شيء مفقود 8

اهلا شغف
بجد حلو جدا الاسلوب اللى قولتيلى عليه انى اتبعه مع اخويا
بس فى حاجه مهمه
ازاى انى اقدر اعمل حدود فى الكلام واجبر اللى بتعامل معاه سواء اخويا او غيره
انه يلتزم باسلوب معين وكلام معين
انا جربت قبل كده اقول لاخويا نقى الفاظك وكلامك بس كان بيستهزا بيا
ويتكلم زى ماهو عايز
الكلام ده مرة برضو حصل مع زميلى اللى كنت حكيتلك عليه
على فكرة انا مبسوطه جدا انى قطعت معاه ومع ناس كتير كانو زيه فعلا بيقللوا ثقتى
فى نفسى
وبجد بشكرك جدا
سلا م يا جميل

******************
بصي يا( ن)
لما تيجي تقولي لأي حد بيتكلم :
" نقي ألفاظك و كلامك ،
، ايه الألفاظ اللي بتستخدمها دي"
أو أي من الجمل أو الكلمات المشابهة ، فاعرفي إن الرسالة اللي بتتوجه له فعلا
مش هاتكون :
" من الأفضل أن تكون لغتك أجمل "
لكن هاتكون
كالآتي :
" انت شخص عديم الذوق ، متدني المستوى "
اللي هتتاخد كإهانة ، أو تعالي من اللي بيتكلم على المُخَاطب ، و بالتالي رد فعل المتوقع هوه السخرية و الاستهزاء اللي انتي اتكلمتي عليهم دول
ماحدش بيحب حد يحسسه إنه أقل أو أدني / حتى لو هوه فعلا كده ، و حتى لو الكلام مقصود بيه حاجة تانية فعلا
و عشان تكسبي حد ، يبقى لازم تطلعي من المنطقة دي ، من جواكي الأول ، قبل ما يكون من سلوكياتك
-------------------------------
طب نعمل ايه ؟
الأسئلة يا (ن) هي الحل
انك تسألي و تخليه هوه بنفسه يجاوب و يوصل للحاجة اللي انتي عاوزة تقوليها
يعني هنا مثلا
لاحظي اني قلت لك تبدأي معاه بسؤال :
انت قصدك تشتمني و تهيني ؟ و لا لبسي مش عاجبك فعلا و عاوزني أغير منه ؟
كمثال
، و ممكن تكملي الحوار كله بالشكل ده
تفتكر لو حد شتمتك و قالك اعمل كذا ، هاتحب تعمل اللي بيقول عليه ؟
عارف ايه أكتر حاجة ممكن تخليني أسمع كلامك ؟

كده يعني

ده هايوصله معلومة محددة مفادها : إنك عندك استعداد تتغيري في الحاجة اللي مش عاجباه قدام انه يغير الحاجة اللي مش عاجباكي ، و شرط ان انتو الاتنين تحترموا بعض

ثانيا بقى :
حافظي على ال
eye contact
بصي في عنيه و انتي بتتكلمي
ده بيدي مصداقية و جدية أكتر لأي كلام بيتقال
و كأنه نوع من الوعد الضمني اللي العين بتقوم بيه
غير إنه بيعمل تواصل حقيقي بين الناس ، و إدراك أكبر لإنفعالتهم و ردود أفعالهم

الأهم بقى من ده و ده ، إنك تحافظي على هدوئك و على صوتك هادي و نبرته طبيعية و عادية
مهما كان كلامه مستفز أو صوته عالي ، حاولي تمسكي أعصابك لآخر مدى و احتفظي بشعور كده بإن
" عادي -- مجرد مناقشة مش عاوزة أعصب نفسي فيها "

نقطة أخيرة :
الصمت ساعات بيبقى وقعه أفضل من الكلام
لما يخلص كلامه استني شوية كام ثانية كده قبل ما تبدأي الكلام ، عشان ما تتكلميش بانفعال
و وقت ما تكوني مش قادرة تكسبي بكلامك ، فاسكتي ، مش تندفعي في سكة مش عارفة فين أخرها
عشان ما تخسريهاش

اللي بأقولهولك ده محتاج تدريب و تدرج ، و مش هايجي مرة واحدة
بس أول ما تبدأي تطبقيه في مختلف المواقف في حياتك ، هاتبدأي تحسي الفرق

**********************

لو عندك مشكلة أرسلها إلى

shaghafon@yahoo.com
أو اتركها بالتعليقات