بتلف وترجع لصاحبها

* (وعلى البدايات ألا تأخذ أكبر كثيرا من حجمها وإلا صنعنا طواغيت جدد. )

 _______________

* (أعتقد أنه كان يجب عليَّ الخوض في التفاصيل المنهكة للروح على مدار العام الفائت ........... كان عليَّ الخوض في كل تلك التفاصيل كي أكف عن الحركة العشوائية في أي اتجاه ونحو أي باب يفتح... مهما كانت الاغراءات والحماسات المبدئية السطحية )

  _______________

* (....... ده كان مهم لاستكمال التجربة، ولمعرفة إن الواحد حتى لو قرر يكمل طريق ما، فمهما كانت التعديلات اللي هتتعمل كده كده البدايات غصبن عنه بتلقي ظلالها على التالي... عشان كده أحاول أبتدي صح وعلى أسس حقيقية مؤمنة بيها ... مش (على جرف) عشان (ينهار) بيا ...... (ألم تر إلى الذي أسس بنيانه على جرف هارٍ فانهار به؟ ) ... فماتعمليش كده تاني لو سمحتي.. )

_______________

* (Think Big)

 _______________

* ( اليوم ارتكبت خطيئتيّ المعهودتين – للأسف الشديد: 1) تحدثت عن شخص ليس موجود بسوء في غيابه / أو بما كان ليكره سماعه يقال للآخرين عنه إذا ما كان موجودا ... .... الاستياء المعتاد الذي صرت ألوكه كثيرا للأسف ... 2) خضت في التركيز على تفاصيل "الفشل" في المؤسسة التي أعمل بها .... والقائمين عليها ........ وطبعا أدركت بنهاية اغماسي في الخطيئتين مدى قبح ورداءة ما أفعل ... فالحديث السيء عن الآخرين – حتى لو كانت نواياه بريئة – هو تركيز على السيء في دواخلنا أيضا وإحياء له ومده بأسباب قوته... إضافة بالطبع للاأخلاقية الحديث عن الآخرين من وراء ظهورهم ، والتركيز فيما لايخصني، والحكم على الآخرين .. والأسوأ على الإطلاق: الكِبر الخفي ... والجو العام الذي تدعيه الذات بأنها أفضل من الآخرين أو الأكثر حكمة وذكاء ومهارة وتبصرا ... وفي هذا خرق وجهل ... إضافة بالطبع للمعلومة التي أعرفها جيدا في هيئة مثل شعبي : "من عيب ابتلى " وأكدتها لي اليوم رواية "قواعد العشق الأربعون " :  "الكلمات ... كلماتنا... لاتفنى، بل تظل عالقة هنا للأبد حتى ترتد إلينا مرة أخرى" ... أو كما قالت كلماتنا الطفلة دوما التي كنا نرددها بشكل تلقائي وإن كان دونما إيمان أو تصديق ربما " "الكلمة بتلف تلف وترجع لصاحبها" ... كم في هذه الجملة من بصيرة مدهشة ! كل ما تحتاجه فقط هي أن تقال بآداء آخر غير ذاك الذي التصق بها، وبنبرة صوت أخرى غير أصوات طفولتنا..)

         

 _______________

* (لو سمحتي ياياسمين: ماتحكميش على حد ... ماتحكميش على حاجة ... مرري الحاجات اللي ماتعجبكيش وحتى ماتتكلميش عنها ... وركزي بس على الحاجات اللي بتعجبك والحاجات اللي انتي عاوزاها .. والحاجات اللي نفسك تعمليها ...وركزي على شغلك انتي وانتاجك انتي مش في أوعية الآخرين أيا من كانوا ..)

 _______________

* ( يارب امنحني القدرة على أن أركز في طريقي ونفسي وحياتي وفقط... امنحني القدرة على كبح عنان نفسي كي لا أحكم على الآخرين أو على ما اختاروه لأنفسهم من طرق مهما كانت ... امنحني العزيمة والصبر والخشية والتقوى كي لا أتحدث عن أحد في عدم وجوده وكي لا أتحدث إليه بطريقة متعالية أو مُدِينة ... اللهم ... اجعلني أدرك دوما أن ما بي من نعمة ...... فهو من نعمتك وفضلك ليس إلا... وأني مجرد مرآة تعكس ما ألقي إليها من أشعة فضلك ورحمتك. آمين) 

سطور_سبتمبر 2014

توازن

* (أفضل ما في العلاقات الجيدة المتزنة هي أنها تزكي إحساس المرء بقيمة نفسه وكبريائه وعزته... لا تقلل منه ومن حجمه... العلاقات الجيدة تحرر لاتقيد ... تصبح عونا لا عبئا ..)

  _______________

* (والأهم من أي شيء هو أن أصنع أنا التميز الذي أبحث عنه... أن أصنع شيئا فارقا يمنح الروح أشياءَ وأشياء... ويمنح كل من يراه المتعة والشغف والوعي ويجعله يرى بشكل مغاير ... )

___________________
سطور_أغسطس 2014

شوفي وشمي ودوقي وحسي وانغمسي .. تشرنقي

* (....كان المفروض ما أظهرش اهتمام كبير ولاأهتم وأتحمل مسؤلية الدنيا فوق دماغي وبتاع .... وإن الأفضل دايما إن لو عندي فكرة فأكتبها وأحتفظ بيها على جنب لحد لما ييجي وقتها فأقدمها.. وما أقودش الموضوع كده إلا لو كان في إيدي قيادته واقعيا وفعليا... ..... لكن غير كده فالناس بتكش أصلا من حماسي واندفاعي واهتمامي وبيتخضوا وممكن يحسوا إنهم مش قده فبيتراجعوا ..وأعتقد إن ده هوه نفسه اللي حصل لـ ( هـ. أ) برضو لما لقى التدفق ده للحماس والاهتمام والثقة وماسورة اقتراحات جديدة ومااتعملتش قبل كده اتفتحت.. فطبيعي يخاف ويكش ويفكر في كل الوسط اللي حواليه هيبقى رد فعلهم إيه (إذا كان هوه نفسه اتخض كده فما بالهم همه؟) ..حاولي تتحكمي في حماسك وهوسك بالشغل شوية ياياسمين... وبالراحة ياماما... الدنيا مابتمشيش كده .. ووجهي إيقاعك المتحمس ده ناحية الحاجات اللي انتي المسئول الأول والأساسي عنها. ... ولا عند النقطة دي الحماس بيتراجع والقوة والاندفاع بيقلوا؟!  

شوية مصداقية شوية مع نفسك ياروحي.)

 _______________

* * عظيم إن يبقى فيه مرحلة قراية وبحث ع النت على الحاجات .. بس ماينفعش تكتبي وقدامك مقال نظري أو أفكار نظرية عن الحاجات.. ده بيعطل الإبداع .. بيشغل التفكير والحاسة النقدية وينشط الوعي قوي .. بس عشان تعملي شغل مختلف وفيه روح فانتي محتاجة  حالة غياب مش وعي حاد .. محتاجة تتاخدي في الجو اللي بتكتبي فيه وتشوفيه وتشميه وتدوقيه وتحسيه وتنغمسي في تفاصيله وألوانه وأصواته وصخبه .. مش تشوفيه مجرد فكرة نظرية جامدة حتى ولو كانت فكرة عظيمة ومالهاش حل إلا أنها تبقى بلا روح ...

والإبداع يعني روح... ما تخططيش لكتابتك .. ده ماينفعش معاكي .. ممكن يكون مفيد لناس تانية لكنه مش متلائم معاكي نهائي بالعكس مضر ليكي... انتي محتاجة تشتغلي بتلقائية وانتي سايبة ايديكي ومغمضة عنيكي ... اعتمدي على حدسك لإنه قوي كفاية إنه يشيلك .. أقوى حتى من عقليتك المحللة ومن ذكاءك.. ويمكن يبقى هوه أهم ما في ذكاءك أصلا ... فماتضيعيش الغالي بالرخيص والعزيز بالمتاح والتقليدي..

ولو فكرتي تشقلبي النص وتجيبي عاليه واطيه وتحذفي وتنقلي وتزودي فاعملي ما يتراءى لكِ واتصرفي بحرية كاملة ومن غير خوف أو تردد.. اتصرفي بحرية وجرأة وشجاعة وانطلاق.. وإن شاء الله خير ... (اكسري الحواجز النفسية بينك وبين العوالم – كما هو معتاد   J )

 _______________

 * (نفسي أغيب وأستغرق في نوبة كتابة طويلة...)


سطور_يوليو 2014

اختيار وسحر غير مباشر

* (الناس كلها بتتكلم حلو قوي ... بس الكل بيكدب وبيهيس .. معتمدين على الذاكرة السمكية للآخرين..)

  _______________

* (محتاجة آخد نفسي بجدية وحزم وانضباط أكتر من كده ... وأبطل استمراء لحالة الكسل والسكون وتضييع الوقت ... وأعمل حاجة بقى)

  _______________

* (حلمت ...أني أقول /أو يقال لي/ أن الغناء قوة... )

 _______________

* (لا تبيعي هيبة الصمت بالرخيص من الكلام)

  _______________

* (تاااني... لا تذم ولاتشكر غير بعد سنة و6 أشهر)

  _______________

* (... ولازم أبقى أكثر إيمان وتبني للفرضية الأساسية لـ "فردة حذاء واحدة تسع الجميع" : السحر غير المباشر اللي بياخد وقت طويل وجهد عقبال ما يتحقق ويعمل نتيجة ... اللي زيه زي الزرع .. بيتزرع ويتروي ويتعب عليه بصبر وبينمو ببطء غير ملاحظ لحد لما فجأة نلاقي محصول كبير وقوي.. وأعامل الناس على قدر عقولهم وقدر اللي يعرفوه واللي اتعودوا عليه (ومن غير تقطيم) .. وأقدر إن خبرتهم في الحياة هيه اللي خلتهم كده.. والأنظمة الفاسدة اللي همه كانوا نتيجتها – حتى لو كانوا بيتنططوا زيي كده وفاكرين نفسهم مختلفين وثوار وضدها – خلتهم كده من كتر تعاملهم معاها واضطرارهم لمجارتها عشان يكونوا جزء من النظام ويقدروا ياخدوا ولو بعض امتيازاته.)

 _______________

* ("أفأنتَ تُكرِهُ الناسَ حتى يكونوا مؤمنين؟!" .. أراه غير عقلاني أن يحاول شخص ما أو جهة ما إجبار أحد ليؤمن بدين ما، ومع ذلك أحاول ممارسة نفس هذه غير العقلانية وأحاول إكراه الآخرين ليؤمنوا بقيم ما أو يتبنوها في سلوكياتهم !!!!)

 _______________

 * (بحس دايما بالذنب كل ما أقرا الحاجات اللي نزلتها م النت عن "الاختيار" وأقرا إن من حق كل بني آدم إنه يتصرف طبقا لاختياراته الخاصة وإن كل واحد يعرف إيه هيه احتياجاته ورغباته وأهدافه ف الحياة وبالتالي مصالحه وكل واحد يقدر يختار الاختيارات الصحيحة لنفسه .. والحرية معناها رفض الوصاية ... ودعوة "جون ستيوارت مل" للتسامح وللسماح للجميع بالتفكير والتحدث والتصرف بوسائل قد لا نوافق عليها.  مفيش أسهل من تطبيق مباديء الحرية وحقوقها للبني آدم على نفسه ودعوة اللي حواليه ليها واحتجاجه دايما بيهم ... ومفيش أصعب من تطبيق ده على غيره... وإنه يضطر هوه كمان (للتسامح والسماح للجميع بالتصرف بوسائل لا يوافق عليها) .. )
_____________________________

يوليو 2014 _سطور

صومي عن التزيدات

* (... وبيتهيألي فعلا دي تجربة ثمينة جدا ولاتقدر بثمن أصلا لإنها حطتني بشكل واضح وحاسم قدام نفسي وخلتني أتحرك بمبدأ إني ما أعملش حاجة ولاأتحرك ناحية حاجة إلا لو كنت عاوزاها فعلا ومقتنعة بيها وبقيمتها وعاوزة أعملها هيه تحديدا ... مش كذا أو كذا.. (وأقدم وخلاص ويمكن تضرب معايا ) ... لإن كل فرصة معاها مسؤليات .. وكل فرصة بتفتح طريق بحاله مش مجرد خطوة والسلام..)

 _________________________

* (صعب قوي إن البني آدم يحاول تغيير الكون أو تغيير مؤسسة كاملة خصوصا بالسخط والغضب لإنهم بيبوظوا الدنيا أكتر وعمرهم ما صلحوها.. حسبه أن يفعل ما يستطيع فعله .. وأن يقترح على الآخرين ما قبلوا منه اقتراحاته ورؤاه... وغير كده يسكت ويركز في نفسه وف اللي بيعمله ويخلي شغله هوه اللي يتكلم بالنيابة عنه ويعلم ويُري الآخرين ما عجز هو عن التحدث به... وأبطل كلام عن مساويء الآخرين – أفرادا أو مؤسسات – فما هؤلاء كلهم إلا نتائج لنفس ذات الحلقة المفرغة .. وإذا كنت أرى في نفسي تميزا أو اختلافا أو بصيرة مغايرة منحني إياها الله عز وجل فلأثبتن هذا فعلا لا قولا ولا تذمرا ..)

 _________________________

* (مش محتاجة أشارك أفكاري ولا تصوراتي ولا خططي ولا طريقة تفكيري مع حد، خصوصا مع غير المهتمين.. ياريت ماأديش تفاصيل بعد كده لأي حاجة إلا إذا اتسئلت عنها... مش محتاجة أوضح مبرراتي ولا استراتيجية حركتي إلا إذا سُئلت..

فاكرة يا ياسمين لما كنتي بتعتبري إن أي حد يقولك اسمه من غير ما تسئليه عليه / أو تبقي مهتمة فعلا بده/ هوه تزيد وكلام مالوش معنى؟ انتي برضو أي تفصيلة زيادة بتديها من غير ما تتطلب منك تعتبر تزيد بالنسبة للي قدامك ومالهاش لزمة . جاوبي دايما على قد السؤال، وبس... واللي عاوز تفاصيل زيادة ومهتم يعرف حاجة زيادة هيسأل تاني.. )

2014 في سطور من يومياتي : _مايو

تركيز

* (وبالطبع أجد كاظم يرد "إني خيرتك فاختاري" فأقول لنفسي أنني أفقد كثيرا عندما أدع خياراتي بيد غيري... وأن عليَ أخذ قرارات واحترامها وتنفيذها .. وعليّ ترك مالا يخصني حقا.. )

 _________________________

* (النصيحة الأثمن دوما هي: مالكيش دعوة بحد وركزي ف ورقتك.)

 _________________________

* (أتذكر جدا ذلك الموقف – وإن كنت لا أذكر إن كان في أحد اختبارات الشفوي أم في إحدى المسابقات.... – كنا أربعة نجلس أمام الممتحِن .. يسأل سؤالا فيتدافع الجميع للإجابة ويتلعثمون ويتخبطون في محاولة مستميتة منهم لإثبات جدارتهم وللفت انتباهه بينما أحتفظ بثباتي وهدوئي واستقلاليتي وكبريائي.. فيتركهم ويلتفت لي تحديدا سائلا .. فيجبرهم جميعا على الصمت بينما أجيب بهدوء وثقة وثبات الإجابة الصحيحة .

وتاني تاني تاني : ..... ولن تمتهن إلا إذا تلهفت حقا ..وأفضل الأوقات والأوضاع دوما هي تلك التي لا أنتظر فيها أي شيء من أي شخص إلا من نفسي .. والتي لا أركز فيها ولا أتابع أحدا إلا نفسي وشؤوني وما أريد أن أفعل..)

 _________________________

* (البنت مش بشكلها .. البنت بإحساسها بنفسها )

2014 في سطور من يومياتي : _إبريل

أسرع أسرع

* (وتاني لازم أفتكر إن العمر قصير مهما طال، وإن طاقة البني آدم وحيويته محدودين ..

وعشان كده لازم يوجههم للحاجات اللي مهتم إنها تطلع فعلا وتظهر للنور قبل ما دوره يخلص وقصة حياته تنتهي. ) 


2014 في سطور من يومياتي : _مارس

مشاعر مادية

* ( وعلى آخر الزمن أحس بالغيرة من (قطة) ... قطة وراها قطة تانية بتحميها وماشية وراها وبتدافع عنها هجوم قطة تالتة ... يا بختها ... وعقبال يارب ما يبقى ف حياتي البني آدم اللي أحس في وجوده بالأمان والمساندة والراحة والمتعة .. نفهم بعض ونحترم بعض ونحب بعض ونبقى مستمتعين في صحبة بعض ... اللهم آمين.)

 _________________________

* ( ... "النظرات" والابتسامات و "العنين اللي بتبتسم" ........................ اكتشفت مع الوقت إن ده بيبقى تعبير وانطلاق للـ (الطاقة الجنسية) أكتر منه له علاقة بحب أو تآلف أرواح أو بإنجذاب عقلي أو إنساني .. ودي كلها حاجات ممكن تكون حقيقية ، بس مش بتعبر عن نفسها لا بالنظرات ولا بالاحساس بالتكامل والامتلاء لمجرد وجود الطرف التااني... والتعبيرات دي هي تعبيرات جنسية بتغرينا بيها الطبيعة ، وإحنا بكماليتنا ومثاليتنا الإنسانية بنحاول نضفي عليها طبايع وصفات تانية مش بتاعتها فعلا )

 _________________________

* ( وأنا جايه في المترو .. كان قاعد قصادي على الجهة التانية شاب كده وكان نايم ... وبعد اما صحي وأول ما انتبه لوجودي ابتسم ذات الابتسامة الحنينة المهتمة اللي كلها ود ... وتجاهلته طبعا ... وفكرت إن المسألة في المركز الفرنسي برضو لم تكن أكثر من (بنت أمورة كاوية شعرها وحاطة كحل وروج ومهتمية بنفسها وشكلها بنت ناس) ... (الشكل) لا الجوهر ولا الفعل ولا الروح ولا أي بتنجان ... بس بقى ... ........ أهم حاجة إن في اللحظة اللي يهتم بيها الآخرون بيا عشان شكلي، ما أركزش مع حد فيهم .. ولا أركز أنا كمان مع الشكل واللي بياخد في حالتي طبيعة ( النظرة والابتسامة وعمق الصوت) .. دي حاجات شكلية هيه كمان مهما كانت مميزة أو جاذبة أو بحبها ... إلا إنها تبقى في الإطار الشكلي ... الأهم من أي حد هوه تصرفاته أولا ومواقفه ... وقناعاته ومبادئه (دول أولا في واقع الأمر لكنهم ثانيا في الاكتشاف، لإن الكلام غالبا ما لا يعبر عنهم وغالبا الكلام خداع ولي فيما حدث بالنسبة لـ س أسوة ) ... وأكتشف الناس من خلال إبداعهم أولا ... )

2014 في سطور من يومياتي : _فبراير