هاملت و٣ عيون وعين رابعة حارسة لتعددية وجهات النظر

أكتر حاجتين انبهرت بيهم في عرض هاملت وثلاث عيون- Hamlet and 3 eyesye

١)

 الاختيار الذكي جدا لربط ال ٣ رؤى ل ٣ مخرجين خريجي الورشة .. ربط متاخد من جوه النص الأصلي - في اتساق مع فكرة التعبير عن اللي عاوزينه بطريقتنا من غير ما نزود كلام - وفعلا قادر ينقل بسلاسة مدهشة ما بين التراجيديا والكوميديا.. ما بين الرؤية الكلاسيكية والرؤية الحديثة الناضجة والرؤية الشبابية البسيطة .. وقادر في ذاته يبقى حيلة فنية بحبها شخصيا هي إن النص يبقى مفتوح زي الحياة لعدد لانهائي من إعادته كل ما يخلص مع شخصيات جديدة بظروف أخرى تنبيء عن نهايات متشابهة/ أو متناقضة ..

وهي اللحظة اللي هوراشيو في النهاية بيقول إنه هيحكي قصة هاملت للناس وهينقل اللي شافه وعايشه من أحداث ليهم .. فبيتحول المخرج اللي بيبدي رؤيته إلى شخصية جوه العرض .. فيبقى عندنا ٣ هوراشيو ب ٣ رؤى مختلفة..

وده ربط عبقري مش على مستوى الشكل بس، لكن على مستوى الطرح والمعنى.. إن "هوارشيو" اللي بيؤكد بمنتهى الإخلاص إنه هيوصل "الحقيقة" للناس ما هو إلا لناقل ل "وجهة نظره" هوه في الحقيقة.. مش بينقل الحقيقة ذاتها.. وإلا ما كانت "الحقيقة" قادرة تتبدى في أشكال متباينة كده..

والربط العظيم ده -حسب ما اتقالي- راجع للمايسترو : أ. عصام السيد.. Essam Elsayed

* 

٢) 

تاني رؤية لهاملت في العرض، ودي أكتر رؤية بتعبر عن مخرج ناضج.. عنده رؤية حقيقية مختلفة وما اتقدمتش قبل كده بيطرحها .. يمكن هنا إسلام الشاعر اختار إنه يبدأ من النص الشيكسبري وينطلق من حتة كان بيتم إهمالها غالبا ، ويبني عليها في إعداد للنص ..

وياخد من روح العرض الكلية اللي مستخدمة تقنية الإعادة لطرح وجهات نظر مختلفة..

ويقرر يلعب على اللحظة اللي الفرقة المسرحية بتقدم فيها "وجهة نظر" هاملت في الأحداث للملك والملكة اللي بينزعجوا ويوقفوا العرض ويطالبوا بإعدام الممثلين..

فيضطر الممثلين لإعادة المشهد وتقديم وجهة نظر بديلة تصلح لإرضاء السلطة تجنبا للقتل.. فبيقعوا بين إرهاب السلطة ليهم وإرهاب هاملت ليهم واتهامه لهم بالخيانة وب "سيفه" برضو.. فبيتحول الفنانين فعلا ل أراجوزات بيحاولوا يمشوا على السلك اللي يجنبهم الإيذاء .. وبينتفي الآداء الفني لصالح تحولهم لبوق دعاية معبر عن جنون السلطة وتحكمها في الأمور وتلويحها بالبطش أو بالنقود..

وبعد "وضعية جسدية" للممثلين فيها فخرهم بفنهم وشعورهم بتميزهم وإنهم بيعملوا حاجة مهمة، بتتحول وضعيتهم الجسدية لوضعية منسحقة "شحاذة" بتشحت "الأمان والسلامة" ... وإنهم اتحطوا في حقل ألغام مش عارفين يخرجوا منه!

بيقدم إسلام رؤيته بأسلوب الكوميديا السوداء وبطريقة سلسة وبسيطة ما تاخدش بالك أصلا إن مصاحبها كمية الوعي دي..

ده غير إن المخرج قادر يستخدم أدواته الإخراجية بحرفنة علشان يعبر عن معنى..

فنلاقي مثلا الملك عم هاملت داخل إيده في إيدك الملكة وهمه بيلوحوا للشعب، بعدين الملك ينتبه إن الملكة واقفة جنبه بتلوح للناس،فيبص ناحيتها بحدة للحظة.. بعدين يروح يقعدها بشكل يبدو لطيفويقف لوحده يلوح للناس..

في ثواني بسيطة.. ومن خلال الحركة وحدها قدر يعبر عن شخصية همها الاستحواذ على السلطة وتهميش كل ما عداها ، حتى السلمة اللي وصلتها للسلطة دي / "الملكة".. 

اللي هو "وااااااو" !! ده ما بقاش عرض تخرج خاالص! ده عرض مكتمل ناضج واقف على رجله وبيطرح رؤية ناضجة ومميزة .. وما تلاقيهاش أصلا في عروض لمخرجين شغالين بقالهم سنين وعروض مصروف عليها قد كده!

** 

المخرج الواعد محمد كسبان .. أكتر حد معجبة بشجاعته لقبوله التحدي الصعب جدا واللي قلة نادرة ممكن يقبلوه أو يكملوه لنهايته:

إن المخرج يقول رؤيته  بأدواته الإخراجية فقط .. من غير ما يلجأ لأي لعب في النص.. أو يضيف كلام زيادة عشان يعبر عن اللي عاوز يقوله..

أدواته اللي بيثبت تمكنه منها ومن قدرتها وحدها على حمل المعنى:

- خطوط الحركة واتجاهاتها

- التكوينات

- آداء الشخصية ودوافعها اللي بتقول منها الكلام..

إزاي يقرا ما بين السطور في النص ويقدر ينقله بحركة وآداء الممثل.. فيضيف معنى ومشاعر جديدة ما كانش سهل أبدا توصلها لو بس قريت النص أو شفت نفس الشغل لحد تاني..

مما يدل على كونه تلميذ شاطر لأستاذ عصام السيد.. ولقط جزء مهم من جوهر ورشة الإخراج المهمة لأستاذ Essam Elsayed.. يمكن ما كنتش معاهم في الورشة دي، لكن حظي الجميل خلاني أحضر ورشة مشابهة ليه في المسرح القومي السنة اللي فاتت وكانت برضو بتطبيق على هاملت وبتركيز على الفرق بين الإعداد والدراماتورج وشغل المخرج ..

وبعودة لعرض كسبان: عجبني جدا اللحظة اللي هاملت بيكلم فيها أوفيليا .. لما المشهد اترسم وهو بيوجه جمله مش بس ليها لكن لأمه بشكل أساسي في حالة حيرة ولخبطة مشاعر وقسوة.. وحب مع شعور بالخيانة ومحاولة تخطي الاتنين بالسخرية والقسوة ..

واللحظة اللي بولونيوس بيدعي إنه حذر بنته تبعد عن الأمير في نفس اللحظة اللي بيزقها فيها ناحية هاملت ببطء .. وإزاي الناس بتقول حاجة وتصرفاتها ونواياها الحقيقية بيقولوا حاجة تانية خالص..

وشعور أوفيليا بإنها لعبة أو قربان لطموحات أبوها اللي مضطرة تنفذ أوامره بإدعاء الابتعاد مع محاولات الاقتراب..

**

في العين التالتة في "هاملت وثلاث عيون"

إحنا قدام موهبة فطرية وحضور شخصي مشع وإيقاع فطري مظبوط .. ورغبة في التعبير عن الهم الشخصي، أكتر من كونه تطبيق لمهارات تم صقلها أو رؤية متمايزة لوضع ما (سواء شخصي أو عام).

يمكن ده أكتر عرض بقى الجمهور "كورس" مع العرض يضحك في لحظات معينة بنفس الدرجة ونفس المدى.. ويصقف في نفس اللحظة بنفس القوة ولنفس الوقت.. 

المخرج محمد مجدي عارف يظبط إيقاع التفاصيل، ويقدم قصة حب بسيطة ومعبرة عن شباب كتير.

العرض ده يعتبر تأليف تم استخدام مسرحية هاملت كعنصر جواه وتيمة خلفية مبنية حواليها القصة الأساسية في المقدمة للولد الجامعي اللي بيحب زميلته ومسؤولياته وتردده بيعوقه عن مصارحتها.. وبياخد مسألة إنه يذاكرلها هاملت المقررة عليها حجة عشان يقابلها ويقعد معاها.. ويقارن بين تردد هاملت وتردده وبين حب هاملت لأوفيليا وحبه لزميلته.

لطيف وشاعري.. ومتماس مع الشباب.. ومضحك.. وممتع.. ومناسب جدا في سياقه بعد رؤيتين واحدة منهم مرتكزة على الحرفية في استخدام الأدوات والتانية مرتكزة على رؤية مميزة.

**

العرض ككل من أوله لآخره بال ٣ رؤى اللي جواه عرض ممتع وملهم. 

ونشكر جدا مركز الإبداع وأ. خالد جلال على الدور المهم في ضخ دم جديد مميز للوسط المسرحي.. لإن أول وأهم خطوة في إتاحة الفرصة للشباب والفنانين هو إتاحة التدريب الملائم وإتاحة المساحة لمشروع يتم التطبيق من خلاله.. 

ونحذر ال ٣ مخرجين إنهم بادئين من مستوى عالي.. ولما يبقى ده مشروع تخرجهم، فمنتظر منهم في أعمالهم التالية إنهم ما يقلوش عن المستوى ده إن لم يتجاوزوه..

وخلونا نفتكر إن مركز الإبداع طلع منه مخرجين مهمين كتير منهم قدموا أعمال قوية جدا وفارقة في البداية ونالوا حماس واستحسان الوسط المسرحي وخدوا جوايز في القومي والتجريبي .. ثم للأسف بدأوا يكرروا نفسهم ويستهلكوا أدواتهم من غير تطوير ومن غير رؤية.. أو فضلوا إنهم يعملوا حاجات مسلية وخلاص.. تتشاف مرة واحدة وتتنسي.. زيهم زي بقية الناس.. أو اختفوا أصلا وما عادوش بيقدموا حاجة!

***

كلامي اللي فات كان مركز على المخرجين والتدريب فقط لأن العرض بالأساس مشروع تخرج للمخرجين دول.. 

لكن ده لا ينفي المجهود الجميل والمميز لبقية عناصر العمل المهمة من ممثلين لمصمم الإضاءة للمخرج المنفذ لمساعدي الإخراج.. 

وحابة أنوه عن الممثلين اللي عجبوني في ليلة العرض اللي حضرتها (يوم السبت)  

مع ملاحظة:

 ١)ده مش رأي عن الممثلين دول ولا عن الممثلين التانيين بشكل عام.. لكن عنهم في ظرف محدد وليلة عرض محددة.. ليه بقى؟

*

٢) عشان لو هنقيم ممثل بالذات فلازم نشوفه في أكتر من عرض، وفي العرض الواحد نشوفه في كذا ليلة عرض.. عشان نعرف إيه الثابت وإيه المتحول المتأثر بظروف ما 

*

٣) فيه ممثلين حضورهم هايل جدا ومشع كأشخاص.. لكنهم في الحقيقة ما بيمثلوش وما بيبذلوش مجهود اتجاه الشخصية.. ولو شفته في كذا حاجه هتلاقيه بيكرر نفسه .. هيبقى مبهر جدا لما بتشوفه لأول مرة، بس بتقفشه لما بتشوفه في كذا حاجة.. ولو كمخرج بقى لففت عليه أدوار المسرحية كلها هتلاقيه بيقدم نيرف الأب زي نيرف العم زي نيرف أحدهم.. 

*

٤) وفيه ممثلين بتلاقيهم طاقة وحيوية مادام الدور شبههم وبيحكي عنهم.. فيمارس ذاته الشخصية في التمثيل.. لكن لو حطيته في شخصية ليها متطلباتها الخاصة، بينطفي وما بتاخدش منه حاجة.. أو تلاقيه مدخل نفسه برضو في الشخصية اللي مش شبهه.. فنلاقي آداءات مش متسقة مع طبيعة الشخصية المتقدمة.. فممكن جدا ناس من اللي عاجبني هنا، يبقى رأيي سلبي عنهم كمجمل لو شفتهم في حاجات تانية

**

*

فالناس اللي كانوا طاقتهم مشعة / أو بيمثلوا كويس (نتيجة إني شفتهم في العرض نفسه في كذا دور) في ليلة العرض دي في العرض ده كانوا كالآتي (واعذوروني مش عارفه أسماء الناس كلها):

اللي عامل دور الجرسون (القصة التالتة) - محمد مجدي  (القصة التالتة) - رحاب عصام (القصتين الأولى والتانية) - اللي عامل دور هاملت في القصة التانية - اللي عامل دور هاملت  في القصة الأولى - رامي عبد المقصود  (القصة التانية) - محمد حافظ (القصة الأولى والتانية).

***

العرض مستمر لحد الخميس الجاي على مركز الإبداع الساعة ٩ م .. الدخول مجانا بدعوة من الشباك هناك

على هامش المهرجان

" لازم بطاقات دعوة للدخول "
يجيبني أحد القادمين من هناك ... لا أهتم ، و أواصل التقدم ... أنظر لقائمة العروض لأكتشف وشك الفيلم على الانتهاء ، لكن رغبتي في الدخول مازالت قائمة ...
" صحافة ؟ "
يسألني أحد الواقفين
" لأ ... "
" لازم بطاقات دعوة علشان تخشي ... و .... بصي ... تعالي ، أنا هأدخلك "
يقود الطريق أمامي لأجد أننا قد دخلنا بسلاسة دون أسئلةٍ من الحرس .... يفسح لي الطريق في قاعة عرض الأفلام ، أجلس و أجده قد جلس إلى جواري ...
" انتي بقى إيه علاقتك بالسنيما ؟ عاوزة تمثلي ؟ "
" لأ ... مش ينفع أبقى مهتمة و خلاص ؟ "
"بصي للفيلم و انتي بتتكلمي "
يرن جرس الهاتف متواصلاً بينما البطلة ممدة على الأريكة بيأسٍ ما
" يعني انتي مش عاوزة تدخلي المجال ؟ "
أوجه نظري نحوه ثانيةً : " يعني ..... بأحاول أكتب سيناريو "
أحاول معرفةً لكينونته ... تُضاء القاعة لأكتشف أني لم أشاهد شيئا
" حضرتك مين بقى ؟ "
" زي ما قلت لك " على " ، و من غير " حضرتك " ، و من غير " أستاذ " "
أُصر على معرفة كينونته
" واحد كان مهتم زيك ، و دلوقتي بقى شغال في تنسيق الحاجات دي "

..أراه سبباً معقولا لمساعدته إياي ....
" بأشتغل على طول في المهرجانات ، لو عاوزة تحضري أي حدث ابقي قوليلي بس و أنا أدخلك ... و أعرف ناس كتير في المجال ممكن يساعدوكي "
" عظييييييييم جدا "

" تحضري الندوة ؟ "
" عاوزة أبص ع المعرض اللي في قصر الفنون "

يفسح لي الطريق ، يتبعني ..يواصل أسئلته ، و أجد أنه لا ضير من أن يوسع المرء دائرة معارفه
أشعر بكفه على كتفي - عفوا بالتأكيد - أنكمش و أفسح المسافة بيننا ...
يقدم تحليلاته لي ما بين الحين و الآخر
ندخل إلى القاعة ، أشعر بكفه ثانية على كتفي - عفوا ربما - أنكمش على ذاتي أكثر و أُسرع خطاي
" انتي مهتمة بإيه بالظبط ؟ أنا حاسس إن عندك طاقة جامدة و إن جواكي مليان "
" عادي ... بالفن عامة "
" و الحب ؟ حبيتي قبل كده ؟ "
على خصوصية السؤال ، لم أُفجأ ، فقد أصبح من الأسئلة الشائعة هذه الأيام التي يعتقد السائل أنه يكسب أرضا إضافية بها مع من يسأله .... أجبتُ و أنا أعرف أن إجاباتي كلها لا تعني شيئا .. فهي إجابات تقريرية مسطحة لأسئلة أعاملها باعتيادية

" وريني إيدك كده "
أبسط كفي بتلقائية أمامه
" إيدك عرقانه "
يمسك كفي ... " و باردة " ..... أسحبه بسرعة
" انتي عصبية شوية ، مش كده ؟ "
" باين عليك قاري كويس في علم النفس " ... يصور بعضا من اللوحات ، أتركه إلى حيث قاعة أخرى ... أجده خلفي ...
" سوسو " .... أتجاهل طريقته في النداء
" سوسو " ...... بالتأكيد ليس هذا اسمي
" سندس " .... ألتفت نحوه ...
" صوريني جنب التمثال ده "
أضبط كاميرا هاتفه النقال ، و ألتقط صورة له
" الصورة بعيدة كده ليه ؟ تعالي لما أصورك جنب اللوحة دي "
" شكرا مش عاوزة "

" طب إيه بقى يا " حُبي " اللي منتظراه من الحب ؟ "
أتجاهل طريقته في السؤال وأتركه إلى الجانب المقابل من القاعة
" انتي بتخافي من الناس ، صح ؟ حتى خفتي لما لمستك"
"ما بأخافش و ما بأحبش حد يلمسني ... "
" ليه بس يا " حبيبي " ، خليكي فريش كده "
" لو سمحت ما تستخدمش اللفظ ده معايا "
" ليه ؟ بتتكسفي ؟ "
" بأحس بس إن الناس بتبتذل الألفاظ أكتر من اللازم .... لازم أروح على فكرة ، أنا اتأخرت "
" هاوصلك ... تعالي من هنا "
أتبعه صعودا و هبوطا بين القاعات التي يفضي بعضها إلى بعض ، لنصل إلى طريق مسدود
" غلط على فكرة ... السكة الناحية التانية "
أتقدم الطريق و أسبقه بمسافة كبيرة ... باب الخروج أخيرا .... أجده خلفي ، و أشعر بكفه على كتفي ، اقف و ألتفت إليه بحدة ، و أنظر إليه بحسم :
" لو سمحت إيدك ما تلمسنيش تاني "

بعض أنظار العاملين تلتفت نحونا
يؤخذ ... يتراجع قليلا ... أسير ، ثم أجده ورائي من جديد :
" يا بنتي عيشي حياتك ، مش تبقي قافلة على نفسك كده ، انتي انثى ... بنت جميلة و جذابة ، ليه بتتعاملي كده ؟ "
" ما ينفعش أتعامل على إني إنسانة بتعامل بني آدمين ؟ ما ينفعش أحافظ على خصوصيتي ؟ "
أتعثر في أحد الحواجز الحديدية و أسقط ...
" شفتي توترك عمل إيه ؟ "
يُخرج منديلا و يمد يده ليمسح وجهي ... أتراجع خطوتان ، لكني آخذ منه المنديل
" خلاص خلاص ... أنا هاسيبك تكملي لبره الأوبرا لوحدك ، سلام ؟ "
يمد يده نحوي ، أنظر له وهلة ، ثم أسلم عليه بقوة تناقض دفء يديه و ليونتها ... ألمح دهشةً ما على ملامحه ، و تساؤلا كاد أن ينطق به لولا أن سبقته خطواتي على كوبري قصر النيل ، و أنا أتنفس الهواء الليلي المنعش و أتأمل إنعكاسات الأضواء الملونة و الموج الهاديء يؤرجحها على سطح النيل .

خلاص

البنت الفرنساوية كانت تحب الرجل ... الرجل كان يحب البنت الفرنساوية .. من الصباح حتى المساء .
يفطران مع البحر ، ترحل أحاديثهما المشتعلة مع موجه .. يُشهدان كل الأماكن على قصتيهما ... تغفو بذراعيه بينما يضع حبات العنب بفمها تحت الشجرة ... يرقصان طوال الليل ... تترك على خده قبلة سريعة كي تلحق بطائرتها .
في الصباح ... تترك على جبينه جدتي قبلة ، تتفتح عيناه ، يبتسم لها ، و تتلون في عينيه النظرة بالمتناقضات وهو يعلم أنها لن تسأله أين كان بالأمس ، و لا من تلك البنت الإفرنجية التي كانت معه ... فقد كانت تعرف ..
قالت - عندما كبرتُ قليلا ً و سألتُها -
: " أنا مالي باللي راحت و اللي جت ؟! اللي راحت راحت ، و اللي جت كلها يومين و تروح ، مادام جدك كان بيرجع ينام وسطينا بالليل ، يبقى خلاص. "

اقتناصٌ ليلي

انتفضتُ من مكاني بسرعة

وقعت أشيائي على الأرض ، فلم أهتم ... هرولت لأغلق النور ، و فتحت الشباك على مصراعيه

كنّ ثلاثة تقفزن و تدُرن و تصحن بنشوة :

" الدنيا بتمطر ، و عزيزة بتنشر "

مددتُ ذراعيّ بأقصى ما أستطيع ... كان المطر يتساقط حقا بغزارة تناقض ذلك الهواء الكسول الذي لا يستطيع مداراةً لرائحته الصيفية

جعلت المطر يصافح وجهي و شعري ، و لم أبالي بدخوله الغرفة أو تسلله إلى السرير

مرّ نظر إحداهن بي ، انتبهت لوجودي فابتسَمَتْ خَجِلة ، لكنها لم تكف مع زميلتيها قفزا و دورانا و رقصا بطريقتهن الخاصة :

" الدنيا بتمطر ، و عزيزة بتنشر "

قاومتُ رغبتي في الابتسام لها .... ركزتُ في عينيها أكثر ... و أكثر ... ثم ، في روحها أكثر و أكثر

و حدث ما أردت

تركتها ذاهلة ً على إبتسامتها و هي تنظر لي من الشباك ، بينما أقذف بـ ( شبشبها ) الصغير من قدمي ، أمتع قدميَّ بملمس التراب المبلول ، أهز شعري يمنة و يسارا متدللة ً على المطر الذي يداعب رأسي ... أقفز و أدور و أرقص رقصتي الخاصة ، و أنا أصيح بأعلى صوتي مع زميلتيها :

" الدنيا بتمطر ، و عزيزة بتنشر "

يقين

آثرتُ لملمة بعض الياسمين من الأرض عن قطفه من الشجرة خلفي
لم أجلس نافدة الصبر ، و لم أنظر في الساعة كثيرا ً -- كنتُ أفحص زهرات الياسمين معي
وجدته أمامي مرة واحدة -- حل الارتباك بإبتسامتي ، و وضعتُ الياسمين في الحقيبة بسرعة ، و قمت معه

" قهوة "
كان مطلبنا متشابها في " إيليت "
منتحتني اللوحات الفنية المرصوصة على الحائط بعض الألفة بالمكان الذي تناثرت زجاجات " البيرة " على بعض موائده

- " تفتكر اللوحات دي أصلية ؟ "
- " ما أعرفش -- بس مش هايفرق --- ماحدش بياخد باله من وجودها في الأساس "

كان يغلب على داخل المقهى الوجودُ المتوحدُ المكتفي بذاته للأفراد الذين يسامرون مشروبا ما أو " زجاجة بيرة " ، بينما تركز وجود ما يشكل جماعات في الواجهة التي تطل على الشارع
كانت منضدتنا تسمح برؤية المكان كله بوجودها بالركن الداخلي للمقهى -- بل ، و تشرُب الجو المميز للمكان -- بلوحاته ، إضائته الهامسة ، مناضده الكبيرة المرتفعة ، أغنيات ال" جاز " و " البوب " القديمة التي تنبعث من ( غرفة ) إعداد الطلبات ، الجرسون الخمسيني ذو الابتسامة شديدة التهذيب

" اسكندرية منورة "
" منورة ذاتيا على فكرة ، لا بيا و لا بيك "
ابتسم ----- " اللماضة المعتادة "
" أكيد "

العمل -- الدراسة -- الصحة و الحال ---------كانت الأسئلة المعتادة بإجاباتها المعتادة يتم دفعها بين كل فترة صمت و أخرى
" خرجتي قبل كده مع حد من باقي أصحابك هنا ؟ "
" آه أكيد "
ثم تابعت --- " حتى من قبل ما يكون لي أصحاب هنا --- اسكندرية كلها صاحبتي "
" مافيش فايدة " ردد ضاحكا
" أبدا " --- أكدتُ له
"
عدنا لصمتينا المعتادين ---- " وجودُك كلام " -- همستُ لي ---" وجودي معك كلام "
" تيجي نتمشى أحسن ؟ "
وافقتُ بترحيب

و كالعادة -- عادتي و عادة كل من أعرف من أصدقاء -- صار تمشينا تلكؤاً و فضولا ً و وقوفاً أمام بائعي الكتب بشارع النبي دانيال

" بأدور على كتب " سارتر " "

لمحتها خلف الاسم و الاهتمام
لم أعرف عنها سوى رتوش قليلة جدااا -- كان أهمها على الإطلاق : أنه أحبها
الحب -- التكامل -- البدايات المبشرة المندفعة -- و النهاية الباردة التي لم تؤثر برودتها على حنينه الدائم لها

" قرتيله حاجة ؟ "

لم أعرف لِمَ هذا الاحساس الطاغي بوجودها

" يعني -- بس انت بتدور على كتاباته في الأدب ، و لا الفلسفة ، و لا علم النفس ؟ "
" علم النفس ؟ "
" آه -- كان كتب عن " الانفعال " قبل كده "
" ماكنتش أعرف " --- و استكملنا طريقنا

حوارٌ مبتور -- عدم محاولة أيٌ منا لافتعال حديث أو اهتمام -- جيد --- لا بأس على الإطلاق
" بصي " --- أشار بيده لللافتات التي تعلن أسماء الشوارع --- يونانية حينا -- عربية اسلامية حينا -- رومانية حينا -- و حديثة حينا آخر

ابتسمتُ
( هنا أيضا هي الآن )
أصبحنا ثلاثة في تجوالنا في شوارع محطة الرمل و تفرعاتها -- أنا -- هو -- و هي كطيفٍ يصاحبه ، و لا يدري أني أشعر بوجوده أنا أيضا
بل ؛ ربما نسير الآن بنفس المسارات التي سارا فيها معا من قبل ، و يعيد إبداء ملاحظةٍ أو أخرى قد أدهشتها أو لفتت انتباهها من قبل
إنه الحبل السري الذي يربطنا بتجاربنا الأولى

" كان يوم حلو --- شكرا جدا "
قلتُها و أنا أنظر في عينيه مبتسمة
( صديقٌ عزيز --- أستطيع النظر في عينيه مباشرةً دونما قلق أو شعورٌ بالخجل ) -- فكرتُ و أنا ألوح له من نافذة " المشروع "
( هل لمح طيفا ما إلى جواري أنا أيضا ؟ ) --- تساءلتُ و أنا أعبث بمحتويات حقيبتي لأجد أزهار الياسمين قد ذبلت تماما ً ، و إن نثرت عبقها بأرجاء الحقيبة .

مسافة

حاول أن يحتفظ بمسافةٍ كافية بينهما ..... أن يتحدث ، يبتسم ، ينشغل بتفصيلة ما هنا أو هناك إلا أن يلاقي عينيها
لم يكن لديها سوى صمتٍ مُحبَط لترد به
و لم تفعل كالأيام الخوالي : فترفع رأسها لتمعن في عينيه بشجنهما الذي تعشق ، و لمعة الحياة المطلة برأسها من شقوق ذلك الشجن ... ثم ، يطيلان النظر إلى أعين كل منهما الآخر في لعبة نفس طويل فيما بينهما ... تتسلل الابتسامات ، حركات الوجه الطفولية تلك أحيانا .. ثم ، قبلة طويلة يندهشان لاختلاف طريقتها كل مرة
كفا عن لعبة تبادل النظرات لفترة طويلة ذات مساء شتوي دفيء . كان الأمر شديد الجدية تلك الليلة ، لم يحاول أحدهما الإتيان بحركة ما بوجهه أو إفلات إبتسامةٍ ما ... استطابا الرحيل في عيني كل منهما الآخر
و لم تشعر سوى بالدموع تغرقها ... كان مؤلما .. جميلا جمالا لا يحتمل و قاسٍ في ألمه ذلك التماس بين روحيهما . شعرت و كأنها قد رحلت حقا و تركت جسدها لتسكن مع روحه في جسده هو
يومها ، و على الرغم من عقلانيته الزائدة ، إلا أنه استوعب الأمر ... جرى إليها ، غطى عينيها بيده و أخذها من يدها إلى الغرفة ... أنامها و أحكم حولها الغطاء
جلس إلى جوارها و أخذ يهدهد عليها إلى أن نامت
لم يقبلها تلك الليلة و لم يقترب منها ، ظل في الشرفة في ساعات الليل الباردة يدخن و هو شارد ، و به ألم لا يدري له سببا
ظلت يومين تتجنب لحظة دخوله إلى المنزل ، قل كلامهما ، و كاد أن يختفي مزاحهما ، و شعر و كأنها تحولت إلى كيان مقدس لا ينبغي له الاقتراب منه ... بل ؛ مر اليومان بعزوف حقيقي من كلاهما عن تلك الحياة الحميمية التي تجمعهما في الليل غالبا
و حين بدأت الأمور تعود إلى طبيعتها ، كفا عن اللعبة ، و اتفقا ضمنيا أنها أكبر منهما ، و اكتفيا بنظرة قصيرة نسبيا مختلطة بابتسامة شغوف حينا ، متشوقة حينا ، حنينية حينا ، و ماكرة حينا ... يبدأن بعدها مباشرة طقوسهما المعتادة / المتجددة
---------------------------------------------------------
" كده ممكن تبردي "... معتذرا ، مواجها ، مستعيدا لاتزانه كان صوته
ثم لفتها إليه ... لم تكن عيناها تستطيعان لوما أو عتبا له ، لكنه الألم .. مختلطا بنظرة استعطاف ربما خلف الدموع التي ملأت عينيها
حاول أن يضمها ... ابتعدت نفس المسافة التي كان يحاول الإبقاء عليها عندما دخل ... تلك المسافة التي تضمن عدم وصول رائحة الكحول إليها
" طب اتكلمي طيب "
" لوميني حتى و بلاش الألم اللي في عنيكي ده "
" أنا مش مدمن خمرة يعني ، ده مجرد كاس "
زادت دموعها و هي منكسة الرأس
-------------------------------------------------------------
دُهش معظم المعارف ، الأصحاب ، و الجيران من الخبر
فالعلاقة المميزة جدا فيما بينهما عندما وُجدت كان ذلك مفاجأة صادمة و غير منطقية للجميع و بخاصة عندما تحولت ارتباطا موثقا
و مثل تلك النوادر عندما تحدث ، يكاد المرء أن يجزم بعدها أنه من المستحيل أن تنفك عراها ،
بينما أكدت إحدى الجارات أن الزوجة لابد و أن أتت بفاحشة مبينة ، و من شهامة الزوج أن ابتعد عن الفضائح و اكتفى بتطليقها ، و روت تفاصيل انكسارتها أمامه في الشرفة و وجهه الهاديء الرصين و هو يحدثها
و خمن البعض أنه قد ظهرت أخرى في أفق حياته ، أو أنه قد عاد لاحدى أخرياته السابقات
أما هي ، فانغمست في صلاتها و قراءتها ، و اعتدت ألمها في فراقه عقابا لها على إشارتها الخضراء لحبه و هي تعرف جيدا أن حياتيهما متوازيان لا يلتقيان

هل مازلت هناك؟

أسمع صريرا ، وترتفع لافتة صغيرة بنفسجية في الجانب بوجهٍ باهتٍ شبحيّ معلنةً أن " الفارس " قد أصبح " أوف لاين " ...
لم نكمل كلامنا بعد .. هل غضب؟
لكن القواعد كانت واضحة : لا أسماء ... لا صور .... لا كاميرا ... أو مايك ..
فقط.. مجاراة للرغبة في التحدث مع شخص ما لاتعرفه .. ربما كالحديث إلى مسجلٍ ما .. لكن الفارق أن الذي يلعب دور المسجل يستوقفك أحيانا .. يسألك عن شيء ما ... قد يستفزك ، وربما يكون يكذب عليك أيضا ... لكن .. من يهتم؟
يبهجني الصرير هذه المرة مع اليافطة البنفسجية ذات الوجه المضيء المبتسم

..
"آسف .. حصل عطل "
" افتكرتك مُت "
"ماتخافيش لما أموت هاتعرفي برضه "
"؟"
"لأني هاقولهم هنا يبلغوا أصدقائي ع النت لما أموت ويخلوهم يقروا لي الفاتحه "
" مين قالك إن إحنا أصدقاء أساسا ؟"
"تاني؟"

"احنا مجرد معارف"

لا أعرف كيف امتد الحوار بيننا لعدة ساعات دون ملل ... تُرى .. هل كذب عليّ في شيء ؟
لا أعتقد ذلك

!

---------------------------------------------------------------

كانت القواعد واضحة : لا أسماء .. لا صور ... لا كاميرا ... أو مايك

....
لكن ...هل هذا يكفي كي لا تعرفه؟

---------------------------------------------------------------

"بقالنا ست أشهر في الحبس "

"؟"
" حبس القواعد اللي احنا ماشيين عليها "
"انت لسه فاكر .. انسى بقى "
" أنسى القواعد ؟"
" انسى انك تتمرد عليها "
"طب نتناقش"
"؟"
"عندي حيثيات نقض جديدة "
هكذا هي الديمقراطية ... تضع المرء في مطب المناقشة ، وعند الاقتناع تصبح الطامة الكبرى بالتعرض لمنطقة جديدة لم يتواجد فيها المرء من قبل ، ولا يعرف ماذا تكون نتيجتها ....
" هافكر ، والمرة الجاية أوعدك نتفق "
" اتفقنا"
-----------------------------------------------------------
أسبوع من الافتقاد .... ثم ..
- كل شيء تمام
- لي أصدقاء رائعون حقا
- أقضي معهم أوقاتا رائعة
- أنا بخير تماما
ولم تنس الضغط على زر الإدخال ( انتر) بعد كل جملة ، بعدما وافقتْ على أن تلك الرسائل سيتم ارسالها عندما يكون هو على الخط

..

------------------------------------------------------------

- اليوم فعلتُ أشياءا رائعة
- كل شيء تمام
-أنا في أحسن حال
- كل شيء تمام حقا
- لا ينقصني أي شيء
لماذا تصبح اللغة هكذا ؟ ... لن أنسى على أية حال الموافقة أو زر الإدخال

..
----------------------------------------------------
- اليوم لا يختلف كثيرا
- فأنا بخير وفي أحسن الأحوال
- هل سأسمع منك قريبا؟
ودائما هي لا تنسى .

----------------------------------------------------
ظلت برهة تحدق في الشاشة وتتفحص ما لديها من رسائل ... محتها دون رد - بعد خيبة أمل ...

- أفتقدك كثيييييييييييييراااااااااا أفتقدك كثيييييييييييررررااااا أفتقدك أرجوك أجبني رد عليّ حقا أفتقدكلم تنس ، لكنها لم تضغط زر الإدخال ... فقط ... محتْ كل ما كتبتْ .

-----------------------------------------------------
رسائل كثيرة " أوف لاين " ذهبت ْ ولم يأت رد عليها ...
و إحساسٌ غريب لم يُعرف موقعه من الصحة ....
فلم يكن هناك من دليل سوى رسالةٍ صدئة ... صوت باب لم يعد يُسمع .. و لافتةٌ بنفسجية صغيرة في الذاكرة ... ووجهٌ ظل شاحباً أبداً .