الأحد، سبتمبر 10، 2006

و كان الظن أنها دمية



كان الظن أنها دمية

المنظر : سماء زرقاء صافية ، مرجٌ فسيح
الوقت : في الصباح الباكر جدا حيث خرير الياه الرائقة العذبة و شقشقة العصافير
نرى أوراقا قديمة و ذاكرة قديمة كانا ملاذا آمنا خبأتُ فيه برائتي الأولى و أحزاني الصافية القديمة
خبأتُ آمالا ساذجة ً و شموسا لم أكن لأصل إليها
خبأتُ طيبةً ، و كائنا رقيقا حنينيا يبكي لذكرى نسيمٍ ناعمٍ مر به يوما .... يبكي لمرأى خفايا التواصل ما بين قطرات المطر و أوراق الشجر
فجرٌ قديمُ خبأتُ فيه الكثير ... فجرٌ قديمٌ ... كانت اللامبالاة البشرية و التبلد الانساني يجرحان صفاءه

cut.......................................................


نسمع صوت فريق five eclipse متصاعدا في حدة و اندفاع:
Girl it's all over
this time
it's all over
I swear
it's all over
on my name
it's all over
be leive
it's all over
that baby it's all over now
this time
الوقت : في الليل الباكر جداا

"كبري دماغك يا بنتي ، نفضي للكلام ده كله

"



( هههههه .... ها أنا ذي أستخدم كلمات كان يصيبني الغثيان من مجرد سماعها من قبل ؛ كنت أعدها دلالة على عدم الاحترام ... على التبلد و اللامبالاة ... على الخواء ...تُرى .. ما الذي قطعه ذلك ال cut داخلي ؟ )



--------------------------------------------------------------------------------------------------------
لوم .. لوم ... لوم ......... فاصل من التحبيط
لوم .. لوم ... لوم .........فاصل من الاستهزاء
لوم .. لوم ... لوم ......... فاصل من الاتهامات
لوم .. لوم ... لوم ......... فاصل من نفض اليد

" عملوا اللي عليهم خلاص ، و لاقوا ان ما فيش فايدة ! "



* " مين دول يا أختي ؟ الاسرائيلين ؟ " .... تُساءل أختي الصغيرة بعد أن أفهمها معنى " تحبيط ، استهزاء ، نفض اليد "


أبتسم ...." لأ ... دول الأشباح ... اللهو الخفي "


--------------------------------------------------------------------------------------------------
لو كان لي ان أمنح جائزة ، لأقمت جائزة " الانجاز " و لأعطيتها لذلك الفيلسوف العبقري صاحب فلسفة " تكبير الدماغ " ....



" أنا أُكبر دماغي ، و أنفض للي حواليا .... إذن : أنا موجود ! "


هذه حقيقة ... فقط .. اسمعي لهم ... سيجرفكِ سمعك و يصير إنصاتا .. فإيمانا .. فتلاشيا لوجودِك

* " انتِ ايه اللي بينزلِك ؟"



* " انتي هاتفضلي قاعدة في البيت كده على طول ؟"



* " انتي بقيتي مدمنة نت انتي كمان ؟"



* " القراية و الكتب دول هايضيّعوا عنيكي"



*" ذاكري شوية بدل الرغي في التليفون "



* " المذاكرة مش بالكَم ... يعني ذاكرتي شوية خلاص ... مش تفضلي طول اليوم ماسكة الكتاب "



* " مسرحيات ايه اللي عاوزة تروحيها دي ... بلا كلام فارغ "



* " أوعي حد م الجماعات الاسلامية إياها يتكلم و تسمعيله ، ما تضيعيش مستقبلك "



* " منهم لله و الله ، هوه اللي يقول الله و الرسول و الدين في البلد دي يمسكوه ؟"



* " أوعي حد يضحك عليكي و يقولك كلام الأفلام ده و تصدقيه "



* " يا بنتي اتلحلحي شوية كدة و فكيها ، ماتبقيش عقد "



* " الاحترام حلو ... و لازم اللي قدامك يحترمك "



* " انتي ما بتشوفيش البنات بيلبسوا ازاي و لا بيتكلموا ازاي ، ده احنا مخلفين غفر "



* " انتي بتاخدي وقت في الصلاه كده ليه؟ ايه الملل ده ؟ انتي هاتصلي التراويح ؟ "



* " مش عدت بأشوفك بتصلي ليه؟"



* " ماهو بنات عمتك أهم ... اشمعنى انتي ؟ هاتعمللنا فيها شيخة ؟ ده فرح ... عشان يرقصوا لك يوم فرحك "



* " انتي غاوية تعب ؟ بلي السجادة بالمية و خلاص ، مش لازم الفرشة دي "



* " سيبك من عالم الكتب و المثالية و الأوهام اللي انتي عايشة فيه ده ... الدنيا مش النادي الأدبي اللي بتروحيه ، و لا الكلمتين اللي مالهمش لزمة اللي بتقولوهم هناك "



* " ما تيجي معانا ... مش قرايبك برضة و صلة رحم ؟"



* " هاتروحيلهم ليه ؟ فيه حاجة ؟"



* " المهم انه عنده امكانيات و شكله مقبول ، ده وسيم حتى ... انتي هاتنهبي ؟ تعوزي ايه أكتر من كده؟"



* " فاكرة نفسك مين يعني؟ و لا ايه المميزات اللي عندك عشان تختاري و لا تتشرطي؟"



---------------------


" يا بابا علشان ..........................."



" ماهو ضروري إن ..........................."



" طموحي ............"



" بأفكر .................."



" لأ ....... مش كدة ........ "



" .......... الضمير .........."



" أنا ................



نحاول نقاشا ... يصير جدالا ... ننهزم في نهايته بصوت يعلو أصواتنا الهشة ، و بعدم محاولة للفهم أو رؤية ً لحقيقة ما نقول
اسمعي .... ( سماعا سيجرفكِ للانصات ... احذري ) ..... و ابتلعي ما يُقال لكِ
-------------------------------------------------------------------------------------------------
مشهد ختامي للمأساة : جثة ملقاة على قارعة الطريق ، تنهش فيها الكلاب الضالة ، و عند تشريح الجثة ، وُجد أنها ماتت بالسموم الكلامية التي تراكمت في العروق طوال السنين الماضية ، و عند تحليل هذه السموم ؛ وُجد أنها تركيبة من أنواع مختلفة : سم أبوي ، سم عائلي ، سم مجتمعي ......... و العديد من السموم الأخرى
و سم باهت اللون ( لا يلحظه كثيرون - لولا دقة التحليل ) من جلد الذات و تعنيفها
---------------------------------------------------------------------------------------------------
ما قلنا الأول : نفضي لهم يا بنت انتي
-------------------------------------------------------------------------------------------------------

* " ليه عملتي ............."



* " ليه ما عملتيش ............"


...........................................
هل أسمع شيئا ؟ ..... حاولتُ ردا ... لم ينطق لساني .... حاولتُ ثانيةً .... ثالثةً ..... لا شيء ... نظرةٌ فاترةٌ خاوية نظرتُها إليه ... لم أحاول مناقشةً .. أو مجادلة ً ... بل ؛ لم أستطع ... و عدتُ إلى ما كنتُ أفعل

" أه يا قلبي !!! إيه ده ؟ ده سابني في حالي ، و مشي !! "


الحمد لله .. أخيرا ... ولجتُ إلى فلسفة " تكبير المخ " المجيدة

-----------------------------------------------------------------------------------------------------------
مشهدٌ ختامي لليلى الناجية من المأساة : تسير بثقة لامبالاية فوق حطام الدنيا ... تغني بصوت عال ... تنزلق على خيوط النجوم طفلة شقية ، تجوب الدنيا عطرا خفيفا يداعب وجه طفلة نائمة نسيما مرحا ..
البلوج الرئيسي ل ليلى

هناك 44 تعليقًا:

بعدك على بالى يقول...

يااااااااااه ايه الشيزوفرنيا دى اللى عيشونا فيها، كم من التناقضات المرعبة، طول عمرنا نفتح الشباك ولا نقفله....

تفتكرى حيجى اليوم اللى نكسر فيه الشباك علشان تدخل الشمس ونحس بالدفا،

تعرفى ياليلى / شغف.. من فترة طويله كنت بدات افقد الامل فى امكانية التغيير لوضعية ليلى الام والزوجة والاخت والزميلة و.. لكن تجمعنا ده منحنى الامل فى ان بكرة بتاعنا، وان الشمس بدات اشعتها تظهر ..

احييك على البوست الرائع ده، واسلوبك المتميز ..

ومبروك الانطلاقة

sha3'af يقول...

بعدك على بالي

التناقضات دي نفسها هيه اللي تضمنلهم احساسهم بالامساك بخيوط الدمية
و هيه اللي تثبتلهم ده

مش مهم الأمر أو النهي ايه ، بقدر ما المهم انهم يحسوا ان المحروسة لسه محروسة و لسه تحت السيطرة

لأن لو فيه قواعد و أشياء واضحة حقيقية ، يبقى الواحدة منا أكيد هاتلتزم بيها ، و ساعتها هاتقدر توضح لنفسها مدى حريتها ، و بالتالي هاتعرف تتحرك ، ثم ، هاتعرف توصل في لحظة ما لمناقشة القواعد الواضحة دي ع المدى البعيد

دي بقى ... سياسة مجتمع
- و سياسة دولة برضة على فكرة -

taty يقول...

كان الظن انها دمية؟
الظن كان و مازال و خايفة أقول سيظل
أن ليلى دمية
بس طالما ليلى قررت انها تكسر القيود و تنور الظلام
اكيد إنشاء الله صوتها هيوصل
و هيتحقق أملنا كلنا

LAMIA MAHMOUD يقول...

المشكلة الاساسية فعلا ان بنات كتير مقتنعيين انهم شيء قليل لمجرد انهم بنات

Bent Masreya يقول...

ايه يا شغف ده.. انتى كتبتى الجمل الخالدة فى تاريخ البشرية ،معتقدش ان فى بنت مسمعتش منهم كام جملة
اتصبحت واتمست بيهم

بجد بجد، لما اتكلمنا وكتبنا اتجسدت المشاكل قصاد عنينا.. دا فرق معايا جامده على فكرة

BaTaBeeT يقول...

e7na law we2efna w olna la2 w enena a7san mn keda(zai now keda) 7ana7'od 7a2ena we zeyada
way to go gurls

Epitaph يقول...

Applause رائعة بجد بجد

بس انا مش ح انزل الستار دلوقتي

لو المجتمع عندوا انفضام في الشخصية
يبقي يروح يتعالج
لان اتضح ان ليلي هي المتزنة العاقلة

Sampateek يقول...

نعم كلنا ليلي
انا مش مع تكبير الدماغ و التفويت
لو مع اول اهانة تلقتها ليلى وقفت وقفة جد
مكنش جت وراها الف اهانة
لازم ليلى تصرخ
و لازم الناس تسمعها
بوست جميل و جهد ملحوظ
احييكي
الي الامام يا كل ليلى

soosa el-mafroosa يقول...

زي ماتكوني عايشه معانا في بيتنا

يااه هو الموضوع منتشر قوي كده

ربنا يشفي المجتمع من حالة الفصام دي

بس تفتكري ان التناقض ده ممكن يكون بداية حاجه كويسة؟...ما هم زمان كانوا بيشدوا بس دلوقتي يمكن جواهم حاجه بتقول بحبحوها ..بيقاوموا بس بكره يستسلموا

في حدود الدين و الأدب طبعا

تحياتي

Violena يقول...

الكلام الازلى ونفس الجمل ونفس الازدواجية الموجودة فى كل بيت

متهيألى ان اهالينا كلهم كانوا فى مدرسة واحدة

اسلوبك جميل شغف
تحية طيبة

21arestoo يقول...

ياااااااااااااااااااااااااااااااااه
انا قليل جدا لما احس الاحساس ده
هوه فيه كده؟

حــلم يقول...

شغف/ليلى

استمتعت بالروعة اللى كتبتيها هنا

بجد كنت فقدت الامل فى بكره
فى انى ممكن اشكى وحد يسمع
يهتم يسمع
كفاية انى حاسة انى مش لوحدى
وكفاية انى اصبح عندى أمل

ميرسى لفكرك الحلو بجد

nirfana يقول...

هههههههههههههههههههه
والله أنها الحقيقة بعينها

فعلا هم يضحك وهم يبكي

أضحكتينى وابكيتينى فىآن واحد

tona يقول...

انا بسجل حضوري لاني معنديش تعليق علي كلامك غير اني بجد اتوجعت



ممكن اوي تكون القاعده هي اللي الشاذه .. مش شرط عشان اغلبيه يبقوا صح

arabesque يقول...

يا سلااام
انتي كتبتي دليل مهم نرجع له لمراجعة التراث الشفوي ل"تربية"و "كسر ضلع" البنات
جميل يا ليلى/شغف و الأجمل تفسيرك لده بأنه وجه آخر لسياسة الدولة
واضح إن كل سلطة بتتصرف بالشكل ده إنما الأساس هو مقاومة الخاضعين للسلطة و الخروج عن الصمت

bosbos يقول...

لو في قاموس لاكتر المصطلحات اللي وجهت لليلى طول عمرها هتكون كلماتك دي نصه

هيفضلو ورانا لحد ما يهبلونا بس خلاص ليلى بقى ليها صوت بترد وتقولا لااااااا بعلو صوتها

shababik يقول...
أزال أحد مشرفي المدونة هذا التعليق.
Ghada يقول...

الله عليك يا باشا!!!!!!!!!

عبرتي عن مكنوناتنا الخفية التي يتعذر التعبير عنها بجدااااااااااااااااارة

أيوة الله

مذاكرين من نفس الكتاب على رأيه!!!!!!

فعلاً، تكبير الدماغ هو الحل الأن، على الأقل علشان منتجننش

lastknight يقول...

هل تصدقينى لو قلت لك أن عيونى أغرورقت بالدموع و أنا أتخيل ابنتى الحبيبه فى موقف بطلة السيناريو الرائع الذى كتبتيه ..؟
فعلا .. نحن مجتمع ظالم .. كا و مازال ظالم .. عن نفسى تعهدت من البدايه حين رزقنى الله بأبنه كبكرية أولادى .. تعهدت ألا أسمح لنفسى بأن أعاملها كما عامل أهلى أختى من قبل .. و الله المستعان

The_invisible يقول...

هو أنت سجلت الكلام و بعدين كتبتيه؟
فعلا" أنت عبرت عن الواقع المنزلى و الذى أشعر تماما" به و لكن لا أعتقد أنه سيصل بى الحال لأجبر على الزواج .
يجب أن نوصل رسالة الى ألاباء و الأمهات أننا لا نريد دلعا" و لكننا نحتاج حنانا" . نحتاج أن نسمع منهم كلمة اطراءو لو كانت نفاقا". بصراحة أمى هى التى تخفف عنى جمود أبى و لكن دائما" رأيها فى يوجعنى و لكنها تصر أنها لا يمكن أن تنافقنى لأن من واجبها أن تكون مراّّة لى...أترون نحن نحتاج الى تغيير للفكر قبل كل شىء

BaTresYa يقول...

خلتيني أدمع ..مش علشان الكلام دا سمعته قبل كدا لأنكـ فكرتيني بكتير زميلات واصحاب حسيت بيهم كدا بالزبت مش قادرهـ أمسكـ دموعي بجد لأن الموضوع دا شفته في حكاوي كتير بس الحمدلله عمر ما اهلي قالوا لي حاجه منها كلامكـ عمل زي شريط سينما وفلاشه

sha3'af يقول...

taty:
و غالبا مش هاتظل طالما بدأت تتكلم و تقرر انها مش دمية


لمياء:
لانهم أقنعوهم بكده ... غسيل مخ من مراحل الطفولة الأولى
يبقى ده الطبيعي معاهم
و زودوا على أسباب الاحساس بالدونية ( لأني عربي / مصري ) سببا آخر ( أنا بنت )



بنت مصرية :
ما تتصوريش أنا قعدت أضحك قد ايه لما قريت تعليقك ، فرحت بجد
" ايه ده ؟ بقى الحاجات اللي كنت طول عمري بتغاضى عنها و بأتحرج اني أذكرها مع أي حد ، عامة و موجوده بالشكل ده ؟ أنا مش لوحدي يا جماعة !!! دي مشكلة عامة بقى!! "

فرق معايا جامد أنا كمان يا زيزي



بطبوطة
مع اني بتجيلي أرتيكريا م الكتابة الفرانكواراب دي ، و غالبا بعدي عليها و ما بقراهاش ، لكن بما انك ليلي و مشرفاني هنا ، فالصعب يهونلك يا جميل
احنا على فكرة قولتنا لأ هاتبقى بالعمل زي هنا كده
هاتبقى بتجمعنا و مساندتنا لبعض يا أحلى ليلات في العالم



ابيتاف:
فعلا ... اتضح ان المجتمع هوه اللي ناقص عقل و دين

sha3'af يقول...

المشكلة دايما ان الاهانة مش بتبقى واضحة كاهانه، بتبقى متخفية تحت شعارات " احنا خايفين عليكي" " انتي مش عارفه حاجة في الدنيا و احنا عندنا خبرة و بننصحك " " انتي عاوزة تضيعي مستقبلك و احنا اللي هانحميه " " عشان النس تحبك " .......... الخ التبريرات المجتمعية / الأهلية / و الذكورية اللي بيمرروا بيها أي اهانة أو تحبيط أو تكسير مقاديف

بالظبط زي مثال الدبة المشهور اللي عشان تهش دبانه عن وش صاحبها ضربته بكفها ضربة جابت أجله


و على فكرة المقصود بتكبير الدماغ هناا عدم الانصات من أساسه لأي كلمة أو جملة يمكن أن تثير الاحباط أو الضيق أو التقيد ... و هذا في حالة عدم استعداد الطرف الآخر لسماعك

لو حد بيقعد يتهم يتهم و اني " بتحاولي " تدافعي و بتغلبي في ده ، عنفه في الاتهامات هايزيد ، و في نفس الوقت هاتباني أكتر في موقف المتهمه المذنبه اللي عليها تدافع عن نفسها

تكبير الدماغ معناه ببساطة الترفع انك تكوني موضع لاتهام او لاهانه من أساسه
ساعات بيبقى الصمت أو النظرة همه أبلغ رد من غير أي مجادلات عارفين مسبقا انها عقيمة

جربي كده لما حد يضايقك بكلامه اللي مالوش أساس تردي عليه بالكلمة دي " أنا مش هارد عليك " ... و شوفي بقى ازاي الوضع هايتحول


سوسه المفروسة

mafrousa@ yahoo.com
ده ايميلي ع الياهو ... عشان تعرفي اننا زمل مش في ليلى بس

بصي يا ستي
أنا مش مع فكرة ان التناقض ده بداية لأي شيء كويس ، حتى لو قالوا زمان حاجة و دلوقتي بيقولوا حاجة تانية تبدو أكثر حرية
ليه بقى؟ عشان الشيء اللي مالوش أساس بيقع هوا
أنا ماعنديش أي اعتراض ان أبويا و لا أمي و لا خطيبي أو زوجي مستقبلا يقولي اعملي كذا و بلاش كذا ، بس بشرطين : الأول ان " الكذا " ده يكون له سند من عقل أو منطق أو دين
مش اعملي عشان فلانه بتعمل ، و لا اعملي أو ما تعمليش عشان الناس بيقولوا كذا ، و لا عشان أهوه كده و خلاص و أنا مزاجي كده... لو حصل كده في بيوتنا كلنا ، عمرك ما كنتي سمعتي عن جواز عرفي ، و لا عن بنت بتخرج من بيت أهلها بلبس و تغيره تحت بير السلم ، و لا كات واحدة قاست مع جوزها و لا مع أهلها ، و لا كانت " كلنا ليلى " اتعملت من أصله

ثانيا طبعا ، انه مايكونش القصد بيه الاهانه المستترة
ناس كتير اتعودت انها تنتقد و بس ، تحس بزهو كده لما تهين اللي قدامها ، لان في ده احساس ضمني " انا أحسن و أعلى منك و أنت لا شيء " ، و تلاقيهم بيلبسوا الحق بالباطل بصورة مذهلة

sha3'af يقول...

فيولينا
يا ريت بس ما نبقاش زيهم ، و ماندخلش المدرسة بتاعتهم ، لأن كتييييير من ده بيتنقل منهم لينا زي العدوى ، و بيبقى أسلوب حياة على فكرة
الحل : استمع جيدا .. أنصت لمن تحاور ... حاول أن تتفهم و تفهم ... و ناقش بموضوعية و على أسس واضحة


أريسطو باشا
انت شاعر مش شاعر بأي حاجة على كدة
و ان كنت أشك ان كلامك تريقة
بس المهم ، هوه ايه كده ده اللي انت مش حاسس بيه؟


حلم / ليلى
" يهتم يسمع "
هيه دي الكلمة ! ، الغالب ان مافيش حد مهتم أصلا غير بإملاء تصوراته و قرارته - حتى اللي مالوش لا ناقة و لا جمل في الموضوع - سواء كان قريب أو حبيب أو أب أو معلم
و كأن وجودنا خلاص انتفى - كجيل كامل على فكرة مش ليللات بس ، بس الضغط بيبقى أوضح على ليلى
احنا خلاص مش لوحدنا ، و أكيييد فيه أمل .... و حلم يا حلم

film69 يقول...

حلوة قوي يا ياسمين
قاسي لكن نافذ
طب النص ده مش كان ممكن تكتبي ده خارج كلنا ليلى ؟ا
عموما أنا كمان فكرت في كلنا محسن ، بس لسه شوية علشان الحر
ليه محتاجين حملة علشان تعبروا عن اللي عايزينه
ابتديت أنا كمان أقول أحنا ,انتم
بجد .. عيب

غادة الكاميليا يقول...

مش قلتلك يا ليلى /شغف
هما دول الليلات بجد انتى كده تمام والمصحف يابنتى قولتي كلام ملهوش حل وصوتك اتسمع بجد
بس احنا قررنا نغير ونتغير ونغيرهم ولو المجتمع معترض يشوفله بلد تانيه علشان احنا مش هنسيب هنا

sha3'af يقول...

شبابيك
وجودك منورني بجد
أنا معاك جداااااااا
و ده اللي أنا شايفاه ، انها هموم مشتركة لجيلنا كله
بس الفكرة ان ليلى متعرضه ليها أكتر
الولد ممكن جداااا عشان يهرب من ده يفضل من أول النهار بره و مايجيش غير ع النوم ، ليلى تقدر تعمل كده ؟
الولد سهل جداا يلاقي أصحاب حواليه ، لو نفسه يروح في حتة هنا و لا هنا هتلاقيهم أول المشجعين و المحمسين ... لكن ليلى؟ غالبا تعقيدات كتيرة بتواجهها

الولد لو عمل اللي في دماغه و مشاه ، في الآخر هيتقال لأهله " سيبوه ، اعتبروه بدأ يتحمل مسؤلية نفسه ، خليه يجرب ، هايجراله ايه يعني "
لكن ليلى؟
أبسط كلمة ، لأ دي بنت ، انتوا مش خايفين عليها ، ازاي و مش ازاي ، و الناس يقولوا ايه ........ الخ ، الخ



غادة
لا يا حبيبتي و انتي الصادقة ، دول غاشين من بعض في الامتحان ، و اللي مغششهم أصلا ما يعرفش السما م العما
و بالتالي ، كلهم ناجحين ع الحروكروك - بدرجات الرأفة - و متخيلين انهم خلاص بقوا في القمة

MAKSOFA يقول...

بوست رائع ويستحق القراءه أكثر من مره ولايصح المرور عليه مرور الكرام

sha3'af يقول...

الفارس الأخير :

يا ريت باقي الناس ياخدوا عبرة همه كمان من اللي شافوه و مش عجبهم م اللي قبليهم



the _invisible
مع اني عندي عقدة م الناس اللي بتدخل انفزبل ع الياهو
لكن مرحبا بشبحك اللامرئي هنا

على فكرة نفس الحال برضه
الأم اللي بتخفف عن بنتها ، ومن ناحية تانية شايفة انها مش النموذج السليم

و الحال برضه لن يصل بي لنفس النقطة " الاجبار على الزواج " ، دي بالذات قدامها بحور دم ... و بيتهيألي المقاومة العنيفة اللي في البداية قلصت أي محاولات للتدخل او الضغط لحدودها الدنيا



باتريشيا العزيزة
منورانا
المناديل علينا على كده

sha3'af يقول...

فيلم 69

ممكن جداا يا سيدي يبقى خارج ليلى، المسألألة مش مسألة اننا محتاجين حمله عشان نعبر عن اللي جوانا ، المسألة مسألة اننا محتاجين نحس ان كل واحدة مننا مش لوحديها مش أكتر ...
المسألة مش مسألة احنا و انتم ، و لا كونا بناخد جنب و لا حاجة
بس مسألة اننا بنلاقي سبب ما للتجمع من اجله
ايه البديل مثلا ؟ كلنا مقهورون؟
لاحظ ان بالرغم من كل شيء ، فنفسية المرأة تختلف
دايما هيه محتاجة حد يساندها و يطبطب عليها ، و ماحدش ممكن يعمل كده غير واحدة زيها
ده الفرق الوحيد يا سيدي
و ده اللي لاقيناه فعلا مع بعض
و " كلنا ليلى " عندا فيك - فينك يا أيقونات الياهو _

sha3'af يقول...

غادة الكاميليا:

صح جدااااااااا
لو المجتمع معترض يشوفله بلد تانية
معاك يا ريس



مكسوفة :
لو مرور الكرام انه مايتقراش و يتم المرور عليه سريعا ، أمال مرور الناس التانيين يبقى عامل ازاي؟
( تداعي لغوي مش أكتر)

عنتر بن غلبان يقول...

فوق كل ما اعرفه عنك
انت كما تعودتك
صادمة
صريحة
وللاسف......مقنعة
كان من حقي اوصفك بالهوس والعنصرية بس للاسف كلامك مضبوط
واخرج بقي لان الكلام ده
"بين البنات"

أبو أمل يقول...

تنفع فيلم معتبر
لو اتعمل اعملى حسابى ف دور
انا عن نفسى حبيت
دور الطبلة
لووووم
لووووم لوووووم

غير معرف يقول...

استمتعت بالبلوج كاملا ..تحياتى بالنسبه لسؤالك عن فيلم فى التدوينه السابقه اسم الفيلم هوvoices from /هيثم من دبىwithin

غير معرف يقول...

voices from within

sha3'af يقول...

عنتر بن غلبان
و جبت حقك بوصفك ليا بهوس و العنصرية ده منين بالظبط؟
ممكن أعرف؟

أبو أمل
أهم حاجة انك ماتكونش بتمارس الدور ده في الحياة
حلو جداااااا انك اديت الكلام وظيفة موسيقية


هيثم
شكرا جزيلا جدا على اسم الفيلم و جعلك ذخرا للداتا بايز السينيمائي
بس استمتاعك ده يخصك
فين رأيك بقى اللي يخصنا ؟

توهة يقول...

رغم انى بنت بس بجد عايشه بأفكارى لوحدى وبكونها مع سنى ومليش فى حركة ليلى
بس كلامك اثر فيه
دخلتينى جوه غرفه مغلقه وسبتيلى شباك صغير مكتوب عليه كبر دماغك وفى نهايته طيرى وحققى طموحك
بس تصدقى حتى فى الهوا فيه غبار وعراقيل مفيش فايده ياشغف التعب طريق طويل والنهايه الحتميه هى الهروب من الحياه الدنيا الى الاخره وتظل النهايه غير معلومه
الحمد لله
ده مش يأس بس بحاول اشوف الدنيا على حقيقتها من غير اللمعه اللى فى عنيا
كروان

فاساليسا يقول...

ومالها الدمية؟؟؟؟
أنا أفصل بينى وبين الدمية
وأطعم دميتى من خبزى
وأتبع اشاراتها
وأصل

21arestoo يقول...

معلش اني باعلق للمرة التانية
بس اللي مش صح ف ردك على شبابيك انك متخيلة الولد ده عنتر
مفيش اي حد يقدر يقف قدامة ومفيش اي مشكلة ممكن تواجهه
بالعكس احنا دلوقتي بنعيش في مجتمع أنثوي بكل ما تحمل الكلمة من معنى
مش باتكلم على المجتمع التليفزيوني لأ انا اقصد كمان المجتمع البسيط مجتمع القرية فعلا البنت في اعتقادي ماعندهاش نص مشاكل الولد اللي البنات بيشوفوه في حتة اعلى
يعني لو البوست ده اتكتب من ييجي عشرين سنة كدة كان هايبقى اطول بكتير

عموما حتى لو الموضوع " بين البنات " فده مايمنعش ابدا اني احسه واحسه قوي كمان
عموما انتي اقنعتيني بعرضك للحالة رغم موقفك المنحاز وشوية حاجات تانية مش هاقولها عشان انا طولت قوي
اسف للا طالة

sha3'af يقول...

كروان :
معاكي حق في معظم كلامك
التعب موجود في كل حته ، و المشوار طويل و الواحد لازم يبقى أقوى من كده و لازم يطير حتى لو في الغبار و الشمس

بس صدقيني ، اللي ما بيعرفش يعيش ما بيعرفش يموت برضه

الحياة لحد دلوقتي هيه الشيء المؤكد اللي نقدر نتعامل معاه
و لو ماعرفناش نتعامل معاه و هربنا ، يبقى هايضيع منا أي حاجة تانية



فساليسيا :
أكذب لو قلت أني قد فهمت شيئا من كلامك

أريسطو :
مش عارفه ايه حكاية " أنا طولت "اللي انت طالع فيها دي
البلوج بلوجك يا باشا
و التطويل حاجة ما تزعلش أبدا - خصوصا هنا احنا مش هناك في الجامعة يعني-
و طبيعي في لحظات الانفعال يكون موقفنا منحاز للي احنا بنتكلم عنه
و منتظرة تقول الحاجات التانية عشان نعرف نتناقش عليها

syzef يقول...

(ما علينا)
بس المجتمع يابنتي انتي وهيّه خارج اصلا وكل واحد يعمل اللي هوّعايزه بس اتغيروا انتو اقصد اتغيرن انتن ومالكشنّ دعوة
واحنا هنقول برضه ما علينا

sha3'af يقول...

سيزيف
عسل
ما علينا

مهندس مسلم يقول...

انا اسف اني اتأخرت كتير على بال ما قريت الكلام الجميل ده

انتي فعلا قدرتي توصلي المشكله اللى موجوده ومتأصله في مجتمعنا وعلى فكرة القهر ده واقع على كل الابناء ذكورا واناثا ما بيفلتش منه غير بعض الذكور اللى هما اصلا مش متربيين كويس وعادة تلاقيهم بيمدوا اديهم على اهاليهم

طبعا انا مش بقول ان ده الحل

بس لازم كمان يكون في مساحة حوار والا عدد العاقين هيكتر كتير قوي

sha3'af يقول...

مهندس مسلم

الله يرحمه عمر بن الخطاب ، كان قال للراجل اللي بيشتكي من ابنه : " عققت ابنك قبل أن يعقك "

المهم
بيتهيألي بالنسبة لنا أهم حاجة ان الواحد يفهم الأول اللي بيحصل عشان يعرف يتصرف و يعرف ياخد موقف صح منه