطقية

ثانيا : تخليه يحترمك ، و ما يستخدمش ألفاظ ما تعجبكيش معاكي
بصي في عينه كده و اسأليه : انت قصدك تشتمني و تهيني ؟ و لا لبسي مش عاجبك فعلا و عاوزني أغير منه ؟
و لأنه طبعا هايختار الحل التاني
فقوليله ان ده مش هايجي بالطريقة دي
و إن غلط إنه يقول على أخته - اللي هيه انتي - كده
و إنه لو عاوزك تسمعي كلامه ، يبقى يستخدم لغة محترمة يكلمك بيها


ثالثا : اسمعيه و حسسيه إنك مقدرة كلامه
اسأليه ايه اللي يعجبه من لبسك مثلا ، و اللي مش عاجبه ده مش عاجبه ليه
/ و فكريه كل ما يستخدم أسلوب حوار مش ولابد أو ألفاظ مش كويسة في وصف اللبس أو كده ، إنكم ما اتفقتوش على كده ، و إنه لازم يستخدم كلام محدد مش فيه تريقة /
و هكذا
و في النهاية بعد ما يخلص كلامه كله ، اللي انتي اقتنعتي بيه منه قوليله عليه
انك خلاص اقتنعتي بكلامه بكذا و كذا و كذا ، و هاتنفذيه
مش تتكلمي معاه دلوقتي في الحاجات اللي قالها و مش عجبتك أو ما اقتنعتيش بيها
و في نفس الوقت ، اتكلمي ع الحاجات اللي اقتنعتي بيها بجد ، و ما تمثليش انك مقتنعة بحاجة و انتي مش كده

رابعا : بالنسبة لكلامك مع زملاتك و كده
لو كان موجود في أثناء ده مثلا ، فعرفيه عليهم و عرفيهم عليه
و استخدمي نفس التكتيك بتاع اللبس برضة لو اتكلم عن النقطة دي
ابدأي اسأليه ليه ، و ايه الغلط بالظبط من وجهة نظره ، و ناقشيه براحة كده
من باب انك عاوزة فعلا تعرفي منه ، و إنك عارفة إنه أخوكي و خايف عليكي ، و إنك مالكيش أخ غيره ، و إنه عارف الولاد بيفكروا ازاي و يتعاملوا ازاي أكتر ما انتي عارفة ، و كلام من ده
و خليكي صاحية لو استخدم أي أسلوب مش ولابد معاكي ، إنك تعترضي بهدوء إنكم اتفقتوا انه ما يستخدمش الأسلوب ده معاكي


يالا أسيبك دلوقتي
و ربنا معاكي
و وافيني بالأخبار زي ما بيقولوا :)
سلام
*****************************************

لو عندك مشكلة أرسلها إلى
shaghafon@yahoo.com

أو اتركها بالتعليقات