* يناير:
* (النهاردة افتتاح عرض "مراية" أخيرا
بعد انتظار وجهد وعدم وضوح رؤية لفترة، واستفزاز من ناس لفترة، وناس مش شايلة مسؤلياتها
لفترة، وناس جدعة جدا ومنجزة جدا في فترة ... والحمد لله بدأ الناس حتى من الكاستات
التانية بعد ما شافوا العرض يقولولي قد إيه لامسهم ، وقد إيه (حقيقي)... وافتكرت قوي
جملة أحمد العطار إن النص/ العرض بسيط ومباشر بس مش سطحي ... هوه ده: البساطة والعمق
في نفس الوقت.. وافتكرت قوي فيلم children of Heaven قد إيه الفيلم بسيط ومبني على حدوتة
بسيطة قوي وتفاصيل بسيطة قوي بس مع ذلك كان عميق ومميز جدا ... وأنا عاوزة أعمل حاجات
كده بقيمة الفيلم ده وطريقته .. وشايفة "مراية" بداية كويسة ..
وأصلا بعد ما كنت باصة لمشروع "رحيل السحابات والحرق "في فترة
على إنه مجرد (شغل) والمفروض أنتهي منه لإني بدأته.... .. دلوقتي اللي جوايا إن أي
حاجة أشتغل عليها أطلعها كويسة وحقيقية وعميقة ومظبوطة... وأشتغل بجدية وإخلاص. )
____________________________
* ( وغير كلامي مع منى، كنت بأفكر برضو في إن
الأفضل دايما إن الواحد يرتبط (على أي مستوى من الارتباط سواء شغل أو صحوبية أو حب
أو جواز) بالناس اللي متفاعل معاهم بشكل تلقائي... اللي تصرفاته بترضيهم، وتصرفاتهم
بترضيه بشكل تلقائي، من غير ما حد من الطرفين يبذل في ده مجهود قوي يعتبر حمل زيادة
عليه... وإن الناس اللي بتبذل مجهود قوي عشان تنجح علاقاتها ناس عظيمة وكل حاجة...
بس فيه وقت مش هتقدر تكمل فيه إنها تعمل ده .. )
____________________________
* (عارفة كويس قوي إني جهاز استقبال قوي – مهما كانت المسافات
– وإن لما حد بيقتحمني بالشكل ده سواء بييجي على بالي قوي أو أحس برغبة مفاجئة فيه
أو أحلم بيه بيبقى غالبا لإنه بيفكر فيا (وأنا بتبقى موجاتي اتظبطت عليه مسبقا) فبلقط
منه كويس جداا ... في حين إن العكس نادرا ما بيحصل... يعني نادرا ما عرفت أستحضر بنفس
القوة حد كده أو إني أبعت له أي طاقة من بعيد ...
طاقتي بتبقى في وجودي المادي وما يصدر عنه من أفعال وحركات
وكلام ... أثيريا معنديش القوة دي... )
____________________________
* (كنت لسه هقول "لو أعرف كده م الأول ماكنتش
رحت ..." .. بس أنا عارفة كويس إن ده مش صحيح .. عارفة إني كنت هقول "مايمكن" و"أنا هحاول" و "هعمل اللي عليا"
... إلى آخر جنود "الأمل" اللي مش سايبيني في حالي ... هيه تجربة وكان لازم
أخوضها .. وأكيد كنت ندمت لو كنت سبتها ولو ماكنتش اتقدمت ناحيتها .. كان لازم (أعرف)
... وعشان أعرف لازم تجربة .. وأديني بمر بيها أهوه ... فالحمد لله رب العالمين. )
2014 في سطور من يومياتي : _ يناير
ليست هناك تعليقات:
إرسال تعليق