احم -- احم
ده ليا طبعا :)
و للجهاز كذلك بعد الوعكة الصحية التي ألمت بسيادته
الغريبة بقى إني كنت بأخطط في المدة اللي فاتت اللي الجهاز كان عطلان فيها إني أعقل شوية كده و أركز - بتسكين الراء - ، و أركز - بفتح الراء و كسر الكاف - على نمط كتابة معين و أكبح جموحي ده شوية
و يمكن إني أبعد حتى عن جو النت كله لمدة معتبرة كده
و لا أخفيك سرا - بلوجي العزيز - إني كنت داخلة في مود كآبة و حزن غريبين كده ، ما لاقيتش نفسي بأطلع منهم غصب عني غير لما الجهاز عاد إلى وعيه
كنت هابدأ أفكر في إن ده ممكن يكون من أعراض الإدمان الانترنتي ، بس راجعت نفسي ولاقيت اني بأفتح النت في الشغل - ع السريع كده - ، بس برضة بنفس احساس الكآبة
ممكن يكون عشان الجولة اللي أخدتها في بعض المداونات النهاردة ؟
نور الخيال ، و البوست الأخير اللي هناك اللي مليان تفاؤل و إيمان و حب ؟
و جولتي في مجموعة اللينكات التانية اللى موجودة فيه ؟
و ممكن لأني لاقيت نفسي متحمسة للكتابة عن حاجات كتير افتكرت ان حماسي فتر ليها ؟
و ممكن لأني حسيت إني هنا في بيتي فعلا ، و إن البلوج فعلا شيء ضروري و حيوي بالنسبة لي ؟
حتة بأعرف أمارس فيها نفسي علنا - بكل ما فيها - و أدعي فيها تميزا في أحيان أخرى
اكتشفت ان فيه فرق كبير بين إن الواحد يكتب ، و إنه يكتب و هوه عارف إن فيه حد قرا اللي كتبه
هناك 4 تعليقات:
مساء الخير
بصي بقى أنا باجي هنا تقريبا كل يوم، دا من حوالي.... كتير، أنا اسف بس ذاكرتي مش قد كدا
كلام كتير استفزني للتفكير أو للرد.. مع اني مش عارف ليه هنا بالذات مش بعلق، في كلام تاني مليت و انا بقراه، المهم ان كله كلام قريته
الكام يوم اللي فاتو، بتوع الوعكة، مش كنت قلاقان بس كنت مستغرب، يعني حاسس ان في حاجة حادة بتحصل ايجابية أو سلبية، أتاريها طلعت .... تفتكري ايجابية و لا سلبية
حقيقي بيفرق كتير لما تعرفي ان في شخص ما في مكان ما بيقرا كلامك، و بالنسبالك في ناس بتستناه، دا .... مختلف، اه مشيها مختلف، عن انك تفضفضي أو ترغي مع نفسك و بس، مختلف كتييييير
التعليق بقى أطول من البوست، أنا آسف، و ربنا ينجي الكمبيوتر بتاعك من الوعكات القادمة
سلامي
m.r
مساء الفلللللل ياباشا
ده أتاريني مش انا لوحدي اللي بأعمل كده مع مداونات الناس :)
ههههه
بالنسبة للحاجات اللي بتحصل
فبيحصل
بس مش حاجة حادة مطلقا
تقدر تقول كده حاجة هاديييييييية و متوغلة
كلها متماسة مع نظرة الواحد لنفسه ، للناس ، للأشياء
زمن الأشياء الحادة انتهى ، و ثبت عدم جدواه :-D
وعكة صحية للجهاز ؟
مش ملاحظ انها زي جمل نشرات الأخبار ؟
مجرد يافطة - حقيقية أكيد - بس شايله وراها حاجات تانية
على فكرة ، بلاش تيجي هنا كتير تاني ، عشان الحاجات المملة ممكن تكتر
يعني
على اعتبار اني بقيت معتبره البلوج صاحبي اللي ساعات بأهييس عليه من غير شعور كبير بالتطفل أو الثِقل أو الخوف من عدم الفهم أو عدم التواصل
و هوه يا عيني صابر و مستحمل
أو يمكن
على اعتبار اني بأحاول أحط صورتي كاملة من غير رتوش
فعادي بقى
على فكرة
التعليق لما يبقى أطول من البوست غالبا بيبقى ظاهرة صحية :-D
مش محتاجه أسف مطلقا
ثم يعني لو الواحد ما اتكلمش في الفضاء الانترنتي العريق ده ، هايتكلم فين ؟
ادعي للجهاز بذمة و النبي ، اصله كل شوية حاجة تحصل فيه
سلاماتي
كل سنه وإنتى طيبه ياشغف ..
والعيد الجاى تبقى مدونتك قااااااااااااد كده :)
الرفيق ليوناردو أخييييييييرااااا
لازم من دعك الخاتم السحري و استدعائك يعني عشان تظهر ؟ و حتى ما ظهرتش برضة ع المداونة بتاعتك
كل سنة و انتا أحسن يا عمونا
و السنة اللي بعد اللي جاية تبقى لسه موجود في مداونتك :-P
إرسال تعليق