شيء مفقود ( 3)

هاى

بأشكرك بجد على مجهودك
و أجاوب بقى على الأسئلة

أولا

أنا أشبه والدى فى كتير من طبعه زى العصبية والدقة فى كل حاجة

الشغل مثلا

برضو حساسه زيادة عن اللزوم بأتضايق من أى كلمة أو أى تصرف حتى لو مش مقصود
إنما بابا بقى ذكى جدا وذكى اجتماعيا وشخصية مرموقة فى شغله وفى العائلة
أنا بقى غبية اجتماعيا ومش ذكية قوى برضو

بس الحمد لله ، ماشية فى الكلية كويس لأنى بأبذل مجهود

بالنسبة لعلاقتى بوالدى متوترة دايما ، ودايما في خلافات

هو بيحب كل حاجة تكون مظبوطة

بالنسبة لى بقى عايزنى أتعين فى الكلية

وده صعب بالنسبه لى

كمان عايزنى ألبس خمار أو عباية أو كدة

دايما مش عاجبه البنطلون الجينز والميكب والاسبنش ، مع إننا ساكنين فى المدينة ومكان راقى

بس بابا بيحب الالتزام الزيادة ، بس الحمد لله انا لبسى محترم ومحجبة

طبعا كتير بتعرض للانتقاد من بابا لأنه دايما عايزنى أحسن ، وبتخنق قوى لما يقوللى فلانه أحسن منك عشان لابسه خمار وفلانه أحسن منك عشان الأولى على الدفعة وهتتعين

وأنا كنت زمان بأتضايق وبسكت ، بس دلوقتى بقيت أرد وأنتقد البنات دى فى حاجات تانيه

أنا أكتر واحدة فى إخواتى فى مشاكل مع بابا وماما ، مع إنى أقل واحدة فى الغلط

ثانيا

إحساسى إن محدش معجب بيه لسه من حوالى سنه

أنا وأنا فى ثانوى عمرى ما كلمت ولد ولا حتى ركزت معاهم بصراحة

كنت مركزة أكتر إنى أجيب مجموع عالى لأن صيدلة دى كانت حلم حياتى

كمان كنت عايزة أثبت نفسى قدام الناس كلها وأولهم ماما وبابا والعيله والكل

لما دخلت الكليه بقى اتصاحبت على بنات زبالة شوية وللأسف عرفونى على كل صحابهم الولاد

وطبعا الكل كان عايز يتعرف عليا عشان بابا طبعا

وبعدين كنت حاسة إن واحد معجب بيا وبعدين عرفت إنه بيمثل عشان أوصى عليه

الحمد لله قطعت مع الشله دى دلوقتى

سبتهم ومصاحبه شله محترمين كلهم وزى ما قلت كلهم بيقولولى انتى زى اختنا

بالنسبة لحوار تنكه ومغروره سمعته فى العيله كتير وكمان من صحابى وزمايلى ، بس مش كلهم --اللى بيقرب منى بيعرف على طول إنى طيبه ومش مغروره

دايما أول انطباع عنى إنى مغرورة وتنكه وبحب أرسم نفسى ، بس بعد كدة الناس تبدأ تفهم إنى أبسط من كدة
دايما صاحبتى الأنتيم تقول لى انت طيبه زيادة عن اللزوم وبتتفهمى غلط

وفى ناس بتقول إنى طيبه وهبله

أنا محدش قبل كدة حسيت انه معجب بيه

بس مرة ابن عمتى كانوا معزومين عندنا وأنا كنت عماله أتكلم معاه وأهزر فجه يقوللى بعدها إنه معجب بيا وإنه عايز يتقدم بس أنا قولت له لأ ، لأنى عارفه إنه صايع وبتاع بنات وعايز يرتبط وخلاص

فى الكليه بقى ، عمرى ما حسيت إن حد معجب بيا ، مع إن كل البنات فيه واحد واتنين معجبين بيهم وهم اقل منى جمالا

حتى اللى كنت معجبه بيه وصاحبتى الغبيه قالت له وهى عارفه ان أنا مبحبش كدة قال لها انى مش معجبه بيه ولا حاجه وانه هو اصلا انا برضو مش عاجباه

طبعا انا عملت الموضوع موضوع كرامه وقولت انها كدابه وقطعت معاهم هم الاتنين
الاتنين دلوقتى مش فارقين معايا خالص

الحوار بس انى ايامها كنت بتضايق اوى

انا مش بدور على اى حد اعجبه و ارتبط بيه طبعا مش أى حد بيعجبنى لازم صفات معينه

كمان لان فى مشاكل كتير بين بابا وماما

فانا لا زم اللى هأرتبط بيه أشوف طبعه وميكونش عصبى وصفات كتير

انا كمان بحب كاظم الساهر جدا وأتمنى واحد احساسه زى كاظم

طبعا الموضوع مش انى عايزة حد يعجب بيه وخلاص ولا نفسى ارتبط وخلاص

انا بس مستغربه ومتضايقه انى مش بعجب حد ولا كدة

طبعا الكلام دة عمرى ما قولته لحد

فى حاجه تانيه انى بجد محتاجه حد يحس بيا ويفهمنى قوى

ماما مش فاهمه طبعى قوى ولا بابا كمان

فى ناس زمايلى ولاد وبنات بيقولوا عليا معقده

يمكن لأن المشاكل اللى فى البيت ساعات بتخلينى عدوانية
كمان مرة كنا بنلعب الازازة فقلت انى مش عايزة أتجوز وإن الراجل دكتاتور

ليا واحد زميلى هو صاحبى قوى ، لأن طباعه قريبه من طباعى حساس وعدوانى جدا

وكمان هو قلبه اسود وموسوس

بس هو الوحيد اللى دايما فاهمنى

هو دايما بيقوللى انى زى اخته وانا كمان بقوله كده
بس بجد خايفه أعجب بيه لان أنا بأفكر بعقلى طبعا ، وهو مش مناسب

كمان شايفنى زى اخته

وفى الاخر بشكرك بجد وسلام يا جميل

*************
بصي يا ( ن )

انتي لازم تعرفي حاجة مهمة جدااا

على الرغم من إن كلامك كله بيدور عن نقطة إن مافيش حد معجب بيكي من الولاد
و عن إحساسك بإنك أقل من زميلاتك اللي كل مواصفاتهم المادية : سواء شكلهم

أو مستواهم الاجتماعي
أو الدراسي / بيقول إنهم أقل منك فعليا
لكن مشكلتك الحقيقية مش مشكلة بنت حاسة بإن عندها نقص جاذبية ممكن تشد حد من الجنس الآخر ناحيتها
ممكن صحيح يكون ده فرع من المشكلة
لكن المشكلة الرئيسية اللي لازم نحاول إننا نحلها هيه مشكلة إنسانة حاسة إنها - بكلماتك نفسها - : "
عمرها ما حسيت انها عاجبه حد
و الحد ده اللي بنتكلم عنه موجود من زماااان
موجود في والدك ، والدتك ، و اخواتك
__ __ __ ___ _ __
والدك اللي
" بيحب المثاليه فى كل حاجه ومش بيقبل الاخطاء علشان كده صعب انك ترضيه على طول

غير انه عصبى جدا"
مش بيقبل الأخطاء
مش " بيقبل"
" القبول " ---- أكتر حاجة أي شخص في الدنيا بيحتاجها ، و خصوصا و هوه لسه طفل
و الأخطاء -- دي الشيء طبيعي جدااا اللي بيصدر عن البشر في طريق حياتهم
و طول ما احنا عايشين بنغلط و نحاول نصلح
و أكتر حاجة بنحتاج الناس يتقبلوها مننا هيه أخطائنا
لأنهم طبيعي بيتقبلوا الصفات الكويسة اللي فينا
مش معنى إنهم يتقبلوها إنهم يوافقوا عليها و يمرروها ،
لكن إنهم يحاولوا يساندونا إن إحنا نتجاوزها و يعلمونا - بحب و هدوء - إزاي نصلحها
------------------------------

انتي عارفة لو افترضنا انك لاقيتي حد دلوقتي يتقدم لك أو يعجب بيكي

و تبادليه الاعجاب ايه اللي ممكن يحصل ؟

اللي هايحصل ان مشاكل كتيير هاتثور بينكم ، و من حاجات تافهة جداا ،

و مع ذلك هاتحسي إنها بتجرحك جداااا جدااا

و أي كلمة ممكن يقولها هاتاخديها على انه بيتريق عليكي أو بيهينك
المشكلة موجودة جواكي بالنسبة لنفسك قبل ما تكون بالنسبة للناس من حواليكي

خصوصا و إنك أكبر إخواتك ،

و الطفل الأول في حياة أي أسرة بيعتبر - و معلش في التشبيه - أرنب التجارب الأولاني اللي كل طموحات و تجارب و تركيز الأسرة بيكون عليه

يعني غالبا أول ما والدك مارس مثاليته و كماليته الزايدة مارسها عليكي

انتي اللي النظر مركز عليكي أكتر من اخواتك لأنك الكبيرة ، و ده غالبا بيزود العبء أكتر و أكتر
و يزود الاحساس بانك أكتر واحدة مطلوب منها كل حاجة ، و انها اللي مش من حقها تغلط ،

و أي غلط منها بيبقى ذنب لا يُغتفر

ده غير إن إحساسك شايل البيت كله

والد عصبي عاوز كل حاجة صح و في مكانها ، و غالبا مش بيكلف نفسه يوضح إيه الصح بالظبط اللي هوه عاوزه

و والدة ضعيفة و طيبة و سلبية ، مالهاش تأثير قوي ، أو رغبات و إرادة معينة بتحاول إنها تحققها

/ أو يمكن كمان ليها رغبات مجهضة و حاسة بالقهر و عدم التحقق /

و مشكلات دايمة بتحسسك دايما ان فيه حاجة غلط

لو عاوزة رأيي فعلا :

فأنا شايفة " ن " جواها طفلة مقيدة ،

محتاجة تتحرر الأول قبل ما تدوري معاها ع البنت الناضجة اللي محتاجة حد يعجب بيها

محتاجة تحرري الطفلة و تخليها تتكلم و تشكي و تنفعل و تعيط ،

بعدين تطبطبي عليها و تحسسيها بالأمان المفتقداه ، و بالتقبل اللي هيه في عز الحاجة إليه

--------------------

كان فيه فيلم أجنبي اسمه تقريبا

A little princess

كانت بنت في مدرسة داخلية و بتتعامل كويس ،

كانت البنت متعودة تتعامل مع نفسها و مع اللي حواليها كأميرات ،

لحد لما وصل خبر بإن والدها توفى في الحرب و تم الحجز على ممتلكاته ،

و ماحدش عاد هايدفع فلوس المدرسة للبنت ، و لا حد ممكن يستلمها

مديرة المدرسة الجشعة استولت على ممتلكات البنت الصغيرة و حولتها لخادمة ،

وقالت لها انها خدامة دلوقتي و ما عادتش أميرة

البنت وقفت بثقة و ثبات و قالتلها إن كل البنات أميرات

مهما كان لونهم أو شكلهم أو مستواهم

و إنها لسه أميرة بالرغم عنها و عن ظروفها

و إن والدها كان بيحكيلها و يقولها كده و هيه صغيرة

و إنها مصدقاه

و سألتها سؤال حجرها في مكانها :" انتي عمر ما والدك قالك انك أميرة ؟ "

--------------------------------

للأسف اللي بيحصل إننا غالبا بنتحمل مشكلات و عقد أهالينا

وعلى العكس بدل ما يدونا الثقة في نفسينا بيسحبوها منا

بدل ما يحسسوكي بالتميز و انك حد مهم - بالنسبة لهم ع الأقل - بيحسسوكي بالتفاهة و انعدام القيمة

و انك دايما غلط

-------------------------------------

و على الرغم من إن بعض الاتجاهات بتقول

إننا لازم ننسى اللي فات و نتجاوزه و نركز على الحاجات اللي احنا عاوزين نحققها في المستقبل
لكن في إعتقادي

لازم اننا نستخرج أسباب الألم و الضيق و المحبطات بتاعة الماضي الأول ،

و نحاول إن اننا نحسها تاني ، و نحلها ، أو نتسامح معاها

أنا عاوزاكي يا ( ن) تركزي دلوقتي على الأوقات اللي والدك كان عصبي معاكي ،

أو الوقت اللي انتي غلطتي فيه في حاجة قبل كده ، و كان رد فعله عنيف
عاوزاكي تتكلمي بحرية و من غير إحراج
حاولي تفتكري كل حاجة و تكتبي عنها بالتفصيل
حتى لو حسيتي بالألم و انتي بتكتبي لأنك لازم تحرري الحاجات اللي مسببة دلوقتي في كونك
عدوانية و سلبية و غير واثقة في نفسك
لازم تواجهي لحظات ضعفك عشان تستمدي منها القوة بعد كده
-----------------------------------------
غير كده بقى
حاولي تاخدي جنب شوية من الشلة اللي انتي فيها دي
و مافيش داعي تشيلي من حد فيهم
ركزي على نفسك بس ، و انتي عاوزاها ازاي ، و عاوزة منها ايه
الشلة اللي انتي فيها حتى لو حاولت تساعدك ،

فإنها بشكل ما بتغرقك أكتر و تثبتك على الحالة اللي انتي فيها من الشعور بالنقص

و انك بنت " هبلة و ما بتعرفش تتصرف "
ده غير إن منهم " الصايعة شوية " على حسب تعبيرك
إنتي مش محتاجة تبصي للعالم أو تعيشيه بطريقتهم همه
انتي محتاجة لانك تدوري جوه نفسك ع اللي انتي عاوزاه بجد ، و تبدأي تمشي باتجاهه
محتاجة تبقي مستقلة و واثقة في نفسك و في تلقائيتك

يبقى احنا اللي هانعمله دلوقتي ممكن يتركز في كام نقطة مهمين :
1- حاولي تفتكري و تستعيدي كل المواقف السلبية اللي حسيتي انها بتضايقك من و انتي صغيرة لحد دلوقتي
و اكتبيها
و بعد كده هأقولك نعمل بيها ايه
عشان نبدأ نحررها من جواكي

2- احتفظي بصدق تصرفاتك - زي ما قلنا قبل كده - و خليكي على طبيعتك تماما ،

و أهم حاجة تكوني حاسة انك نفسك و انتي بتعملي أي حاجة ،

و مش مهم انطباعات اللي حواليكي عنك مهما تكن

3- انتي محتاجة تاخدي جنب شوية م الشلة بتاعتك دي لأنها واضح إنها مأثرة عليكي بالسلب ،

حتى في وضع صورة معينة ليكي حبسينك في إطارها ،

و لما هاتبعدي شوية هتلاقي انك بتشوفي الصورة أوضح بالنسبة لهم

4- حاولي تدوري على اهتماماتك يا (ن) و طموحاتك
يعني فكري كده --- انتي متخيلة حياتك بعد كده ازاي ، و عاوزة ايه منها ؟
و هل عندك اهتمامات معينة : الكتابة مثلا ، التمثيل ، الغنا ، العزف ، رياضة معينة -- كده يعني و لا لأ
و ياريت النقطة دي كمان تكتبيلي عنها

يالا سلام مؤقت

**********************************************

لو عندك مشكلة أرسلها إلى

shaghafon@yahoo.com

أو اتركها بالتعليقات